ដោយ វុត្ថា
ភ្នំពេញ៖ ក្រុងព្រះសីហនុ ក្នុងរយៈពេលប៉ុន្មានឆ្នាំកន្លងមកនេះ មានការទាក់ទាញលើការវិនិយោគផ្សារទំនើបៗជាច្រើន ដើម្បីឆ្លើយតបទៅនឹងតម្រូវការទីផ្សារនាពេលបច្ចុបប្បន្ន មិនចាញ់ទីក្រុងភ្នំពេញ និងបណ្តាលខេត្ត-ក្រុងនានាឡើយ។
លោកឃាង ភារម្យ អ្នកនាំពាក្យរដ្ឋបាលសាលាខេត្ដព្រះសីហនុ បានឱ្យដឹងតាមទូរស័ព្ទនៅថ្ងៃទី២៣ ខែកញ្ញា ឆ្នាំ ២០១៩នេះថា បច្ចុប្បន្ននេះ ក្រុងព្រះសីហនុមានផ្សារទំនើបដែលមានម្ចាស់ និងគ្រប់គ្រងដោយខ្មែរមាន Orange Mall និង Lemon Mall ជាដើម និងមានផ្សារទំនើបដែលគ្រប់គ្រងដោយរបរទេស ហើយគ្រោងនឹងសាងសង់ផ្សារទំនើបធំៗមានចំនួន៣កន្លែងថែមទៀត។
-->
ជាមួយគ្នានេះផ្សារទំនើបខ្នាតអន្តរជាតិថ្មីមួយ FURI Times Square នឹងបើកដំណើរការនៅកំឡុងចុងឆ្នាំនេះផងដែរ។ ផ្សារទំនើបនេះវិនិយោគក្នុងទឹកប្រាក់ជាង៩លានដុល្លារអាមេរិក ដោយនាំទៅជាមួយនូវផលិតផលល្បីៗជាច្រើន ដើម្បីឆ្លើយតបសេចក្តីត្រូវការរបស់ប្រជាពលរដ្ឋ។
នាយកគ្រប់គ្រងផ្នែកទីតាំងជួលផ្សារទំនើប FURI Times Square លោក កង ដាវីត បានប្រាប់ឱ្យដឹងកាលពីពេលថ្មីៗនេះថា ដោយសារតែមានកំណើននៃការវិនិយោគជាច្រើនគម្រោងលើគ្រប់វិស័យ បានធ្វើឱ្យខេត្តព្រះសីហនុមានការអភិវឌ្ឍយ៉ាងឆាប់រហ័សលើសការរំពឹងទុក។
លោកបានបន្តទៀតថា “កំណើននៃការវិនិយោគ បានធ្វើឱ្យប្រជាជនចូលមករស់នៅ និងប្រកបការងារនៅក្នុងខេត្តមួយនេះកាន់តែច្រើន ជាពិសេសកំណើននៃចំនួនភ្ញៀវទេសចរ ដែលកាន់តែធ្វើឱ្យអំណាចនៃការទិញកាន់ តែមានទំហំធំ”។លោកបន្តទៀតថា “តាមការពិនិត្យឃើញជាក់ស្ដែង បច្ចុប្បន្ននេះ នៅក្នុងខេត្តព្រះសីហនុ មានមណ្ឌលលក់ទំនិញបែបទំនើបមានចំនួនតិចនៅឡើយ ខណៈដែលតម្រូវការរបស់អតិថិជន ដែលមានជីវភាពកម្រិតមធ្យមមានចំនួនច្រើន”។
ដោយសារតែមើលឃើញសក្ដានុពលលើការផ្គត់ផ្គង់ខាងលើនេះ មានក្រុមហ៊ុនធំៗជាច្រើនដែលសុទ្ធតែមានកេរ្តិ៍ឈ្មោះល្បីល្បាញ លំដាប់អន្តរជាតិបានបង្ហាញខ្លួនព្រោងព្រាត ជាមួយនឹងក្ដីរំពឹងថា អាចទទួលបានចំណែកទីផ្សារប្រកបដោយភាពជោគជ័យ។
