ដោយ ៖ រ៉ាណេត
ភ្នំពេញ ៖ ដោយការមើលឃើញពីចន្លោះប្រហោងនៃការអនុវត្ត និងគោរពទៅតាមច្បាប់ដែលបានកំណត់ទៅលើនីតិវិធីនៃការសាងសង់សំណង់នៅមានកម្រិត ដែលអាចបង្កជាហានិភ័យខ្ពស់ដូចករណីរលំបាក់អគារកាលពីពេលកន្លងទៅថ្មីៗនេះ ក្រសួងរៀបចំដែនដី នគរូបនីយកម្ម និងសំណង់បានចេញសេចក្ដីណែនាំសាជាថ្មី ជាមួយនឹងការអនុវត្តយ៉ាងម៉ឺងម៉ាត់ទៅលើបណ្តាសំណង់ដែលខុសច្បាប់។
នៅក្នុងសេចក្ដីណែនាំសាជាថ្មីរបស់ក្រសួងដែនដី នគរូបនីយកម្ម និងសំណង់ ដែលចេញកាលពីព្រឹកថ្ងៃទី១០ ខែមករា ឆ្នាំ២០២០នេះ បានកំណត់ និងហាមដាច់ខាត់ចំពោះសំណង់ទាំងឡាយណាដែលអនុវត្តផ្ទុយពីចំណុចទាំង៥ខាងក្រោមនេះ ៖
១៖ ហាមដាច់ខាតការសាងសង់សំណង់ដែលគ្មានលិខិតអនុញ្ញាតសាងសង់ ជួសជុល ឬរុះរើ និងលិខិតអនុញ្ញាតបើកការដ្ឋានសំណង់។
២៖ ហាមដាច់ខាតការអនុវត្តការងារសាងសង់ ឬ រុះរើដោយអ្នក សាងសង់ដែលគ្មានអាជ្ញាបណ្ណ ឬវិញ្ញាបនបត្របញ្ជាក់ការអនុញ្ញាតឱ្យប្រកបអាជីវកម្មផ្ដល់ដោយក្រសួងរៀបចំដែនដី នគរូបនីយកម្ម និងសំណង់។
៣៖ ហាមដាច់ខាតការដ្ឋានសំណង់ដែលដំណើរការសាងសង់ ឬ រុះរើដោយគ្មានវិស្វករប្រចាំការដ្ឋានជាអ្នកទទួលខុសត្រូវ។
៤៖ ហាមដាច់ខាតការស្នាក់នៅក្នុងអគារដែលកំពុងសាងសង់ ទោះបីជាលក្ខណៈបណ្តោះអាសន្នក៏ដោយ និងហាមដាច់ខាតអ្នកគ្មានភារកិច្ចចូលក្នុងការដ្ឋានសំណង់។
៥៖ ហាមការប្រើប្រាស់សំណង់គ្រប់ប្រភេទ ដោយគ្មានវិញ្ញាបនបត្រប្រើប្រាស់សំណង់ឬលិខិតបិទការដ្ឋានផ្តល់ដោយអាជ្ញាធរមានសមត្ថកិច្ច។
ជាមួយនឹងការណែនាំខាងលើនេះ ក្រសួងក៏បានជំរុញឱ្យអាជ្ញាធរមានសមត្ថកិច្ចយកចិត្តទុកដាក់អនុវត្តន៍លើគោលការណ៍ និងវិធានការចំនួន៥ផ្សេងទៀតរួមមាន៖ លិខិតអនុញ្ញាតសាងសង់ ជួសជុល និងរុះរើ, លិខិតអនុញ្ញាតបើកការដ្ឋានសំណង់, ការរៀបចំការដ្ឋាន, ដំណើរការដ្ឋានសាងសង់ និងការងារត្រួតពិនិត្យ និងបញ្ជាក់សំណង់។ សេចក្ដីលម្អិត សូមពិនិត្យលិខិតផ្លូវការណ៍របស់ក្រសួងដូចខាងក្រោម៖
