ដោយ ៖ រ៉ាណេត
ភ្នំពេញ ៖ គម្រោងសាងសង់អគារទីស្ដីការក្រសួងព័ត៌មានដែលមានកម្ពុស់១៤ជាន់ ក្រោមជំនួយរបស់រដ្ឋាភិបាលកម្ពុជា ដើម្បីជួយសម្រួលដល់ការងារផ្នែករដ្ឋបាលទូទៅ ក៏ដូចជាសម្រាប់មន្ត្រីក្រសួងព័ត៌មានបំពេញការងារផងដែរនោះ បានចាប់ផ្តើមបុកគ្រឹះបើកការដ្ឋានសាងសង់ជាផ្លូវការហើយ ។
បន្ទាប់ពីមើលឃើញជាក់ស្ដែងពីសភាពចាស់ទ្រុឌទ្រោមនៃអគារការិយាល័យនានារបស់ក្រសួងព័ត៌មាន រដ្ឋាភិបាល ក្រោមការចង្អុលបង្ហាញពីសំណាក់សម្ដេចតេជោ ហ៊ុន សែន នៅត្រឹមព្រឹកថ្ងៃទី៤ ខែធ្នូ ឆ្នាំ២០១៩នេះ គម្រោងសាងសង់អគារទីស្ដីការក្រសួងព័ត៌មានដែលមានកម្ពស់១៤ជាន់ ត្រូវបានបុកគ្រឹះបើកសម្ពោធការដ្ឋានសាងសង់ជាផ្លូវការក្រោមអធិបតីរបស់លោក ខៀវ កាញ៉ារីទ្ធ រដ្ឋមន្ត្រីក្រសួងព័ត៌មាន រួមជាមួយនឹងមន្ត្រីក្រោមឱវាទជាច្រើននាក់។
អគ្គនាយកនៃអគ្គនាយកដ្ឋានព័ត៌មាន និងសោតទស្សន៍ លោក ផុស សុវណ្ណ បានមានប្រសាសន៍ប្រាប់តាមទូរស័ព្ទកាលពីព្រឹកថ្ងៃទី៤ ខែធ្នូ ឆ្នាំ២០១៩នេះថា តាមគម្រោងអគារទីស្តីការក្រសួងថ្មីដែលមានកម្ពស់១៤ជាន់នេះត្រូវចំណាយរយៈពេលសាងសង់ចំនួន ២៤ខែ ដែលត្រូវបានប្រគល់ឱ្យក្រុមហ៊ុនក្នុងស្រុក ឃុន សៀ ឌីវើឡុបមេន គ្រុប ជាអ្នកទទួលខុសត្រូវលើការសាងសង់។
លោកបានបន្តទៀតថា “ខ្ទង់ថវិកាចំណាយលើការសាងសង់អគារនេះ គឺរដ្ឋាភិបាលជាអ្នករ៉ាប់រង ដើម្បីធ្វើការដោះដូរពីការអគារចាស់ដែលមានទំហំតូច មកជាអគារថ្មី រឹងមាំ និងមានទំហំធំទូលាយជាងមុនដែលអាចផ្តល់ភាពងាយស្រួលដល់មន្ត្រីរាជការរបស់ក្រសួងទាំងមូលបំពេញការងារ ជាពិសេសមានទីកន្លែងទុកដាក់ឯកសារសំខាន់ៗ ក៏ដូចជាឧបករណ៍ សម្ភារៈបច្ចេកទេសក្នុងការប្រើប្រាស់សម្រាប់បម្រើផលប្រយោជន៍ដល់ការផ្សព្វផ្សាយសារព័ត៌មានជាតិ និងអន្តរជាតិប្រចាំប្រទេស។
លោកបានបញ្ជាក់ថា “កាលពីមុនក្រសួងព័ត៌មានគឺមានភាពលំបាកក្នុងការខ្វះខាតបន្ទប់សម្រាប់មន្ត្រីបម្រើការងារ ប៉ុន្តែនៅពេលដ៏ខ្លីខាងមុខនេះ ភាពងាយស្រួលនឹងកើតមាន ជាពិសេស ជាមួយនឹងវត្តមានថ្មីនៃអគារនេះ នឹងមានអគ្គនាយកដ្ឋានសំខាន់ៗចំនួន២ តាំងនៅក្នុងអគារនេះ រួមជាមួយនឹងការិយាល័យរបស់មន្ត្រីដែលជាថ្នាក់ដឹកនាំរបស់ក្រសួងព័ត៌មានជាច្រើននាក់ទៀតផងដែរ”៕
