ដោយ វុត្ថា
ភ្នំពេញៈ រដ្ឋាភិបាលតាមបានអនុញ្ញាតឱ្យមានការសងសង់ នូវគម្រោងសណ្ឋាគារ និងរីហ្សត ស៊ីប៊្រីស (Sea Breeze Hotel and Resort)លើផ្ទៃដីទំហំ ៥.២២៤ម៉ែត្រការ៉េ ដែលមានទីតាំងស្ថិតនៅភូមិ៦ សង្កាត់លេខ៤ ក្រុងព្រះសីហនុ ខេត្តព្រះសីហនុ។
ម្ចាស់ទុនវិនិយោគលើសណ្ឋាគារ និងរីហ្សតនេះ ជាស្រ្តីជនខ្មែរឈ្មោះសោម រស្មី (ម្ចាស់គម្រោង) ដែលបានសិក្សា និងរៀបចំរបាយការណ៍វាយតម្លៃហេតុប៉ះពាល់បរិស្ថាន និងសង្គមដំបូង ដោយក្រុមហ៊ុនទីប្រឹក្សា អេស-ប៊ី-ខេ រីស៊ើច អេន ឌីវេឡុបមេន។
យោងតាមកិច្ចកិច្ចប្រជុំអន្តរក្រសួងស្តីពីការពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមដំបូង (IESIA) លើគម្រោងនេះ កាលពីថ្ងៃទី ១៦ ខែតុលា ឆ្នាំ ២០១៩ ម្សិលមិញនេះបានគាំទ្រទៅលើគម្រោងវិនិយោគនេះ និងម្ចាស់គម្រោងត្រូវគោរព ទៅតាមបទដ្ឋានបរិស្ថាន ក្នុងការរៀបចំអាងចម្រោះទឹកកខ្វក់ ដែលមានសមត្ថភាព គ្រប់គ្រាន់ក្នុងការសម្អាតសំណល់រាវចេញពីគម្រោង ដោយសមាមាត្រទៅនឹងបរិមាណប្រើប្រាស់ទឹក របស់គម្រោង។
អង្គប្រជុំក៏តម្រូវឱ្យម្ចាស់គម្រោងត្រូវរៀបចំតំបន់នេះ ឱ្យក្លាយទៅជាតំបន់មេត្រីភាពបរិស្ថាន ដោយកាត់បន្ថយការប្រើប្រាស់ថង់ប្លាស្ទិក និងត្រូវដាំដើមឈើ ឬរុក្ខជាតិលម្អរឱ្យបានច្រើន ដើម្បីលម្អសោភ័ណភាពនៅក្នុងតំបន់គម្រោង និងត្រូវគោរពវប្បធម៌ប្រពៃណី ទំនៀមទំលាប់ និងរំលេចរចនាបថខ្មែរទាំងក្នុង និងក្រៅអគារ។
របាយការណ៍របស់អាជ្ញាធរ ខេត្តព្រះសីហនុនេះ បានបង្ហាញឱ្យដឹងកាលពីពេលថ្មីៗនេះថា សណ្ឋាគារ និងផ្ទះសំណាក់ នៅខេត្តព្រះសីហនុ មានចំនួនជាង ១៥០កន្លែង ក្នុងនោះ គ្រប់គ្រង ដោយចិន មានជាង៩០% ខណៈដែលកាស៊ីណូមាន៦២កន្លែង គ្រប់គ្រងដោយចិនរហូតដល់៧៧%។
របាយការណ៍ពីក្រុមប្រឹក្សាអភិវឌ្ឍន៍កម្ពុជាឲ្យដឹងថា បើគិតចាប់ពីឆ្នាំ២០១៦ មកទល់នឹង ខែសីហា ឆ្នាំ២០១៩ ខេត្តព្រះសីហនុ ទទួលបានទុនវិនិយោគពីប្រទេសចិន២ពាន់លាន ដុល្លារអាមេរិកស្មើនឹង៨,៩% នៃទុនវិនិយោគសរុប៕
