ដោយ វុត្ថា
ភ្នំពេញៈ លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងដែនដី នគរូបនីយកម្ម និងសំណង់ លោកសាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមការងារចុះជួយខេត្តព្រះសីហនុ បានចុះពិនិត្យស្ថានភាព នៃការសាងសង់ផ្លូវទាំង៣៤ ខ្សែក្នុងខេត្តព្រះសីហនុ។
លោក ជា សុផារ៉ា ថ្លែងនៅក្នុងដំណើរចុះពិនិត្យផ្លូវខាងលើនេះធ្វើឡើង នៅព្រឹកថ្ងៃទី១៣ ខែធ្នូឆ្នាំ២០១៩នេះថា ការរៀបចំហេដ្ឋារចនាសម្ព័ន្ធថ្មី របស់រដ្ឋាភិបាលនៅក្រុងព្រះសីហនុ ជាពិសេសស្ថាបនាផ្លូវទាំង៣៤ខ្សែនេះ នឹងជួយជំរុញនិងផ្តល់ឪកាសវិនិយោគ ទេសចរណ៍ និងវិស័យផ្សេងទៀតកាន់តែច្រើនបន្ថែមទៀត។
លោកឧបនាយករដ្ឋមន្ត្រី ក៏បានការណែនាំ ដល់អ្នកជំនាញសាងសង់ ត្រូវតែមានគុណភាព ធានាការប្រើប្រាស់បានយូរ និងបង្កើនសោភ័ណភាព បរិស្ថាន ខេត្តព្រះសីហនុ ដើម្បីទាក់ទាញអ្នកវិនិយោគ និងទេសចរណ៍មកខេត្តមាត់សមុទ្រកាន់តែ ច្រើនឡើង។
លោកបានបន្តទៀតថា “បច្ចុប្បន្ន នេះ រាជរដ្ឋាភិបាល និង រដ្ឋបាលខេត្តបាននិងកំពុងបន្ត ខិតខំកសាងហេដ្ឋារចនាសម្ព័ន្ធ ផ្លូវ ថ្នល់ទូទាំងខេត្ត ព្រះសីហនុ ដែលមានចំនួន ៣៤ខ្សែ ប្រវែងសរុបចំនួន ៨៤.៥០៥គីឡូម៉ែត្រ ដោយផ្លូវទាំងអស់ នេះ ត្រូវតែប្រាកដថា ការស្ថាននា ឡើងប្រកបដោយ គុណភាព និង សោភ័ណភាព ដើម្បីបម្រើឱ្យវិស័យទេសចរណ៍ និង សេដ្ឋកិច្ចរបស់យើង។
លោកស្រី តាំង ហ៊ួរអគ្គនាយិកាក្រុមហ៊ុនAmatak Property Service បានប្រាប់គេហទំព័រ propertyarea.asia កាលពីពេលថ្មីៗនេះថា ផ្ទុយទៅនឹងពាក្យចចាមអារាមដែលថាខេត្តព្រះសីហនុ នឹងមានវិបត្តិធ្ងន់ធ្ងរដោយសារជនជាតិចិនចាកចេញ ពីខេត្តព្រះសីហនុ តែខេត្តមួយនេះកាន់តែមានភាពទាក់ទាញ ការវិនិយោគបន្ថែមទៀត ដោយសាររដ្ឋាភិបាលបាន នឹងកំពុងស្តារហេដ្ឋារចនាសម្ព័ន្ធសំខាន់ៗនៅទូទាំងក្រុងព្រះសីហនុ។
លោកស្រីបន្តថា “អ្នកដែលបាននឹងកំពុងវិនិយោគនៅទីនេះ ឬអ្នកដែលខ្ចីលុយពីធនាគារវិនិយោគជាដើម កុំមានការព្រួយបារម្ភខ្លាំងពេក ព្រោះរដ្ឋាភិបាលបាននឹងកំពុងគិតគូរស្តារហេដ្ឋារចនាសម្ព័ន្ធឱ្យកាន់តែប្រសើរ ដើម្បីទាក់ទាញការវិយោគបរទេសមកបណ្តាក់ទុនរកស៊ីក្នុងនៅក្នុងខេត្តព្រះសីហនុនេះកាន់តែច្រើន”។
