ដោយ វត្ថា
ភ្នំពេញៈ រដ្ឋាភិបាលបានដាក់ចក្ខុវិស័យ ក្នុងការប្រែក្លាយក្រុងព្រះសីហនុ ដែលជាប៉ូលសេដ្ឋកិច្ចដ៏សំខាន់របស់កម្ពុជា ទីក្រុងទំនើប និងវៃឆ្លាត (Smart City) ទៅថ្ងៃអនាគត ខណៈក្រុងមួយនេះ បាននឹងកំពុងស្តារហេដ្ឋារចនាសម្ព័ន្ធដឹកជញ្ជូននានា ទាំងផ្លូវគោក ផ្លូវទឹក និងផ្លូវអាកាសកាន់តែមានភាពល្អប្រសើរ និងទាក់ទាញ។
លោកគួច ចំរើនអភិបាលខេត្តព្រះសីហនុ នៅក្នុងផ្តល់កិច្ចសម្ភាសជាមួយ ស្ថានីយវិទ្យុ និងទូរទស្សន៍អាល្លឺម៉ង់ ARD កាលពីចុងសប្តាហ៍កន្លងមកនេះថា សម្រាប់ចក្ខុវិស័យទៅថ្ងៃអនាគត រដ្ឋាភិបាលចង់ប្រែក្លាយខេត្តព្រះសីហនុ ជាពិសេសក្រុងព្រះសីហនុ ជាទីក្រុងទំនើប និងជាទីក្រុងវៃឆ្លាត។
លោកបន្តថា “ខេត្តព្រះសីហនុ ជាប៉ូលអភិវឌ្ឍសេដ្ឋកិច្ចជាតិ ដ៏មានសារ:សំខាន់មួយនៅតំបន់ឆ្នេរ មានសក្តានុពលសេដ្ឋកិច្ចទាក់ទាញវិនិយោគ និងភ្ញៀវទេសចរ មានដូចជា ឆ្នេរសស្អាត កោះទាំង៣២ កំពង់ផែអន្តរជាតិ អាកាសយានដ្ឋានអន្តរជាតិ និងធនធានធម្មជាតិសម្បុរបែប”។
លោកបន្ថែមថា រយ:ពេល១០ឆ្នាំចុងក្រោយ ពិសេស៣ឆ្នាំចុងក្រោយ ខេត្តមានការអភិវឌ្ឍយ៉ាងឆាប់រហ័សលើវិស័យសំខាន់ៗជាច្រើន ដូចជា ឧស្សាហកម្ម ពាណិជ្ជកម្ម ដឹកជញ្ជូន សំណង់ ទេសចរណ៍ ។ល។
ឆ្លើយទៅអ្នកព័ត៌មានស្ថានីយវិទ្យុ និងទូរទស្សន៍អាល្លឺម៉ង់ ARD លោកអភិបាលខេត្តរូបនេះបញ្ជាក់ថា កម្ពុជាប្រកាន់ខ្ជាប់នូវរបបទីផ្សារសេរី និងបើកចំហរសម្រាប់អ្នកវិនិយោគគ្រប់ជាតិសាសន៍ ខេត្តព្រះសីហនុ ទទួលបានអត្ថប្រយោជន៍យ៉ាងច្រើន ពីការវិនិយោគរបស់ចិន ដូចជាជំរុញកំណើនសេដ្ឋកិច្ច មានសំណង់អគារខ្ពស់សម្រាប់បម្រើដល់វិស័យពាណិជ្ជកម្ម ឧស្សាហកម្ម សេវាកម្ម ទេសចរណ៍ និងកាស៊ីណូ បង្កើតការងារជូនប្រជាពលរដ្ឋ ធ្វើឱ្យតម្លៃអចលនទ្រព្យមានការកើនឡើង បើកទូលាយទីផ្សារ ប្រជាពលរដ្ឋមានជីវភាពធូធារ មានប្រាក់ចំណូលខ្ពស់ មានការងារធ្វើ និងបង្កើតមុខរបរថ្មី។
លោកបន្ថែមថា “ទន្ទឹមនឹងការអភិវឌ្ឍរីកចម្រើន ខេត្តក៏មានបញ្ហាប្រឈមមួយចំនួនដូចជា ហេដ្ឋារចនាសម្ព័ន្ធ ផ្លូវថ្នល់ទទួលរងការខូចខាតស្ទើទាំងស្រុង អនាម័យ បរិស្ថាន និងទឹកស្អាតជាដើម ។
លោកគួច ចំរើនបានបន្តថា បច្ចុប្បន្នមានសំណង់អគារខ្ពស់ៗមានដូចជា សណ្ឋាគារ ខុនដូ និងអគារណាណិជ្ជកម្ម សុទ្ធតែបង្ហាញពីការរីកចម្រើន ភាពស៊ីវីល័យសម្បូរបែប និងបានផ្ដល់ការងារ បង្កើតមុខរបរយ៉ាងច្រើនសន្ធឹកសន្ធាប់ ធ្វើឱ្យប្រជាជនមានជីវភាពកាន់តែធូធារ ។
រាជរដ្ឋាភិបាលបានកំណត់ខេត្តព្រះសីហនុ ជាខេត្តតំបន់ប៉ូលអភិវឌ្ឍជាតិ មួយយ៉ាងសំខាន់នៅតំបន់ឆ្នេរ និងជាតំបន់សេដ្ឋកិច្ចពិសេសគំរូពហុបំណងច្រកចេញ-ចូលអន្តរជាតិ មជ្ឈមណ្ឌលកំណើនជាតិ មជ្ឈមណ្ឌលភស្តុភាធម្មជាតិ មានទំនាក់ទំនងជាមួយទីផ្សារអាស៊ាន និងទីផ្សារសកលលោក និងមជ្ឈមណ្ឌលឧស្សាហកម្ម ផលិតកម្មបែបបច្ចេកវិទ្យាទំនើប ដែលមាន សុខដុមនីយកម្ម ជាមួយនិងបរិស្ថានរស់នៅល្អប្រសើរ ឆ្លើយតបទៅ នឹងចក្ខុវិស័យនេះកាលពីថ្ងៃទី១៦ ខែវិច្ឆិកា ឆ្នាំ២០១៩ សម្ដេចអគ្គមហាសេនាបតីតេជោ ហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីក្នុងពិធីបើកការដ្ឋានស្ថាបនាផ្លូវចំនួន ៣៤ខ្សែ ប្រវែង៨៤.៥០៥ម៉ែត្រ នៅខេត្តព្រះសីហនុ សម្រាប់បម្រើដល់វិស័យឧស្សាហកម្ម ពាណិជ្ជកម្ម ដឹកជញ្ជូន សំណង់ ទេសចរណ៍កាន់តែសម្បុរបែបថែមទៀត៕
