ដោយ វុត្ថា
ភ្នំពេញៈ រដ្ឋាភិបាលតាមរយៈក្រសួងសាធារណៈការ និងដឹកជញ្ជូនបាននឹងកំពុងសិក្សាហេដ្ឋានដឹកជញ្ជូនធំៗចំនួន ៣ ដើម្បីឆ្លើយតបទៅនឹងការឡើងនៃការដឹកជញ្ជូនទំនិញ ការធ្វើចរាចរណ៍ និងកំណើនសេដ្ឋកិច្ចកម្ពុជា។
លោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូនបានឱ្យដឹងនៅក្នុងពិធីបើកការដ្ឋានជួសជុលផ្លូវខេត្តចំនួនពីរខ្សែ គឺផ្លូវលេខ១៤៦បេប្រវែង៣៥៨០ម៉ែត្រ និងផ្លូវលេខ១៤៨ ប្រវែង២៣២០ម៉ែត្រ ដោយក្រាលកៅស៊ូ DBST នៅខេត្តព្រះសីហនុ នៅថ្ងៃទី២០ ខែសីហា ឆ្នាំ ២០១៩ នេះថា ហេដ្ឋារចនាសម្ព័ន្ធធំៗដែលក្រសួងបាននឹងកំពុងសិក្សារួមមាន ផ្លូវក្រវាត់ក្រុងទី៤ ផ្លូវក្រវ៉ាត់ក្រុងសៀមរាប និងពង្រីកកំពង់ផែស្វាយ័តក្រុងព្រះសីហនុដើម្បីឱ្យកាប៉ាល់ធំៗអាចចុះចតបាន។
-->
លោកស៊ុន ចាន់ថុលបន្តថា ការសិក្សាហេដ្ឋារចនាសម្ព័ន្ធនាពេលនេះ ក្នុងការត្រៀមអនុវត្តនាពេលខាងមុខដ៏ខ្លី ដើម្បីឱ្យតម្លៃនៃការដឹកជញ្ជូននៅកម្ពុជាមានតម្លៃថោក ដោយសារតម្លៃដឹកជញ្ជូននៅកម្ពុជា នាពេលបច្ចុប្បន្ននេះមានតម្លៃថ្លៃ ហើយមានការចំណាយពេលយូក្នុងការដឹកជញ្ជូន និងថវិការច្រើនលើបញ្ហានេះ។
លោកបន្តថា ដូច្នេះហើយបានរដ្ឋាភិបាលបានស្វែងរកថវិកា និងនិតិវិធីដើម្បីកាត់បន្ថយទាំងការចំណាយថវិកា និងពេលវេលាដើម្បីឱ្យការដឹកទំនិញរបស់កម្ពុជាអាចទៅយកទៅលក់នៅក្រៅប្រទេសឱ្យបានទាន់ពេលវេលា។
លោកស៊ុន ចាន់ថុលបានបន្ថែមថា មានទំនិញខ្លះមិនបានឡើងលើកាប៉ាល់ទេ ហើយកាប៉ាលចេញចោល ដោយសារតែរថយន្តដឹកទំនិញមានការកកស្ទះ មិនបានទៅទាន់ពេលវេលា ហើយនេះគឺជាការខាតបង់ថវិការជាតិយ៉ាងច្រើនសន្ធឹកសន្ធាប់ ។ ដូច្នេះ ហើយបានជារដ្ឋាភិបាល ខិតខំប្រឹងប្រែងស្វែងរកថវិកាទាំងកម្ចី និងជំនួយពីបរទេសដើម្បីយកមកកសាងហេដ្ឋារចនាសម្ព័ន្ធនា នៅកម្ពុជាអោយល្អមួយកម្រិតថែមទៀត។
ក្រៅពីនេះ រដ្ឋាភិបាលតាមរយៈក្រសួងសាធារណៈការ និងដឹកជញ្ជូនបាននឹងកំពុងជុសជួល និងស្តារឡើងវិញ និងត្រៀមសម្ពោធកសាង់ផ្លូវសំខាន់នានា នៅទូទាំងប្រទេសកម្ពុជាឱ្យមានភាពល្អប្រសើរឡើង ដើម្បីឆ្លើយតបទៅនឹងកាត់បន្ថយការកកស្ទះ និងគ្រោះថ្នាក់ចរាចរណ៍ រួមជាមួយការដឹកជញ្ជូនទំនិញកាន់តែលឿនមួយកម្រិតទៀត៕
