ដោយៈ ស៊ីវ ម៉េង
សឹង្ហបុរីៈ កាលពីពេលថ្មីៗនេះ ក្រុមមន្រ្តីរដ្ឋាភិបាល អ្នកអភិវឌ្ឍន៍ និងអ្នកជំនាញអន្តរជាតិនានា បានចូលរួមវេទិកាដ៏ធំមួយនៅប្រទេសសឹង្ហបុរី។
គណៈកម្មាធិការអចលនវត្ថុ និងសំណង់របស់ EuroCham សហការជាមួយគណៈកម្មាធិការសំណង់ EuroCham វៀតណាមបានរៀបចំវេទិកា Cambodia Tall Building Forum លើកទីបី ដែលផ្តោតលើអនាគត នៃការអភិវឌ្ឍន៍អគារខ្ពស់នៅកម្ពុជា។
វេទិកានេះបានសង្កត់ធ្ងន់ លើតម្រូវការតុល្យភាពរវាងគុណភាព និរន្តរភាព និងតម្រូវការសហគមន៍ ដើម្បីទ្រទ្រង់៧០ភាគរយ នៃចំនួនប្រជាជនពិភពលោក ដែលរស់នៅក្នុងទីក្រុងនៅឆ្នាំ២០៥០ ហើយប្រាកដណាស់នៅកម្ពុជា យើងអាចមើលឃើញការរីកលូតលាស់ នៃនគរូបនីយកម្ម។
វាគ្មិនក៏បានលើកឡើងពីបញ្ហាមួយចំនួន ដូចជា និន្នាការបច្ចេកវិទ្យា ដែលកំពុងលេចចេញនៅក្នុងវិស័យនេះ (បច្ចេកវិទ្យាធន់នឹងខ្យល់ ការច្នៃប្រឌិតថ្មី និងដំបូលពណ៌បៃតង) ដែលអាចដោះស្រាយបញ្ហាដោយផ្តោតលើ និរន្តរភាព និងលំនៅដ្ឋានតម្លៃសមរម្យ។
វាគ្មិនរួមមាន លោកសាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ព្រមទាំងលោក សេង វណ្ណៈ នាយករដ្ឋបាលសាលារាជធានីភ្នំពេញ លោក Lawrence Lennon នាយកគ្រប់គ្រង CBRE លោក Serge Pak នាយកប្រតិបត្តិ Beton Block និង Pave និងលោក Mohammed Adibប្រធានផ្នែករចនានៅ Dewan Architects & Engineers។
ពួកគេបានពិភាក្សាអំពីទិដ្ឋភាព នៃការវិវត្តន៍របស់បរិបទក្នុងស្រុក និងប្រធានបទសំខាន់ៗ រួមមាន សារៈសំខាន់នៃសាលារៀនដែលមានគុណភាព និងទីធ្លាបៃតងក្នុងការអភិវឌ្ឍន៍ទីក្រុង សារៈសំខាន់នៃជំនាញក្នុងការរចនា និងសំណង់ តម្រូវការលំនៅឋានតម្លៃសមរម្យ ការអភិវឌ្ឍន៍អគារខ្ពស់ ដែលធ្វើឱ្យមានតុល្យភាពនៃការប្រើប្រាស់ដីជាមួយនឹងទីតាំងបៃតង និងកន្លែងកម្សាន្ត។
លោកសាយ សំអាល់ បានលើកឡើងថា “យើងចង់បានទីក្រុងមួយ ដែលមនុស្សគ្រប់គ្នាអាចរស់នៅ អាចរកការងារសមរម្យ មានអាហារបរិភោគគ្រប់គ្រាន់ ហើយកូនៗរបស់ពួកគេអាចទៅសាលារៀន”។ លោកបន្តថា “អត្តសញ្ញាណរបស់យើង ត្រូវបានបាត់បង់ក្នុងសម័យខ្មែរក្រហម ហើយយើងត្រូវកសាងវាឡើងវិញដោយខ្លួនឯង។ យើងបានចាកចេញពីសម័យអាប់អួរ ហើយយើងកំពុងកសាងសង្គមថ្មី កំណត់តម្លៃថ្មី និងបង្កើតរបៀបរស់នៅថ្មី”។
ជាមួយគ្នានេះ លោក សេង វណ្ណៈ បានបញ្ជាក់ថា ចំនួនអគារខ្ពស់ជាង១០ជាន់ក្នុងរាជធានីភ្នំពេញ នាពេលបច្ចុប្បន្នមានលើសពីការអភិវឌ្ឍចំនួន១៨០០គម្រោង។
លោកបានបន្ថែមថា “ការផ្លាស់ប្តូរយ៉ាងឆាប់រហ័ស បានបង្កើតបញ្ហាប្រឈម សម្រាប់ទីក្រុងក្នុងការសម្របខ្លួន ខណៈដែលការរស់នៅអគារខ្ពស់ មានលក្ខណៈខុសគ្នា ពីការរស់នៅបែបប្រពៃណីនៅកម្ពុជា”។
លោកបន្ថែមថា កង្វះបទប្បញ្ញត្តិកំណត់តំបន់ (zoning regulations) មានន័យថា ជារឿយៗតំបន់ជុំវិញអគារខ្ពស់ មិនត្រូវបានរចនាឡើង សម្រាប់ការកំណើនរថយន្តភា្លមៗ ឬដំណើរថ្មើជើង ហើយជាលទ្ធផល ធ្វើឱ្យហេដ្ឋារចនាសម្ព័ន្ធ ទទួលរងផលប៉ះពាល់ (ដូចជាប្រព័ន្ធលូ និងបណ្តាញផ្លូវថ្នល់)”។
ចំណែកលោក Lawrence Lennon នាយកគ្រប់គ្រងក្រុមហ៊ុនCBRE Cambodia បានលើកឡើងពីកាលានុវត្តភាព ដោយបានកត់សម្គាល់ពីខេត្តព្រះសីហនុ ដែលមានសក្តានុពលច្រើន សម្រាប់អគារខ្ពស់ៗ ហើយលោកមើលឃើញ ពីតម្រូវការមន្ទីរពេទ្យ ការអប់រំ និងការរស់នៅ ព្រមទាំងលំនៅដ្ឋានតម្លៃសមរម្យ ដែលជាទូទៅកំពុងខ្វះខាតនៅកម្ពុជា។
ការជម្រុញសកម្មភាពដើម្បីកម្ពុជាវេទិកាដ៏មានសារៈសំខាន់នេះ បានផ្តល់អនុសាសន៍ចំនួន៣សំខាន់សម្រាប់រដ្ឋាភិបាលកម្ពុជាពិចារណា រួមមាន ទី១ បង្កើតលំនៅដ្ឋាន និងសាកលវិទ្យាល័យដែលមានតម្លៃសមរម្យ។ ទី២ ធ្វើឱ្យមានតុល្យភាពនៃការអភិវឌ្ឍន៍អគារខ្ពស់ ជាមួយនឹងការចូលរួមពីសហគមន៍តាមគំរូ ដូចជា Marina Bay ក្នុងប្រទេសសិង្ហបុរី។ ទី៣ កែលម្អហេដ្ឋារចនាសម្ព័ន្ធសាធារណៈ ដើម្បីគាំទ្រដល់ការរីកលូតលាស់នៃអគារខ្ពស់ៗ៕
