ដោយ ៖ រ៉ាណេត
ភ្នំពេញ៖ អ្នកជំនាញ ក៏ដូចជាបណ្តាអ្នកវិនិយោគវិស័យអចលនទ្រព្យអះអាងថា ក្រុងប៉ោយប៉ែតកំពុងតែបញ្ចេញនូវសក្ដានុពល និងភាពទាក់ទាញមិនចាញ់ក្រុងព្រះសីហនុនោះឡើយ ខណៈដែលគម្រោងអភិវឌ្ឍន៍សំណង់អគារពាណិជ្ជកម្ម បុរី ព្រមគ្នាជាមួយនឹងសំណង់លំនៅដ្ឋាននានាជាច្រើន កំពុងតែសម្រុងសាងសង់ ដើម្បីបំពេញតាមតម្រូវការទីផ្សារ។
យោងតាមរបាយការណ៍របស់សាលាក្រុងប៉ោយប៉ែតបានឲ្យដឹងថា ទីក្រុងប៉ោយប៉ែតបច្ចុប្បន្ន មានប្រជាពលរដ្ឋរស់នៅប្រមាណ២០ម៉ឺននាក់ ក្នុងនោះជនបរទេសមានប្រមាណ៥ម៉ឺននាក់ និងមានអាគារកំពស់ចាប់ពី៤ ដល់ជាង ៣០ជាន់ចំនួន ៦០អាគារ។ ក្រុងប៉ោយប៉ែតមានតំបន់សេដ្ឋកិច្ចពិសេសចំនួនបី ដែលផ្តល់ការងារដល់ប្រជាពលរដ្ឋរាប់ពាន់នាក់ និងកំពុងទាក់ទាញអ្នកវិនិយោគបរទេសយ៉ាងច្រើន ពិសេសអ្នកវិនិយោគចិន និងជប៉ុន។ ជាមួយនឹងកំណើននៃចំនួនប្រជាជនក្នុងតំបន់នេះ បានធ្វើឱ្យក្រុងប៉ោយប៉ែតទាំងមូលមានតម្រូវការខ្ពស់លើផ្នែកបន្ទប់ស្នាក់នៅ។
-->
លោក សួង សុខហ៊ាង ប្រធានក្រុមប្រឹក្សាភិបាលក្រុមហ៊ុន Four Star Plus Four និងជាសហគ្រិនវ័យក្មេងដែលបានបោះទុនចំនួន ៣០លានដុល្លារ ធ្វើការអភិវឌ្ឍន៍គម្រោងបុរី Star Gold បានមានប្រសាសន៍ថា ដោយសារតែមានតម្រូវការខ្ពស់ បានជំរុញឱ្យតម្លៃដីធ្លី ក៏ដូចជាវិស័យអចលនទ្រព្យនៅក្រុងប៉ោយប៉ែត មានការកើនឡើងយ៉ាងគំហុក រហូតនៅតំបន់ខ្លះមានតម្លៃស្ទើរ ស្មើនឹងតម្លៃដីនៅក្រុងព្រះសីហនុ ជាក់ស្ដែងដូចជានៅតំបន់ផ្លូវផ្កាយ៥ ដែលស្ថិតនៅក្បែរព្រុំដែន តម្លៃដីក្នុងមួយម៉ែត្រការ៉េឡើងដល់ប្រមាណ ៤៥០០ - ៥០០០ ដុល្លារ។ ដោយឡែកដីដែលស្ថិតនៅឆ្ងាយពីតំបន់ព្រុំដែន ស្ថិតនៅក្នុងក្រុងប៉ោយប៉ែត អាចមានតម្លៃប្រមាណ២៨០០ ទៅ៣៥០០ក្នុងមួយម៉ែត្រការ៉េ។
លោកបានបន្តទៀតថា “ដោយសារកំនើននៃការវិនិយោគ និងកំណើនប្រជាសាស្រ្តបានធ្វើឲ្យការលក់លំនៅដ្ឋាននៅក្នុងគំរោង Star Gold សម្រេចបាន ៩០ភាគរយ ជាលទ្ឋផលល្អលើសការរំពឹងទុក”។ លោកបន្តថា “បុរី Star Gold នឹងបញ្ចប់ការសាងសង់នៅឆ្នាំ២០២០ខាងមុខ ខណៈបច្ចុប្បន្នការសាងសង់សម្រេចបានប្រមាណ ៣០ភាគរយ”។
