ដោយ ៖ រ៉ាណេត
ប៉ោយប៉ែត ៖ ភ្ជាប់ទៅនឹងកំណើននៃចំនួនប្រជាសាស្ត្រដែលកំពុងកើនឡើងឥតឈប់ឈ ខណៈដែលសេដ្ឋកិច្ចក្នុងតំបន់កំពុងតែរីកចម្រើនយ៉ាងលឿន នៅពេលដ៏ខ្លីខាងមុខនេះ វត្តមានផ្សារទំនើបធំៗដ៏ល្បីឈ្មោះចំនួន៣ ដែលមានប្រភពដើមនៅក្នុងប្រទេសថៃ នឹងបង្ហាញខ្លួននៅក្រុងប៉ោយប៉ែត។
នៅបច្ចុប្បន្ននេះ គម្រោងវិនិយោគផ្សារទំនើបធំៗលំដាប់អន្តរជាតិចំនួន២ទៀតដែលមានប្រភពដើមនៅក្នុងប្រទេសថៃ បាន និងកំពុងសិក្សាពីទីតាំងគ្រោងមកបណ្តាក់ទុនវិនិយោគនៅក្នុងក្រុងប៉ោយប៉ែតបន្ថែមពីផ្សារទំនើប Big C ដែលកំពុងត្រៀមបើកដំណើរការនៅក្នុងអំឡុងខែវិច្ឆិកា ចុងឆ្នាំ២០១៩ខាងមុខនេះ ។
ប្រធានក្រុមប្រឹក្សាភិបាលនៃក្រុមហ៊ុន Four stars plus Four លោក សួង សុខហ៊ាង ដែលបានធ្វើការជិតស្និទ្ធជាមួយអ្នកវិនិយោគថៃ ទៅលើគម្រោងអភិវឌ្ឍផ្សារទំនើប Big C បានប្រាប់តាមទូរស័ព្ទថា ចំពោះដំណឹងនៃការចូលខ្លួនវិនិយោគបន្ថែមពីសំណាក់ក្រុមហ៊ុនអភិវឌ្ឍផ្សារទំនើបមកពីប្រទេសថៃ លោកពិតជាធ្លាប់ឮគេនិយាយដូចជាការលើកឡើងខាងលើមែន ប៉ុន្តែមិនច្បាស់ត្រង់ថានឹងទៅដាក់ទីតាំងនៅកន្លែងណាឱ្យប្រាកដ។
លោកបានបន្តថា “កាលពីពេលថ្មីៗនេះ មានអ្នកជំនាញខាងអភិវឌ្ឍផ្សារទំនើបដ៏ល្បីឈ្មោះប្រចាំនៅប្រទេសថៃឈ្មោះ Star Plaza ចុះមកសិក្សាពីលទ្ធភាពក្នុងការវិនិយោគម្ដងជាពីរដងរួចមកហើយ ប៉ុន្តែនៅមិនទាន់ច្បាស់ការណ៍ថា នឹងចូលមកវិនិយោគពេលណាប្រាកដនោះទេ គ្រាន់តែដឹងថា ទំហំ និងទីតាំងដែលត្រូវធ្វើគឺធំជាងផ្សារទំនើប Big C ប្រមាណជិត៣ដង”។
លោកបានបន្តទៀតថា “បើតាមខ្ញុំដឹង ក្រៅពីគម្រោងផ្សារទំនើបដ៏ធំប្រចាំប្រទេសថៃឈ្មោះ Star Plaza ក៏មានគម្រោងផ្សារ Macro ផងដែរ ដែលធ្លាប់មកសិក្សាទីតាំងនៅទល់មុខផ្សារទំនើប Big C ផងដែរ”។
លោក សួង សុខហ៊ាង បានបញ្ជាក់ថា វាមិនមានអ្វីចម្លែកនោះទេ ដែលមានគម្រោងផ្សារទំនើបមកកាន់ក្រុងប៉ោយប៉ែត ព្រោះបច្ចុប្បន្ននេះកំណើនមនុស្សដែលមករស់នៅ និងធ្វើអាជីវកម្មមានការកើនឡើងច្រើន ជាពិសេសអ្នកវិនិយោគជនជាតិចិនតែម្ដង។ អ្នកជំនាញផ្នែកស្រាវជ្រាវក្រុមហ៊ុនអន្តរជាតិ CBRE Cambodia កញ្ញា គឹម គិនកេសា បានបង្ហាញពីក្ដីសាទរជាមួយនឹងដំណឹងនៃគម្រោងផ្សារទំនើបទាំងអស់នេះ។
កញ្ញាបានបញ្ជាក់ថា “វាជារឿងល្អសម្រាប់ក្រុងប៉ោយប៉ែត ដែលវត្តមានផ្សារទំនើបទាំងអស់នេះនឹងជួយធ្វើឱ្យទីក្រុងទី២មួយមានភាពស៊ីវិល័យ និងទាក់ទាញការវិនិយោគកាន់ច្រើនចូលបន្ថែមទៀត”។ កញ្ញាបានបន្តទៀតថា “ប៉ោយប៉ែតពេលនេះបានប្រមូលផ្តុំទៅមនុស្សជាច្រើន ជាពិសេសបណ្តាអ្នកជំនួញអន្តរជាតិតែម្ដង ហើយកំណើនសេដ្ឋកិច្ចក្នុងតំបន់ក៏មានភាពល្អប្រសើរ ដូច្នេះផ្សារទំនើបទាំងនេះគឺជាតម្រូវការរបស់ពួកគាត់”។
កញ្ញាបានបន្តទៀតថា “បើទោះក្រុងប៉ោយប៉ែតមានផ្សារទំនើបចំនួន៣ស្ថិតនៅបណ្តុំគ្នាក៏ដោយវាមិនមែនជាបញ្ហាប្រឈមនោះទេ សំខាន់គឺប្រភេទនៃការផ្គត់ផ្គង់ខុសប្លែកពីគ្នា ចៀសវាងការប្រកួតប្រជែងដណ្ដើមចំណែកអតិថិជន ហើយខ្ញុំជឿថា អ្នកជំនួញក៏គិតពីបញ្ហានៃការប្រកួតប្រជែងនេះដែរ” ៕
