ដោយ វុត្ថា
ភ្នំពេញ៖ រដ្ឋបាលក្រុងភ្នំពេញសហការជាមួយទីភ្នាក់ងារសហប្រតិបត្តិការអន្តរជាតិជប៉ុន (JICA) បានដាក់ឱ្យដំណើរជាផ្លូវការនូវម៉ាស៊ីនខួងក្រោមដីដាក់លូលើកដំបូង និងប្រើប្រាស់បច្ចេកវិទ្យាទំនើបដោយមិនចាំបាច់ជីកកាត់ថ្នល់ សួនច្បារ និងមិនប៉ះពាល់ចរាចរលើដងផ្លូវឡើយ។
លោក សុំា ពិសិដ្ឋ ប្រធានមន្ទីរសាធារណៈការ និងដឹកជញ្ជូរាជធានីភ្នំពេញបានឱ្យដឹងនៅថ្ងៃទី ១០ ខែកញ្ញាឆ្នាំ ២០១៩ នេះថា គម្រោងការពារទឹកជំនន់ និងកែលំអប្រឡាយលូក្នុងរាជធានីភ្នំពេញ ជំហានទី៤ ជាជំនួយឥតសំណងរបស់ប្រទេសជប៉ុន បាននាំបច្ចេកវិទ្យាថ្មីដោយប្រើប្រាស់ម៉ាស៊ីនខួងក្រោមដីស្វ័យប្រវត្តិដាក់លូទំហំ ៨០០មម ប្រវែង ១៥៦០ម ខួងក្នុងជំរៅ ៨ម ចាប់ពីអាងក្រោមដីសួនច្បារក្រុមប្រឹក្សាអភិវឌ្ឍន៍កម្ពុជារត់ក្រោមវិថីព្រះស៊ីសុវត្ថិ ផ្លូវលេខ ៤៧ ឆ្លងកាត់សួនច្បារកួចកាណុង និងផ្លូវលេខ ៧០ ក្នុងខណ្ឌដូនពេញ ។
លោកបន្តថា ការសម្ពោធដាក់អោយដំណើរការប្រពន្ធ័បច្ចេកវិទ្យាថ្មីដែលមិនធ្លាប់មានពីមុន នោះគឺការប្រើប្រាស់គ្រឿងចក្រមុជក្នុងដីក្នុងជម្រៅ៨ម៉ែត្រ ដាក់ប្រពន្ធ័លូប្រភេទថ្មីទំនើបនិងស្វ័យប្រវត្តិដោយមិនបាច់ប្រើមនុស្ស និងមិនរំខានដល់ការធ្វើដំណើរដល់ប្រជាពលរដ្ឋឡើយ ។
លោកបន្តថា “ចំពោះការខួងដីជែក ឃីង ដាក់លូ ជាស្វ័យប្រវត្តិនេះ យើងគ្រោងនឹងខួងក្រោមដីចម្ងាយប្រវែង១៥៦០ម៉ែត្រ ក្នុងជម្រៅក្រោមដី ៨ម៉ែត្រដោយខួងចាប់ចេញពីមុខស៊ីឌីស៊ីរហូតដល់ផ្លូវលេខ៧០ (ទំនប់ទួលគោក) កាត់ក្រោមរង្វង់មូលគួចកាណុង ។
គម្រោងនេះក្នុងដំណាក់កាលទី១ មាន ប្រវែង៥០០ម៉ែត្រ ដោយប្រើប្រាស់រយៈពេល៥ខែ”។ លោកសាំ ពិសិដ្ឋបានបញ្ជាក់ឲ្យដឹងទៀតថា ការប្រើប្រាស់បច្ចេកវិជ្ជាថ្មីមួយនេះវាមិនរំខានទៅដល់ការកកស្ទះចរាចរណ៍ និងប៉ះពាល់ដល់ហេដ្ឋារចនាសម្ព័ន្ធនានា ព្រោះវាខួងនៅក្រោមដីជម្រៅរហូតដល់៨ម៉ែត្រ ហើយនេះក៏ជាគម្រោងការពារទឹកជំនន់និងកែលម្អប្រព័ន្ធប្រឡាយលូ ក្នុងរាជធានីភ្នំពេញជំហានទី៤ផងដែរ ។
លោកបញ្ជាក់ផងដែរថា ម្ចាស់គម្រោងនេះ រដ្ឋបាលរាជធានីភ្នំពេញ អ្នកអនុវត្តគម្រោង មន្ទីរសាធារណការ និងដឹកជញ្ជូនរាជធានីភ្នំពេញ ទីប្រឹក្សាបច្ចេកទេស ក្រុមហ៊ុនស៊ីធីអាយវិស្វកម្មអន្តរជាតិ និងក្រុមហ៊ុនម៉ៅការសាងសង់ ក្រុមហ៊ុនសំណង់ ភូអាខបភើរេសិន។
គម្រោងការពារទឹកជំនន់ និងកែលំអប្រព័ន្ធប្រឡាយលូក្នុងរាជធានីភ្នំពេញ ជំហានទី៤ នេះ មានទឹកប្រាក់សរុបប្រមាណ ៣០លានដុល្លារអាមេរិក ដែលជាជំនួយឥតសំណងរបស់រដ្ឋាភិបាលជប៉ុនតាមរយៈទីភ្នាក់ងារសហប្រតិបត្តិការអន្តរជាតិជប៉ុន JICA ។
គម្រោងនេះនឹងត្រូវអនុវត្តការដ្ឋាន ដូចខាងក្រោម ក្នុងនោះរួមមាន៖
១-ដាក់បណ្តាញលូមេ នៅក្នុងភូមិសាស្ត្រខណ្ឌទួលគោក ប្រវែង ៨.២គីឡូម៉ែត្រ។
២-ដាក់បណ្តាញលូមេ នៅក្នុងភូមិសាស្ត្រខណ្ឌដូនពេញ ប្រវែង ៤.៤គីឡូម៉ែត្រ។
៣-សាងសង់អាងស្តុកទឹកក្រោមដី និងសាងសង់ស្ថានីយ៍បូមទឹក នៅសួនច្បារមុខក្រុមប្រឹក្សាអភិវឌ្ឍន៍កម្ពុជា CDC។
៤-តម្លើងរបាមេកានិចស្វ័យប្រវត្តិ ដើម្បីប្រមូលសំរាមនៅមុខផ្លូវបង្ហូរទឹកនៅស្ថានីយ៍បូមទឹកចតុមុខ ព្រះគន្លង់១ ព្រះគន្លង់២ និងផ្សារចាស់។
៥-ផ្តល់រថយន្តបូមទឹកចល័ត ចំនួន ២គ្រឿង៕
