ដោយៈ សហសេវិក
ភ្នំពេញៈ រដ្ឋមន្ត្រីក្រសួងព័ត៌មាន លោក នេត្រ ភក្ត្រាបានស្នើសុំឱ្យអ្នកសារព័ត៌មានរបស់ថៃ សូមកុំបំប៉ោង័ត៌មាន ដែលខុសពីការពិតលើបញ្ហាព្រំដែនរវាងប្រទេសកម្ពុជា និងថៃ សូមឱ្យប្រកាន់ឱ្យបានខ្ជាប់ខ្ជួននូវក្រមសីលធម៌ វិជ្ជាជីវៈសារព័ត៌មាន និងសូមកុំបញ្ចូលនិន្នាការនយោបាយនៅក្នុងអត្ថបទព័ត៌មានរបស់ខ្លួន។
ការស្នើសុំបែបនេះ របស់រដ្ឋមន្ត្រីក្រសួងព័ត៌មានកម្ពុជា បានធ្វើឡើងក្នុងឱកាស ផ្តល់បទសម្ភាសន៍ដល់អ្នកសារព័ត៌មាន និងអន្តរជាតិ ជាច្រើនស្ថាប័ន បន្ទាប់ពីលោកបានបញ្ចប់ ពិធីបើកសិក្ខាសាលាស្តីពីការពង្រឹងសមត្ថភាពឌីជីថល របស់យុជន និងក្មេងស្រី ក្នុងវិស័យ ITC Cambodia ឆ្នាំ២០២៥ ជូនដល់យុវជន និងបណ្តាមន្ត្រីជំនាញផ្នែកព័ត៌មាន មកពីបណ្តាប្រទេសចំនួន៣៧ នៅលើទឹកដីសៀមរាប-អង្គរ នៅរសៀលថ្ងៃទី២១ ខែកក្កដា ឆ្នាំ២០២៥នេះ។
លោករដ្ឋមន្ត្រី នេត្រ ភក្ត្រា បានបញ្ជាក់ថា “អ្វីដែលយើងធ្វើការតាមដានកន្លងទៅលើបញ្ហាផ្សព្វផ្សាយប្រព័ន្ធ របស់ផ្សព្វផ្សាយថៃ គឺការបង្កើតនូវភាពមន្ទិល និងការប្រើប្រាស់ពាក្យពេចន៍ ដែលជួនកាលអ្នកព័ត៌មាន បានបំប៉ោងខុសពីការពិត”។
ឧទាហរណ៍នៅថ្ងៃទី២៨ ខែមិថុនា កន្លងទៅ គឺកម្ពុជា និងថៃ មានការព្រមព្រៀងគ្នា សម្រួលកម្លាំងទ័ពនៅតំបន់មុំ៣ ប៉ុន្តែមានសារព័ត៌មានថៃ គឺបានផ្សព្វផ្សាយថា កម្ពុជាបានដកកងទ័ព។ នេះគឺជាឧទាហរណ៍ ដែលយើងអាចមើលឃើញថា ប្រព័ន្ធផ្សាយបានផ្សាយខុស បំភ្លៃការពិត ដែលធ្វើឱ្យមានការយល់ច្រឡំ។
លោករដ្ឋមន្ត្រី នេត្រ ភក្ត្រា បានឱ្យដឹងទៀតថា ជារឿយៗតែងតែឃើញមានអ្នកសារព័ត៌មានរបស់ថៃ តែងតែផ្សព្វផ្សាយព័ត៌មាន បំភ្លៃ បំភ្លើស ទៅលើស្ថានភាពពិតមួយចំនួន ពីបញ្ហាព្រំដែនរវាងកម្ពុជា និងថៃ។ ត្រង់ចំណុចនេះនៃការផ្សព្វផ្សាយព័ត៌មាន បំភ្លើសពីសំណាក់សារព័ត៌មានថៃ មួយចំនួនកន្លងមកនេះ គឺបានបង្កឱ្យមានការយល់ច្រឡំពីសំណាក់ប្រជាជនថៃ ជាដើម។
រដ្ឋមន្ត្រីក្រសួងព័ត៌មានកម្ពុជា បានស្នើសុំឱ្យប្រព័ន្ធព័ត៌មានរបស់ថៃ សូមឱ្យប្រកាន់នូវក្រមសីលធម៌ វិជ្ជាជីវៈសារព័ត៌មាន ឱ្យបានត្រឹមត្រូវ ហើយការផ្សព្វផ្សាយព័ត៌មាន ត្រូវប្រកាន់នូវសច្ចៈភាពនៃព័ត៌មាន ភាពត្រឹមត្រូវនៃព័ត៌មាន ហើយសូមកុំបញ្ចូលនូវនិន្នាការនយោបាយ នៅក្នុងអត្ថបទពព័ត៌មានរបស់ខ្លួន។
លោកបញ្ជាក់ទៀតថា “មិនមែនបង្រៀនអ្នកសារព័ត៌មានរបស់ថៃ ទេ ក៏ប៉ុន្តែអ្វីដែលយើងបានសង្កេតឃើញ គឺការបំភ្លៃ បំភ្លើស ក្នុងការបំប៉ោងព័ត៌មាន មានច្រើន”។
ទន្ទឹមនឹងនេះដែរ លោករដ្ឋមន្ត្រី នេត្រ ភក្ត្រា បានបញ្ជាក់ថា នៅកម្ពុជា គឺប្រជាជនបានទទួលព័ត៌មាន ត្រឹមត្រូវ ច្បាស់លាស់ ពីបញ្ហាព្រំដែន តាមរយៈការបញ្ជូនលព័ត៌មាន ដែលមានប្រភពច្បាស់ការពីរាជរដ្ឋាភិបាល សម្រាប់ឱ្យប្រជាពលរដ្ឋបានដឹង ពីស្ថានភាពនានាស្តីពីបញ្ហាព្រំដែនជាដើម។
ប្រទេសកម្ពុជាធ្វើជាម្ចាស់ផ្ទះ រៀបចំសន្និសីទកំពូលប្រព័ន្ធផ្សព្វផ្សាយអាស៊ីលើកទី២០ (20th Asia Media Summit -AMS) នៅលើទឹកដីអង្គរ ខេត្តសៀមរាប ក្រោមប្រធានបទ “អបអរសាទរពីរទសវត្សរ៍នៃឧត្តមភាព និងលើសពីនេះ” ដែលមានអ្នកសារព័ត៌មានចូលរួម មកពីប្រទេសជាសមាជិកចំនួន៣៧ប្រទេស នៅទូទាំងពិភពលោក និងដៃគូកិច្ចសហប្រតិបត្តិការ ព្រមទាំងអង្គការអន្តរជាតិ ដែលចូលរួមជាមួយប្រព័ន្ធផ្សព្វផ្សាយផងដែរ៕
