ដោយ វុត្ថា
ភ្នំពេញៈ ដូចការគ្រោងទុកមជ្ឈមណ្ឌលពាណិជ្ជកម្ម លំដាប់ពិភពលោក Royal One ដែលជាអគារភ្លោះកំពស់ ៦៨ជាន់ របស់អ្នកឧកញ៉ាគិត ម៉េង ប្រធានក្រុមប្រឹក្សាភិបាល បានចាប់ផ្តើមបើកការដ្ឋានសាង់សាង់ជាផ្លូវការ បន្ទាប់ពីស្វែងរកក្រុមហ៊ុនលំដាប់អន្តរជាតិសាងសង់បាន។
នៅក្នុងបរិវេណការរដ្ឋាននៃអគារភ្លោះពាណិជ្ជកម្ម Royal One នៅថ្ងៃទី៤ខែ ធ្នូ ឆ្នាំ ២០១៩ នេះ គេសង្កេតឃើញមានគ្រឿងចក្ររបស់ក្រុមហ៊ុន SH Tech បាននឹងកំពុងដំណើរសាងសង់របស់ខ្លួន។ កាលពីម្សិលមិញនេះផងដែរ គេឃើញមានការរៀបចំពិធីក្រុងពាលីបុកគ្រឹះសងអគារនេះ ដោយមានការចូលរួមពីម្ចាស់អគារ និងកម្មករសំណង់ជាច្រើននាក់នៅក្នុងការរដ្ឋាននៃអគារ។
អ្នកឧកញ៉ា គិត ម៉េង ប្រធានក្រុមប្រឹក្សាភិបាលនៃក្រុមហ៊ុន Royal Group និងជាប្រធានសភាពាណិជ្ជកម្មកម្ពុជា បានសហការរួមគ្នាជាមួយវិនិយោគិនចិន បោះទុនទឹកប្រាក់ចំនួន២៣០លានដុល្លារ សាងសាង់អគារភ្លោះពាណិជ្ជកម្មកំពស់៦៨ជាន់នេះ ដែលមានទីតាំងស្ថិតនៅលើមហាវិថីសហព័ន្ធរុស្ស៊ី និងមហាវិថីមន្នីវង្ស ព្រមទាំងស្ថិតនៅក្នុងតំបន់ពាណិជ្ជកម្ម និងប្រជុំដោយអគារខ្ពស់ៗដូចជា អគារកាណាឌីយ៉ា អគារវឌ្ឍនៈថៅវើរ រួមទាំងអគារ Exchange Square ជាដើម។
មជ្ឈមណ្ឌលពាណិជ្ជកម្ម Royal One នឹងមានសេវាកម្មចម្រុះដូចជា ខុនដូ ផ្សារទំនើប សណ្ឋាគារ ក្លឹបកំសាន្ត ក្លឹបហាត់ប្រាណ ភោជនីយដ្ឋាន និងមជ្ឍមណ្ឌលកំសាន្តផ្សេងៗជាដើម។
គំរោងនេះសាងសង់លើផ្ទៃដីទំហំ ៤,០៣៦ម៉ែត្រការ៉េ និងប្រើប្រាស់រយៈពេលសាងសង់ចំនួន៥ឆ្នាំ។ ក្រុមហ៊ុន Royal Group ធ្លាប់បានបង្ហាញភាពជឿជាក់ថា វត្តមានអគារភ្លោះដ៏ប្រណិតនេះ នឹងចូលរួមចំណែកនៃមោទនភាពជាតិរបស់កម្ពុជា ដែលបង្ហាញឲ្យឃើញពីសមត្ថភាព និងភាពរីកចម្រើនរបស់មាតុប្រទេស និងផ្សព្វផ្សាយលើឆាកអន្ដរជាតិ៕
