ដោយ គង់ សូរិយា
ភ្នំពេញ៖ គំរោងលំនៅដ្ឋានតម្លៃមធ្យមលើកដំបូងនៅកម្ពុជា ដែលវិនិយោគដោយក្រុមហ៊ុនជាបុត្រសម្ព័ន្ឋរបស់ World Bridge Group ហាក់លក់យឺតជាងការរំពឹងទុក ដោយរហូតមកទល់ពេលនេះ ការលក់ទើបសម្រេចបាន ៤០ភាគរយប៉ុណ្ណោះ។
អគ្គនាយកក្រុមហ៊ុន Khmer Foundation Appraisal លោកឧកញ៉ានួន រិទ្ឋីដែលជាអ្នកលក់ផ្តាច់មុខគំរោងនេះ បានមានប្រសាសន៍ឲ្យដឹងតាមទូរស័ព្ទ នារសៀលថ្ងៃទី៥ មេសានេះថា រហូតមកទល់ពេលនេះការលក់លំនៅដ្ឋានក្នុងគំរោងនេះ ទើបសម្រេចបានប្រមាណ៤០ភាគរយ នៃគំរោងទាំងមូលដែលមានផ្ទះជាង២៤០០ខ្នង។ លោកបន្តថា ការលក់របស់យើងផ្តោតលើមន្រ្តីរាជការ និងអ្នកទិញធ្វើជាលំនៅដ្ឋានពិតប្រាកដ ព្រោះអ្នកទិញផ្ទះនៅក្នុងគំរោងនេះ ត្រូវតែស្នាក់នៅរយៈពេល៥ឆ្នាំ ទើបអាចលក់ចេញបាន។
លោកបន្តថា “រហូតមកទល់ពេលនេះ លំនៅដ្ឋានក្នុងគម្រោងនេះលក់អស់ហើយសំរាប់ផ្ទះខ្នាតធំ ប៉ុន្តែផ្ទះមានទំហំ៥គុណនឹង៧ម៉ែត្រដែលមានតម្លៃចន្លោះពី ២៥០០០ ទៅ ២៨០០០ដុល្លារមិនទាន់លក់អស់នៅឡើយទេ”។