លោកស្រីបន្ថែមថា ក្រុងព្រះសីហនុ ក្នុងរយៈពេលប៉ុន្មានឆ្នាំចុងក្រោយនេះ មានការរីកចំរើនយ៉ាងខ្លាំងលើវិស័យអចលនទ្រព្យ ជាពិសេសមានអគារខ្ពស់ៗកាន់តែច្រើនដុះច្រូងច្រាង ដែលបណ្តាលឱ្យមានការរៀបចំ ហេដ្ឋារចសម្ព័ន្ធផ្លូវថ្នល់មិនទាន់ តែពេលនេះ រដ្ឋាភិបាលបានរៀបចំហេដ្ឋារសម្ព័ន្ធ នៅទូទាំងក្រុងព្រះសីហនុ នឹងប្រែក្លាយជាឪកាសវិនិយោគកាន់តែច្រើន។
លោកស្រីបន្ថែមទៀតថា ករណីជនជាតិចិនចាកចេញពីខេត្តព្រះសីហនុ ដោយសាររដ្ឋាភិបាលបិទល្បែងអនឡាញនេះ ក៏មិនប៉ះពាល់ដល់វិស័យអចលនទ្រព្យ ឬការវិនិយោគនោះទេ។ លោកស្រីបានស្វាគមន៍ ចំពោះការបិទល្បែងអនឡាញ របស់រដ្ឋាភិបាលនេះ ព្រោះវាប៉ះពាល់ដល់សន្តិសុខសង្គម និងការវិនិយោគ។
លោកស្រីបញ្ជាក់ទៀថា “នៅពេលក្រុមអ្នករកស៊ីអនឡាញចាកចេញអស់ នឹងមកជំនួសមកវិញនូវក្រុមអ្នកវិយោគ ដែលល្អហើយជួយអោយមានការអភិវឌ្ឍ នៅក្នុងខេត្តជាប់មាត់សមុទ្ររបស់កម្ពុជាមួយនេះកាន់តែលឿន”។
អ្នកនាំពាក្យរដ្ឋបាលខេត្តព្រះសីហនុ លោកឃាង ភារម្យ បានអោយដឹងដែរថា ជាការពិតណាស់ ការរៀបចំហេដ្ឋារចនាសម្ព័ន្ធថ្មី នៅក្នុងក្រុងព្រះសីហនុ នឹងធ្វើឱ្យមានការទាក់ទាញការវិនិយោគ និងទេសចរណ៍កាន់តែច្រើនឡើងថែមទៀត ហើយវានឹងជំរុញកំណើនសេដ្ឋកិច្ចចរបស់ខេត្តកាន់តែមានសន្ទុះខ្លាំងផងដែរ។
ជាមួយគ្នានេះ លោកបានអំពាវនាវផងដែរដល់ប្រជាពលរដ្ឋ ដែលរស់នៅក្នុងខេត្តទាំងមូល កុំអោយមានការព្រួយបារម្ភខ្លាំងពេក ចំពោះការចាកចេញរបស់ជនជាតិចិនពីខេត្តព្រះសីនុ ដោយសារតែរដ្ឋាបិតល្បែងអនឡាញ ហើយធ្វើឱ្យប៉ះពាល់ដល់រកស៊ី និងការជួលអគារ ឬផ្ទះដល់ជនជាតិចិនទាំងនោះ។
ការបិទល្បែងអនឡាញនេះ វាមានផលប៉ះពាល់ក្នុងរយៈពេលខ្លីប៉ុណ្ណោះ ដោយជំនួសមកវិញនូវកំណើនទេសចរណ៍ ; និងវិនិយោគថ្មីផ្សេងៗ ចូលមកខេត្តព្រះសីហនុនេះ ដែលធ្វើអោយពួកគាត់ នឹងទទួលបានចំណូលឡើងវិញ ទោះក្នុងកម្រិតតម្លៃណាមួយក្តីតាមរយៈប្រែក្លាយពីការជួលអគារ ដោយការប្រកមុខរបរផ្សេងៗ។
ជាមួយគ្នានេះ សម្តេចតេជោហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់អំពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការអភិវឌ្ឍខេត្តព្រះសីហនុ ប្រែក្លាយជាតំបន់សេដ្ឋកិច្ចពិសេស ក្នុងការគាំទ្រការអភិវឌ្ឍន៍សេដ្ឋកិច្ចកម្ពុជា ជាមួយនឹងការទម្លាក់កញ្ចប់ថវិកាជាតិប្រមាណប្រមាណជិត២០០លានដុល្លារអាមេរិក ដើម្បីស្ថាបនាឡើងវិញនូវហេដ្ឋារចនាសម្ព័ន្ធសំខាន់ៗ រួមមានផ្លូវចំនួន៣៤ខ្សែ ដោយចាប់ផ្តើមមអនុវត្តធ្វើទាំងថ្ងៃ ទាំងយប់ និងប្រើរយៈពេល៨ខែក្នុងនោះមានអ្នកទទួលម៉ៅការចំនួន៧ក្រុមហ៊ុន៕
