រូបតំណាង
ដោយ គង់ សូរិយា
ភ្នំពេញ៖ ស្ពានវែងជាងគេក្នុងប្រទេសកម្ពុជា ដែលតភ្ជាប់រវាងខេត្តកំពង់ឆ្នាំង និងខេត្តកំពង់ធំប្រវែង៣៩០០ម៉ែត្រឆ្លងកាត់ទន្លេសាប គ្រោងនឹងសាងសង់នៅក្នុងឆ្នាំនេះហើយ។
អ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី២៥ មេសានេះថា តាមប្រសាសន៍របស់លោកទេសរដ្ឋមន្រ្តី រដ្ឋមន្រ្តីក្រសួងសាធារណៈការ និងដឹកជញ្ជូនបានឲ្យដឹងថា ស្ពាននេះនឹងសាងសង់នៅក្នុងឆ្នាំនេះ ព្រោះលោកទេសរដ្ឋមន្ត្រី ស៊ុន ចាន់ថុលទេសរដ្ឋមន្រ្តី រដ្ឋមន្រ្តីក្រសួងសាធារណៈការនិងដឹកជញ្ជូន កំពុងចរចាជាមួយរដ្ឋភិបាលចិនដើម្បីទទួលបានហិរញ្ញប្បទានសម្បទានយកមកសាងសង់ស្ពាននេះ។ លោកបន្តថា លោកទេសរដ្ឋមន្ត្រី ស៊ុន ចាន់ថុលទេសរដ្ឋមន្រ្តី រដ្ឋមន្រ្តីក្រសួងសាធារណៈការ និងដឹកជញ្ជូនចង់សាងសង់ស្ពាននេះនៅចុងឆ្នាំនេះ។
-->
លោកបន្តថា “ស្ពាននេះនឹងសាងសង់ដោយក្រុមហ៊ុនស្ពានថ្នល់របស់ប្រទេសចិន ហើយក្រុមការងារបច្ចេកទេស កំពុងធ្វើការកែលំអរមួយចំនួនលើគំរោងស្ពានវែងជាងគេនៅប្រទេសកម្ពុជានេះ”។ លោកបន្តថា “យើងមិនអាចបញ្ជាក់ថាការសាងសង់នៅពេលណាជាក់លាក់ក្នុងឆ្នាំនេះទេ ទាល់តែថ្ងៃបើកការដ្ឋានទើបយើងដឹងពិតប្រាកដ”។
សម្តេចតេជោ ហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជាបានប្រកាសពីការសាងសង់ស្ពាន និងផ្លូវប្រវែង ៥៧គីឡូម៉ែត្រតភ្ជាប់ខេត្តកំពង់ឆ្នាំង និងកំពង់ធំ ក្នុងឳកាសសម្តេច និងសម្តេចកតិត្តិព្រឹទ្ឋបណ្ឌិតប៊ុន រ៉ានី ហ៊ុន សែនអញ្ជើញជាអធិបតីក្នុងពិធីបុណ្យទន្លេដែលប្រារពធ្វើកាលពីល្ងាចថ្ងៃទី១៦ មិនាកន្លងមកនេះ។
ជាមួយគ្នានេះដែរ កាដូដ៏ធំប្រចាំឆ្នាំ២០១៩នេះ ក៏នឹងមានសាងសង់ស្ពានឆ្លងកាត់ដៃទន្លេចំនួន៣ រួមមាន ទី១-ទន្លេផ្សារក្រោម, ទី២ - ទន្លេជល់មុខ និង ទី៣ - ទន្លេកំពង់ហាវ ពីខេត្តកំពង់ឆ្នាំ ឆ្ពោះទៅខេត្តកំពង់ធំ មានប្រវែងរហូតដល់ទៅ៣,៩០០ម៉ែត្រ ដែលនឹងក្លាយជាស្ពានវែងជាងគេបំផុតនៅក្នុងប្រទេសកម្ពុជា។ ទន្ទឹមនឹងនេះដែរ រាជរដ្ឋាភិបាលកម្ពុជា ក៏មានគម្រោងសាងសង់ស្ពានចំនួន២បន្ថែមទៀត នៅក្នុងខេត្តកំពង់ធំ ដើម្បីសម្រួលកុំឲ្យមានផលប៉ះពាល់ ទៅដល់ចរាចរណ៍ផ្លូវទឹក បរិស្ថាន ក៏ដូចជាគន្លងចរាចរណ៍ត្រី។
លោកស៊ុន ចាន់ថុលទេសរដ្ឋមន្រ្តី រដ្ឋមន្រ្តីក្រសួងសាធារណៈការនិងដឹកជញ្ជូនបានឲ្យដឹងថា គំរោងសាងសង់ស្ពាន និងផ្លូវនេះបានសិក្សាតាំងពីឆ្នាំ២០១៤ ប៉ុន្តែក្រោយមកបានផ្អាកមួយរយៈ ដោយសារសម្តេចតេជោបានឲ្យសិក្សាឡើងវិញ ពីផលប៉ះពាល់បរិស្ថាន និងចរាចរណ៍ឆ្លងកាត់របស់ត្រី ហើយជាលទ្ឋផលគណកម្មការអន្តរក្រសួង និងក្រុមហ៊ុនសាងសង់បានសិក្សាឡើងវិញ ជាលទ្ឋផលគំរោងនេះមិនមានផលប៉ះពាល់បរិ ស្ថាននិងត្រីនោះទេ។លោកបន្តថា គំរោងនេះត្រូវបានបើកវេទិកាសាធារណៈនៅខេត្តកំពង់ឆ្នាំង និងកំពង់ធំ ជាលទ្ឋផលប្រជាពលរដ្ឋបានគាំទ្រលើគំរោងនេះ១០០ភាគរយ។
លោកបន្តថា “គំរោងនេះអាចចំណាយថវិកាប្រមាណ២០០លានដុល្លារ ដែលជាហិរញ្ញប្បទានសម្បទានរបស់ចិន”។
ទោះជាយ៉ាងណាលោកទេសរដ្ឋមន្រ្តី ស៊ុន ចាន់ថុល មិនទាន់បញ្ជាក់ពីកាលបរិច្ឆេទថាស្ពាននិងផ្លូវនេះអាចសាងសង់ពេលណានៅឡើយទេ ដោយរង់ចាំកញ្ចប់ថវិកាជាក់ស្តែងសិន ប៉ុន្តែលោកសង្ឃឹម១០០ភាគរយថាគំរោងនេះ នឹងទទួលបានការគាំទ្រហិរញ្ញប្បទានពីប្រទេសចិន។
លោកបានបញ្ជាក់ទៀតថា នៅក្នុងគម្រោងនេះ ទទួលបានការសាទរពីសំណាក់ប្រជាជនដែលកំពង់រស់នៅទាំង២ខេត្តជាខ្លាំង ក៏ដូចជាសាទរពីសំណាក់ប្រជាជនទូទាំងប្រទេស ព្រោះនៅពេលកើតមានស្ពាន និងផ្លូវដែលស្ថិតក្នុងគម្រោងសាសង់ខាងលើនេះ នឹងជួយសម្រួលដល់ការធ្វើដំណើរ ការដឹកជញ្ជូន កាត់បន្ថយពេលវេលា ក៏ដូចជាកាត់បន្ថយការចំណាយក្នុងពេលធ្វើដំណើរ ដោយមិនចាំធ្វើដំណើរវាងចូលទៅខេត្តកណ្តាល កំពង់ចាម ទើបចូលទៅដល់ខេត្តកំពង់ធំទៀតឡើយ៕
