ដោយ ស៊ីវ ម៉េង
ភ្នំពេញ៖ តំបន់ស្វាយជ្រុំ កន្លែងដែលរដ្ឋាភិបាលគ្រោងសាងសង់ស្ពានទៅកាន់តំបន់នេះ កំពុងស្ថិតក្នុងក្រសែភ្នែកអ្នកវិនិយោគ ដែលធ្វើឲ្យតំលៃដីធ្លីនៅតំបន់នេះបានចាប់កញ្រ្ជោលឡើងយ៉ាងខ្លាំង ដោយសារភូមិសាស្រ្តតំបន់នេះ និងហេដ្ឋារចនាសម្ព័ន្ឋដែលគ្រោងឡើងនាពេលអនាគត។
លោកឧកញ៉ានួន រិទ្ឋី អគ្គនាយកក្រុមហ៊ុន Khmer Foundation Appraisal បានថ្លែងឲ្យដឹងតាមទូរស័ព្ទកាលពីពេលថ្មីៗនេះថា តំបន់នេះនឹងមានអនាគតល្អ ដោយសារទីតាំងនេះ មានភូមិសាស្រ្តស្ថិតនៅកៀករាជធានីភ្នំពេញ និងមានបរិស្ថានល្អ ព្រោះមានទន្លេចំនួនពីរអមសងខាង ដែលធ្វើឲ្យអាកាសធាតុតំបន់នេះមានសំណើមល្អ។ លោកបន្តថា ដោយសារមានដងទន្លេ និងជាតំបន់ដែលមានប្រជាពលរដ្ឋរស់នៅច្រើន និងហេដ្ឋារចនាសម្ព័ន្ឋល្អ ពិសេសគំរោងសាងសង់ស្ពានទៅតំបន់នេះ ពិតជាសសៃឈាមមួយ ដែលរួមចំណែកលើកស្ទួយការអភិវឌ្ឍតំបន់នេះនាពេលអនាគត។
-->
លោកបន្តថា “ក្រោយពេលរដ្ឋាភិបាលភ្ជាប់ស្ពានទៅកាន់តំបន់នេះ តំបន់នេះនឹងមានសក្តានុពលខ្លាំង ហើយតំលៃដីនឹងកើនឡើងបន្ថែមទៀត”។
លោកឧកញ៉ានួន រិទ្ឋីបានបន្តថា តំបន់ស្វាយជ្រុំមានចម្ងាយពីរគីឡូម៉ែត្រប៉ុណ្ណោះបើគិតពីវិមានឯករាជ្យ និងមានចម្ងាយប្រមាណ៥គីឡូម៉ែត្រពីវត្តភ្នំ ដូច្នេះវាស្ថិតនៅចម្ងាយជិតទីប្រជុំជនក្រុង ដែលធ្វើឲ្យមានភាពទាក់ទាញដល់អ្នកវិនិយោគនិងប្រជាពលរដ្ឋចូលទៅរស់នៅតំបន់នេះ។
តំបន់ស្វាយជ្រុំ ស្ថិតក្នុងឃុំស្វាយជ្រុំ ស្រុកខ្សាច់កណ្តាល ខេត្តកណ្តាល ជាតំបន់ ដែលស្ថិតក្នុងផែនការកាត់បញ្ចូលក្នុងទីក្រុង ផែនការអភិវឌ្ឍន៍ទីក្រុងនាពេលអនាគត។
នាយកប្រតិបត្តិក្រុមហ៊ុន Focus Property លោកប៉ូ អ៊ាវគង់ បានថ្លែងថា ប្រសិនជាមានស្ពានភ្ជាប់ទៅកាន់តំបន់នេះ នឹងធ្វើឲ្យតំលៃដីធ្លីកើនឡើងបន្ថែមទៀត ព្រោះតំបន់នេះមានបរិស្ថានល្អ ដូច្នេះការអភិវឌ្ឍន៍តំបន់នេះយឺតឬលឿន អាស្រ័យលើពេលវេលា និងការរៀបចំហេដ្ឋារចនាសម្ព័ន្ឋនៅតំបន់នេះ។
លោកបន្តថា “បរិយាកាស ភូមិសាស្រ្តតំបន់នេះពិតជាល្អ តែអ្វីដែលខ្វះខាតនាពេលនេះគឺហេដ្ឋារចនាសម្ព័ន្ឋ មិនទាន់មានការអភិវឌ្ឍន៍បានគ្រប់គ្រាន់នៅឡើយ”។ លោកបន្តថា “ពេលនេះអ្នកវិនិយោគក្នុង និងក្រៅប្រទេសកំពុងស្ថិតក្នុងដំណាក់កាលរង់ចាំ”។
អ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាបានមានប្រសាសន៍ឲ្យដឹងតាមទូរស័ព្ទថា ការសាងសង់ផ្លូវក្រវ៉ាត់ក្រុងទី៣ កំពុងដំណើរការមួយកំណាត់ ហើយបច្ចុប្បន្នក្រុមហ៊ុនចិនបាន និងកំពុងសិក្សាពីជម្រើសចំនួនពីរទៀតនៃផ្លូវនេះ ទី១ នៅត្រើយខាងកើតទន្លេមេគង្គ ដោយនឹងសាងសង់ស្ពានចំនួន១នៅក្តៅតាកុយ ទៅកាន់តំបន់អរិយក្សត្រ និងស្ពានមួយទៀតសាងសង់នៅតំបន់ស្វាយជ្រុំ ភ្ជាប់មកមកកាន់តំបន់ផ្លូវជាតិលេខ៦អា។
ជម្រើសទី២ គឺសាងសង់ស្ពានចេញពីតំបន់គគី ក្នុងស្រុកកៀនស្វាយ (តំបន់កំពង់ផែស្វយ័ត្នភ្នំពេញ) ភ្ជាប់មកតំបន់វិហារសួគ៌ ឬ 7NG ហើយអូសកាត់តំបន់លិចទឹកនៅល្វាឯម និងសាងសង់ស្ពានមួយទៀតកាត់នៅលើកោះដាច់ ហើយភ្ជាប់មកកាន់មហាវិថីឈ្នះ ឈ្នះ (ផ្លូវទំនប់កប់ស្រូវ)៕
