ដោយៈ រ៉ាណេត
ភ្នំពេញៈ សម្ដេចតេជោ ហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជានឹងអញ្ជើញជាអធិបតី ក្នុងការបើកសម្ពោធការដ្ឋានសាងសង់ សមិទ្ធិផលសំខាន់ៗនៅក្នុងខេត្តជាប់សមុទ្រចំនួន២ ក្នុងខេត្តកំពត និងខេត្តព្រះសីហនុ។
សម្ដេចតេជោ ហ៊ុន សែននឹងសម្ពោធសមិទ្ធផលសំខាន់ៗចំនួនពីរនៅតាមបណ្តាខេត្តជាប់សមុទ្រនាចុងសប្តាហ៍នេះ
នៅព្រឹកថ្ងៃទី១៤ ខែវិច្ឆិកា ឆ្នាំ២០១៩ ស្អែកនេះ សម្ដេចតេជោហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នឹងអញ្ជើញសម្ពោធដាក់ឱ្យដំណើរការការដ្ឋានសាងសង់រោងចក្រផលិតស៊ីម៉ង់តិ៍ ថៃ ប៊ុនរ៉ុង ស្ថិតនៅក្នុងឃុំល្អាង ស្រុកដងទង់ ខេត្តកំពត។
ក្រុមហ៊ុន ថៃ ប៊ុនរ៉ុង បាវិនិយោគជាទឹកប្រាក់សរុបប្រមាណ១២០លានដុល្លារអាមេរិក សម្រាប់ការកសាងរោងចក្រស៊ីម៉ងតិ៍នេះ និងគម្រោងកំណែទម្រង់បច្ចេកវិទ្យាផលិតកម្ម ។ ខ្សែសង្វាក់ផលិកម្មថ្មីនេះ បំពាក់ទៅដោយបច្ចេកវិទ្យាទំនើប ដែលមានសមត្ថភាពផលិតស៊ីម៉ងតិ៍បានប្រមាណ៣០០០តោនក្នុងមួយថ្ងៃ ឬស្មើនឹងប្រមាណ២លានតោនក្នុង ១ឆ្នាំ និងផ្តល់ឪកាសការងារដល់ពលរដ្ឋកម្ពុជាបានចំនួន៣០០នាក់។
ជាមួយនឹងគម្រោងវិនិយោគមួយនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបង្ហាញពីការគាំទ្រ ហើយសម្ដេចក៏ធ្លាប់បានមានប្រសាសន៍កាលពីពេលកន្លងទៅថ្មីៗនេះថា រោងចក្រស៊ីម៉ង់តិ៍នៅកម្ពុជា នឹងចូលរួមចំណែកច្រើន ក្នុងការផ្គត់ផ្គង់សភារៈសំណង់ នៅកម្ពុជា និងកាត់បន្ថយការនាំចូលស៊ីម៉ងតិ៍មកពីបរទេស។
ដោយឡែកនៅត្រឹមថ្ងៃទី១៦ ខែវិច្ឆិកា នៃសប្ដាហ៍ដដែលនេះ សម្ដេចតេជោ ក៏នឹងអញ្ជើញចូលរួមជាអធិបតី នៅក្នុងពិធីសម្ពោធបើកគម្រោងស្ថាននា ផ្លូវចំនួន៣៤ខ្សែ នៅក្នុងខេត្តព្រះសីហនុផងដែរ ដើម្បីកែលម្អ និងស្ថាបនាហេដ្ឋារចនាសម្ព័ន្ធទូទាំងខេត្តឱ្យល្អប្រសើរ ស័ក្ដិសមទៅនឹងតំបន់ប៉ូលសេដ្ឋកិច្ចពិសេសប្រចាំប្រទេស ជាពិសេសរង់ចាំស្វាគមន៍ការចូលរួមចំណែកលើការអភិវឌ្ឍខេត្តព្រះសីហនុ ឱ្យក្លាយជាមជ្ឈមណ្ឌលសេដ្ឋកិច្ច និងពាណិជ្ជកម្មដ៏ទំនើប ដែលបានសន្យាដោយនាយករដ្ឋមន្ត្រីចិន កាលពីចុងសប្ដាហ៍កន្លងទៅនេះ។
គម្រោងស្ថាបនាផ្លូវទាំង៣៤ខ្សែ ក្នុងភូមិសាស្ត្រខេត្តព្រះសីហនុ នឹងចាប់ផ្តើមមអនុវត្តចាប់ពីថ្ងៃនេះតទៅ ដោយធ្វើទាំងថ្ងៃ ទាំងយប់ និងប្រើរយៈពេល៨ខែ ដោយមានក្រុមហ៊ុនទទួលម៉ៅការចំនួន៧ក្រុមហ៊ុន៕
