ដោយ ម៉ាណេត
ភ្នំពេញៈ ខណៈតម្រូវការលំនៅដ្ឋានតម្លៃសមរម្យកំពុងមានកំនើន សាលារាជធានីភ្នំពេញ បានស្នើសុំក្រុមអ្នកជំនួញជនជាតិចិនមួយក្រុម ធ្វើការវិនិយោគលើគម្រោងលំនៅដ្ឋានដែលមានតំលៃសមរម្យ ដោយផ្តល់លទ្ធិភាពទិញដល់មន្រ្តីរាជការ និងប្រជាជនដែលមានប្រាក់ចំណូលទាប។
លោកឃួង ស្រេង អភិបាលរាជធានីភ្នំពេញ បានប្រាប់ទៅសមាគមធុរកិច្ច World Hakka Business Association ដែលដឹកនាំដោយលោកលី Kam Chung នៅក្នុងកិច្ចប្រជុំមួយកាលពីថ្ងៃអង្គារនេះថា គម្រោងនេះនឹងមានការគាំទ្រពីសាលារាជធានី។លោកបានបន្តថា គម្រោងលំនៅដ្ឋានតម្លៃសមរម្យ នឹងមានទីតាំងស្ថិតនៅជាយក្រុងភ្នំពេញដែលអាចចំណាយពេល៤៥ នាទីទៅ១ម៉ោងពីកណ្តាលក្រុង។
-->
លោកបានមានប្រសាសន៍ថា “ប្រសិនបើសមាគមយល់ព្រមលើគំរោងនេះ សាលារាជធានីភ្នំពេញនឹងស្នើសុំរដ្ឋាភិបាល ជួយដល់វិនិយោគិនក្នុងការនាំចូលសម្ភារសំណង់ដោយមិនបង់ពន្ធ” ។លោកបន្តថា គម្រោងនេះនឹងមានចម្ងាយពី៥០ទៅ៦០គីឡូម៉ែត្រពីទីក្រុង”។
លោក ម៉េត មាសភក្ដី អ្នកនាំពាក្យសាលារាជធានីភ្នំពេញ មិនអាចទាក់ទងសម្រាប់ការព័ត៌មានបន្ថែមអំពីគម្រោងនេះបានទេ។
នាយិកកាប្រចាំប្រទេសនៃក្រុមហ៊ុន CBRE Cambodia អ្នកនាង អាន សុធីតាបានថ្លែងកាលពីពេលថ្មីៗនេះថា ទីផ្សារលំនៅដ្ឋានសម្រាប់ប្រជាជន មានប្រាក់ចំណូលទាបកំពុងទទួលបានជោគជ័យ ដោយសារទីផ្សារលំនៅដ្ឋានតម្លៃខ្ពស់ ហាក់មានការពិបាកលក់បន្តិច ដោយសារអ្នកមានប្រាក់បានទិញផ្ទះបានអស់ហើយ ហេតុនេះទីផ្សារបានងាកទៅកាន់ប្រជាជនមានប្រាក់ចំណូលមធម្យម ដែលមានចំនួនច្រើនជាងគេ ហើយការវិនិយោគសំដៅលើប្រជាជនក្រុមនេះ នឹងទទួលបានជោគជ័យ។
លោកបន្តថា “ទីផ្សារលំនៅដ្ឋានតម្លៃចាប់ពី២ ទៅ៣ម៉ឺនដុល្លារ កំពុងលក់ដាច់ខ្លាំង ហើយនេះជានិន្នាការទីផ្សារ ដែលអ្នកវិនិយោគនានាបានចាប់ផ្តើមចាប់អារម្មណ៍”។
ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា លោកឧកញ៉ាលី ហួរ បានមានប្រសាសន៍ថា ការលក់លំនៅដ្ឋានតម្លៃខ្ពស់ ហាក់មានភាពយឺតយ៉ាវបន្តិចនាពេលនេះ ប៉ុន្តែមិនលំបាកខ្លាំងនោះទេ។ ផ្ទុយទៅវិញលំនៅដ្ឋានតម្លៃមធ្យម មានការលក់ដាច់ខ្លាំង ដោយសារនិន្នាការទីផ្សារបានងាក រកប្រជាជនមានជីវភាពមធម្យម ដែលកំពុងកើនឡើងនៅកម្ពុជា ស្របពេលកម្ពុជាមានសុខសន្តិភាព និងកំនើនសេដ្ឋកិច្ចល្អប្រសើរ៕
អានអត្ថបទ៖ ដំណឹងល្អ! រដ្ឋបាលរាជធានីភ្នំពេញគ្រោងសាងសង់ស្ពានអាកាសថ្មើជើងចំនួន ២ បន្ថែមទៀត
