ដោយ វុត្ថា
ភ្នំពេញ៖ ពីមុនខ័ណ្ឌនេះ ត្រូវបានគេចាត់ទុកជាតំបន់លំនោដ្ឋានប៉ុណ្ណោះ ប៉ុន្តែរយៈពេល៣ទៅ៥ឆ្នាំចុងក្រោយនេះ ខ័ណ្ឌនេះបានប្រែក្លាយជាតំបន់ពាណិជ្ជកម្ម (CBD) ដោយសារគំរោងមជ្ឈមណ្ឌលពាណិជ្ជកម្មជាច្រើន បានឆ្ពោះទៅកាន់ខ័ណ្ឌមួយនេះ ពិសេសអាគារលំនៅដ្ឋានសហកម្មសិទ្ឋ ដែលបណ្តុំដោយលំនៅដ្ឋាន និងសេវាចម្រុះដ៏ស៊ីវិល័យ។
ហេតុអ្វីខ័ណ្ឌមួយនេះមានការរីកចម្រើន និងក្លាយជាមជ្ឈមណ្ឌលអភិវឌ្ឍន៍អាជីវកម្មចម្រុះ (CBD) លឿនបែបនេះ? លោកយិន លាងគង់អនុប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា បានមានប្រសាសន៍ឲ្យដឹងនាព្រឹកថ្ងៃទី១៤ វិច្ឆិកាកន្លងមកថា ការរីកចម្រើនរបស់ខ័ណ្ឌទួលគោក មិនមែនជារឿងចៃដន្យនោះទេ ប៉ុន្តែវាកើតចេញពីកត្តាអនុនោម័ត និងសត្យានុម័តជាច្រើន។
លោកបន្តថា តាមការសង្កេតនិងការយល់ឃើញរបស់ខ្ញុំ ការរីកចម្រើនរបស់ខ័ណ្ឌនេះ និងខ័ណ្ឌដទៃទៀត គឺដោយសារកត្តាសុខសន្តិភាព និងការដឹកនាំដ៏ត្រឹមត្រូវរបស់ប្រមុខរដ្ឋាភិបាលកម្ពុជា គឺសម្តេចតេជោហ៊ុន សែន”។
លោកបន្តថា ការរីកចម្រើនេះដោយសារកត្តារួមផ្សំជាច្រើន រួមមាន ទី១ ដោយសារខ័ណ្ឌនេះស្ថិតនៅជាប់នឹងខ័ណ្ឌ៧មករា ដែលមានការរីកចម្រើនមុន ទី២ ដោយសារកំនើនសេដ្ឋកិច្ច និងលំហូរវិនិយោគច្រើនពីបរទេស ទី៣ ដោយសារហេដ្ឋារចនាសម្ព័ន្ឋក្នុងខ័ណ្ឌនេះមានភាពល្អប្រសើរ ដោយសារផ្លូវជាច្រើនជាផ្លូវធំៗ និងជាតំបន់ថ្មីងាយស្រួលក្នុងការអភិវឌ្ឍ និងរៀបចំហេដ្ឋារចនាសម្ព័ន្ឋជាដើម។
អគ្គនាយកក្រុមហ៊ុអចលនទ្រព្យអន្តរជាតិ ERA លោកខន គង្គាបានមានប្រសាសន៍ឲ្យដឹងផងដែរថា ខ័ណ្ឌទួលគោកបានចាប់ផ្តើមរះឡើង ជាមួយវត្តមានខុនដូ អាគារពាណិជ្ជកម្មជាច្រើន ដែលធ្វើឲ្យតំបន់នេះ មានសក្តានុពលក្នុងការវិនិយោគ ជាពិសេសតំបន់នេះ វាចាប់ផ្តើមមានការរីចម្រើនទៅលើសហគមន៍ធំៗដូចជា គម្រោង Phnom Penh Center និង One Park ជាដើមទៅអភិវឌ្ឍន៍នៅក្នុងតំបន់នេះ។
លោកបន្តថា “ប្រជាពលរដ្ឋខ្មែរ ចាប់ផ្តើមមានការចាប់អារម្មណ៍ទិញខុនដូជាច្រើននាពេលបច្ចុប្បន្ននេះ ព្រោះការរស់នៅខុនដូរមានទាំងកន្លែងញាំម្ហូបអាហារ មជ្ឈមណ្ឌលកំសាន្តកុមារ កន្លែងលេងកីឡាហាត់ប្រាណលើគោក និងអាងហែលទឹកជាដើម”។
លោកគង្គាបានបន្តថា នៅពេលមានគម្រោងខុនដូ និងមជ្ឈមណ្ឌលពាណិជ្ជកម្មច្រើននៅក្នុងតំបន់ទួលគោកនេះ កាន់តែច្រើនបែបនេះ នឹងធ្វើឲ្យប្រជាពលរដ្ឋមករស់នៅ និងធ្វើពាណិជ្ជកម្មផ្សេងៗ ក្នុងដំបន់នេះកាន់តែច្រើន ហើយដីក៏មានតម្លៃថ្លៃផងដែរ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានឲ្យដឹងដែរថា សម្រាប់ទីផ្សារខុនដូនៅក្នុងតំបន់ទួលគោក កំពុងតែចាប់ផ្តើមផុលផុសហើយ ព្រោះប្រជាពលរដ្ឋខ្មែរចាប់ផ្តើមពេញពេញនិយម ចំពោះការរស់នៅក្នុងខុនដូហេតុនេះ ទើបយើងឃើញមានគំរោងខុនដូ និងមជ្ឈមណ្ឌលពាណិជ្ជកម្មជាច្រើនបានសាងសង់នៅតំបន់នេះ។
លោកបន្តថា តាមលោកសង្កេតឃើញបច្ចុប្បន្ន មានគំរោងខុនដូប្រមាណ២០កំពុងសាងសង់នៅតំបន់នេះ ហើយតម្លៃខុនដូបើគិតជាម៉ែត្រការ៉េ គឺមានតម្លៃចន្លោះពី១៨០០ដល់៣០០០ដុល្លារអាមេរិកក្នុងមួយម៉ែត្រការ៉េ”។
អ្នកនាងអាន សុធីតា នាយិកាក្រុមហ៊ុន CBRE Cambodia បានឲ្យដឹងផងដែរថា តំបន់ទួលគោក ជាតំបន់មានសក្តានុពល និងរីកចម្រើនខ្លាំងក្នុងរយៈពេល២ឆ្នាំចុងក្រោយនេះ ហើយនៅមិនឆ្ងាយពីកណ្តាលភ្នំពេញនោះទេ មានទាំងហេដ្ឋារចនាសម្ព័ន្ធល្អ តម្លៃដីក៏នៅមានតម្លៃសមរម្យ និងជាកន្លែងចាប់អារម្មណ៍របស់អ្នកវិនិយោគនានាទៀតផង។
អ្នកនាងបន្តថា “តំបន់នេះ ព្រោះវាមានសក្តានុពលអភវិឌ្ឍន៍លើវិស័យខុនដូ ហើយមិនយូមិនឆាប់តំបន់នេះ និងរីកដុះដាលខ្លាំងលើវិស័យនេះ ដែលអាចប្រកួតប្រជែងជាមួយតំបន់ផ្សេងទៀតបាន”៕