លោកសួង សុខហ៊ាងបានបន្តថា ជាមួយនឹងកំនើននៃការវិនិយោគ និងការកើនឡើងនូវជីវភាពប្រជាពលរដ្ឋ ក្រុមហ៊ុនបុរី Star Gold នឹងជួលពីអតិថិជនត្រលប់មកវិញក្នុងតម្លៃ១២០០ដុល្លារក្នុងមួយខែ ក្រោយពេលផ្ទះសាងសង់ចប់។
អ្នកចាប់ អារម្មណ៍ ទិញ ដី និង លំនៅ ដ្ឋាន ក្នុង គំរោង នេះ អាច ទាក់ទង តាមរយៈ លេខទូរស័ព្ទ ០៨៦ ២១៥ ៧៧៧ . ០៩៩ ២១៥ ៧៧៧.០៦២ ២៨០ ៩៧៥០ ។
អភិបាលក្រុងប៉ោយប៉ែត លោកសាន ស៊ាងហូបានមានប្រសាសន៍ទទួលស្គាល់ថា ទីក្រុងប៉ោយប៉ែត ពិតជាកំពុងមានការរីកចម្រើនលើវិស័យហេដ្ឋារចនាសម្ព័ន្ឋ អចលនទ្រព្យ និងគំរោងសាងសង់លំនៅដ្ឋាននានាជាច្រើន ដែលជាការវិនិយោគរបស់អ្នកវិនិយោគក្នុងស្រុក និងការវិនិយោគពីបរទេស។
លោកបន្តថា “ដោយសារកំននើននៃការវិនិយោគបែបនេះហើយ បានធ្វើឲ្យតម្លៃដីធ្លីមានកំនើនខ្ពស់ ពិសេសតម្រូវការលំនៅដ្ឋាន និងបន្ទប់ឬការិយាល័យជួលបានកើនឡើងយ៉ាងគំហុក ដែលធ្វើឲ្យការផ្គត់ផ្គង់មិនឆ្លើយតបនឹងតម្រូវការនៅឡើយ”។
លោកស៊ា ឆៃលីននាយកក្រុមហ៊ុនឆៃលីន ស៊ា រៀលធី ខូអិលធីឌី បានទទួលស្គាល់នូវសន្ទុះ នៃកំណើនតម្លៃដីធ្លីនៅក្នុងក្រុងប៉ោយប៉ែត ដោយលោកបានមានប្រសាសន៍ថា ប៉ោយប៉ែតជាតំបន់ដ៏សំខាន់មួយ នៃវិស័យសេដ្ឋកិច្ចកម្ពុជា ជាក់ស្ដែងដូចជា ក្នុងចំណោមច្រកព្រំដែនទាំងធំ ទាំងតូចប្រមាណជា៩០នោះ ច្រកប៉ោយប៉ែតគឺជាច្រកទ្វារសំខាន់ជាងគេបំផុតក្នុងការនាំចេញ នាំចូលទំនិញ ដែលជំរុញឱ្យមានកំណើនសេដ្ឋកិច្ចនៃប្រទេសទាំងពីរ ហើយក៏ជាច្រកទ្វារទេសចរណ៍ដ៏មានសក្ដានុពលផងដែរ។
លោកបញ្ជាក់ថា “កត្តាដែលជំរុញឱ្យតម្លៃដីធ្លីកាន់តែមានសន្ទុះខ្លាំងនោះ គឺវត្តមាននៃក្រុមហ៊ុនបរទេស ជាពិសេសក្រុមហ៊ុនចិន ដែលកំពុងមានការកើនឡើងខ្ពស់”។ លោកថា “តម្លៃដីក្រុងប៉ោយប៉ែតនៅពេលបច្ចុប្បន្ននេះ នៅមិនទាន់ដល់កម្រិតកំពូលនៅឡើយនោះទេ ដែលវានឹងបន្តកើនឡើងទៀតនៅពេលអនាគត”។
ក្រុងប៉ោយប៉ែត ត្រូវបានរាជរដ្ឋាភិបាលកម្ពុជា ដាក់បញ្ចូលទៅក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥ - ២០២៥ សម្រាប់ជាតំបន់ឧស្សាហកម្មពិសេសមួយក្នុងចំណោមទីក្រុងចំនួន២ទៀត គឺក្រុងបាវិត និងក្រុងព្រះសីហនុ៕