លោកកង ដាវីតបានបន្តទៀតថា “តាមរយៈផ្សារទំនើបដ៏ធំ ដែលទើបតែមានលើកដំបូងគេបង្អស់នៅក្នុងខេត្តព្រះសីហនុ FURI Times Square មានក្រុមហ៊ុនលំដាប់អន្តរជាតិស្ទើរគ្រប់វិស័យបានបង្ហាញវត្តមាននៅក្នុងខេត្តមួយនេះ រួមមានដូចជា ក្រុមហ៊ុន KFC , ក្រុមហ៊ុន Starbucks, ក្រុមហ៊ុន Amazone Café , ក្រុមហ៊ុន KOI , ក្រុមហ៊ុន Dakasi Tea, ក្រុមហ៊ុនលក់សម្លៀកបំពាក់ LEVI’s , ក្រុមហ៊ុន NIKE , ក្រុមហ៊ុន Samsonite, ក្រុមហ៊ុននាឡិកាដ៏ល្បីឈ្មោះ G-Shock, ក្រុមហ៊ុនលក់រថយន្ត HGB Group រួមជាមួយក្រុមហ៊ុនល្បីៗជាច្រើនទៀត”។
ក្រៅពីនោះក៏មានផ្សារទំនើបមួយចំនួនទៀត បាននឹងកំពុងរៀបចំតុបតែង និងកែលម្អដែលគ្រោង នឹងដាក់ឱ្យដំណើរការឆាប់ៗ នាពេលខាងមុខនេះ និងមួយចំនួនទៀតបាននឹងកំពុងបុកគ្រឹះសាងសង់។ សម្រាប់ទីផ្សារនៅក្នុងក្រុងព្រះសីហនុ ដែលមានផ្សារទំនើបច្រើនបែបនេះ ដែលមានចំនួន៥ ទៅ៦កន្លែងបែបនេះ គឺមានទំហំធំ។
លោកឃាង ភារម្យបានបន្ថែមថា ទាំងប្រជាពលរដ្ឋនៅក្នុងក្រុង និងចំណាកស្រុកបាននឹងកំពុងមានជីវភាពធូធាឆ្ងាយ បើធៀបទៅនឹងបណ្តាឆ្នាំមុនៗ ដែលអាចឆ្លើបត និងអាចទទួលយកបាននូវការរីកចំរើន លើវិស័យផ្សារទំនើបនៅក្នុងក្រុងទាំងមូល។ តែយ៉ាងណាក៏មានប្រជាពលរដ្ឋចំណាកស្រុក ក្នុងកម្រិតមួយភាគតូច បាននិងកំពុងរងផលប៉ះពាល់ខ្លះដែរ ដោយសារតែពួកគាត់ជួលអាគារ ឬផ្ទះសម្រាប់ប្រកបមុខរបររកស៊ី ព្រោះតម្លៃអចលនទ្រព្យមានការកើនឡើងខ្ពស់។
ផ្អែកទៅលើកត្តារីកចំរើនទាំងនេះ បានធ្វើឱ្យលំហូចូលប្រជាពលរដ្ឋមកពីបណ្តាខេត្តផ្សេងៗមកធ្វើការងារ និងប្រកបមុខរបរផ្សេងៗទៅតាមជំនាញរបស់ខ្លួន។
សម្រាប់វិស័យសំណង់នៅក្នុងខេត្តព្រះសីហនុ មានសន្ទុះរីកចម្រើនយ៉ាងគំហុក ក្នុងរយៈពេលប៉ុន្មានឆ្នាំកន្លងមកនេះ ដោយគិតចាប់ពីឆ្នាំ២០០៧ រហូតដល់ខែកក្កដា ឆ្នាំ ២០១៩ មានសំណង់ដែលទទួលបានលិខិតអនុញ្ញាតសាងសង់ចំនួន៨១៩គម្រោង ក្នុងនោះអគាររាប់ពីកំពស់៥ជាន់ ឡើងដល់៤០ជាន់មាន២១៨គម្រោង៕
