ដោយៈ គង់ សូរិយា
ភ្នំពេញៈ ថ្នាក់ដឹកនាំនៃក្រសួងរៀបចំដែនដី នគរូបនីយកម្ម និងសំណង់ បានលើកឡើងពីឱកាសវិនិយោគថ្មី សម្រាប់ជប៉ុនលើវិស័យមួយចំនួននៅខេត្តព្រះសីហនុ។
ការបង្ហាញនេះធ្វើឡើងក្រោមអធិបតីភាព លោកឧបនាយករដ្ឋមន្រ្តីសាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់។
កាលានុវត្តន៍ភាពនៃការវិនិយោគ ដែលថ្នាក់ដឹកនាំក្រសួងបានបង្ហាញបានលើកឡើងថា ការពង្រីកផែនៅខេត្តព្រះសីហនុ ដែលនឹងប្រែក្លាយផែនេះ ឱ្យក្លាយជាផែធំទី២ បន្ទាប់ពីផែនៅប្រទេសសិង្ហបុរី តំបន់សេដ្ឋកិច្ចពិសេសភ្នំពេញ និងទិសដៅវិនិយោគសំខាន់ៗមួយចំនួនទៀត ដែលជប៉ុនអាចចូលរួមសហការបាន ក្នុងការជួយជំរុញដល់ដំណើរការ សេដ្ឋកិច្ចរបស់ប្រទេសកម្ពុជា។
រាជរដ្ឋាភិបាលបាននិងកំពុងត្រៀមបញ្ចប់ ផែនការមេ ដើម្បីប្រែក្លាយខេត្តព្រះសីហនុ ជាតំបន់អភិវឌ្ឍន៍ពហុបំណង ដើម្បីជម្រុញ និងទាក់ទាញការវិនិយោគ។
ជាក់ស្តែងកាលពីពេលថ្មីៗនេះ ប្រមុខរាជរដ្ឋាភិបាលកម្ពុជាសម្តេចធិបតីហ៊ុន ម៉ាណែតបានដាក់ចេញកម្មវិធីជម្រុញការវិនិយោគនៅខេត្តព្រះសីហនុ ដោយដាក់ចេញនូវកញ្ចប់លើកទឹកចិត្តជាច្រើន ដល់ម្ចាស់អាគារជាប់គាំងនានា ក៏ដូចជាជម្រុញនិងទាក់ទាញការវិនិយោគថ្មីៗ ក្រោមលក្ខខ័ណ្ឌអនុគ្រោះនិងលើកទឹកចិត្តជាច្រើន៕
