ដោយវុត្ថា
ភ្នំពេញៈ អ្នកជំនាញបានលើកឡើងថា កំណើនផលិតសរុបក្នុងស្រុក (GDP) របស់ប្រជាពលរដ្ឋនាពេលបច្ចុប្បន្ននេះ ពុំមានលទ្ធភាពក្នុងារទិញលំនៅឋានសម្រាប់រស់នៅនោះទេ ខណៈតម្លៃលំនៅឋានបានឡើងថ្លៃចន្លោះពី១៥ ទៅ២០ភាគរយក្នុងមួយឆ្នាំៗ ទៅមួយឆ្នាំទៅតាមតំបន់។
អ្នកស្រាវជ្រាវសេដ្ឋកិច្ចកម្ពុជា បានប្រាប់គេហទំpropertyarea.asia លោកបណ្ឌិតហុង វណ្ណៈបានមានប្រសាសន៍ឲ្យដឹងតាមទូរស័ព្ទនៅថ្ងៃទី ២១ ខែមករា ឆ្នាំ ២០២០កន្លងមកថា សេដ្ឋកិច្ចរបស់ប្រទេសកម្ពុជាចាប់តាំងពីឆ្នាំ ១៩៩៣រហូតមកដល់ពេលនេះ គឺមានសន្ទុះរីកចំរើនខ្លាំង ទាំងវិនិយោគិនបរទេសក៏មានកើនឡើងផងដែរ តែបើនិយាយពីប្រាក់ចំណូលរបស់ពលរដ្ឋ (GDP)នាពេលបច្ចុប្បន្ននេះ គឺមិនទាន់មានលទ្ធភាពខ្លាំងដូចនៅបណ្តាប្រទេសនានានៅក្នុងតំបន់នោះទេ ។
-->
លោកបន្តថា “តែយ៉ាងណាក៏ដោយតម្លៃលំនៅឋាន នឹងនៅទ្រឹងនៅក្នុងតំបន់មួយចំនួន ឬកើនដល់កំរិតកំពូលពិដាន ដើម្បីឱ្យពលរដ្ឋកម្ពុជាមានលទ្ធភាព ក្នុងការបង់រំលោះផ្ទះ ឬទិញផ្ទះ”។ លោកបន្តថា “នៅពេលសេដ្ឋកិច្ចរបស់កម្ពុជា មានកំណើនកាន់តែខ្ពស់តាមការបណ្តាក់ទុនវិយោគពីបរទេស និងកែទម្រងផ្សទេ ហើយពលរដ្ឋយើងមានចំណូលច្រើទៅមុខទៀត នឹងជួយសម្រួលកាន់តែច្រើនដល់យុវជន យើងកាន់តែមានលទ្ធភាពបន្ថែមទៀត”។
លោកបន្តថា តែបច្ចុប្បន្ននេះ មានប្រជាពលរដ្ឋយើងមួយចំនួនច្រើន បាននឹងកំពុងមានលទ្ធភាពក្នុងការទិញលំនៅឋាន និងអ្នកខ្លះទៀតបានបង់រំលោះផ្ទះ ដោយសារតែមានចំណូលសមរម្យទៅតាមលទ្ធភាព ចំណេះ ជំនាញ និងសមត្ថភាពរបស់ពួកគេ។
លោកចក់ ស៊ីណាត ប្រធានក្រុមហ៊ុន Kraty Realty Co,. Ltd ឱ្យដឹងថា បច្ចុច្បន្ននេះ ប្រជាពលរដ្ឋកម្ពុជាមានលទ្ធភាព ក្នុងការទិញលំនៅឋានតាមរយៈការបង់រលោះ តែបង់ទាំងស្រុង មិនមានលទ្ធភាពទាំងអស់នោះទេ។ នេះសំដៅដល់ការអ្នកលទ្ធភាព ដែលធ្វើឱ្យវិស័យអចលនទ្រព្យកាន់តែរីកចំរើន ។
លោកបន្តថា “ប្រជាពលរដ្ឋដែលមានការគិតគូរដិតដល់ គួបផ្សំជាមួយនឹងប្រាក់ចំណូលសមរម្យ នៅពេលទិញលំនៅឋានគឺមិនមានហានិភ័យនោះទេ តែអ្នកមួយចំនួនតូចនៅពេលសម្រេចចិត្តទិញលំនៅឋាន ខណៈដែលខ្លួនមិនទាន់មានលទ្ធភាព ឬប្រាក់ចំណូលសមរម្យនឹងធ្វើឱ្យមានហានិភ័យនាពេលខាងមុខនេះ”។
លោកចក់ ស៊ីណាតបានបន្ថែមថា បើនិយាយពីGDP របស់ប្រជាពលរដ្ឋកម្ពុជានាពេលបច្ចុប្បន្ននេះ គឺមិនមានលទ្ធភាពក្នុងការទិញលំនៅឋាននោះទេ វាមិនដូចនៅស្រុកគេនោះទេ។ កំណើនវិស័យអចលនទ្រព្យនៅក្នុងប្រទេសកម្ពុជា កើនឡើងដោយសារកំណើននៃការវិនិយោគមកពីក្រៅស្រុកកើនឡើង។
អ្នកស្រីតាំងហួរ នាយិកា ក្រុមហ៊ុន អចលនទ្រព្យ Amatak Property Service ឱ្យដឹងដែរថា វិស័យអចលនទ្រព្យនៅក្នុងប្រទេសកម្ពុជានាពេលបច្ចុប្បន្ននេះ គឺមានសន្ទុះមានការរីកចំរើន ស្ទើតែគ្រប់ទីកន្លែងទាំងដីធ្លី និងលំនៅឋាន និងនៅតែបន្តមានការរីកចំរើនទៅមុខនទៀត តែបើនិយាយពីកំណើនតម្លៃនេះ និងកំណើនGDP របស់ពលរដ្ឋកម្ពុជាវិញ ហាក់មានគំលាតគ្នាឆ្ងាយ។
អ្នកស្រីបន្តថា “កំណើនGDP និងកំណើនវិស័យអចលនទ្រព្យ នៅក្នុងប្រទេសកម្ពុជា គឺមានគំលាតគ្នាឆ្ងាយ តែបើកំណើនទាំងពីរមានភាពប្រហាក់ប្រហែលគ្នា កាន់តែល្អសម្រាប់សេដ្ឋកិច្ចកម្ពុជា”។
លោកម៉េត វីរៈ អ្នកធ្វើការក្រុមហ៊ុនឯកជនមួយនៅក្នុងទីក្រុងភ្នំពេញ បានឱ្យដឹងដែរថា ប្រាក់ចំណូលរបស់ពលរដ្ឋកម្ពុជាមួយចំនួន មិនទាន់មានលទ្ធភាពទិញលំនៅឋាននោះទេ បើទោះបីមានការអនុញ្ញាតឱ្យបង់រំលោះក្តី ដោយសារតែចំនូលនៃការបង់រំលោះគឺមានកំរិតខ្ពស់ ចាប់ពី៣០០ ទៅ៥០០ ក្នុងមួយខែ។
លោកបន្តថា កំណើននៃតម្លៃលំនៅឋានពីមួយឆ្នាំ ទៅមួយឆ្នាំ គឺហាក់ធ្វើឱ្យប៉ះពាល់ដល់ចំណូលរបស់ពលរដ្ឋកម្ពុជា ខណៈការចំណាយប្រចាំថ្ងៃក៏មានតម្លៃខ្ពស់។ លោកថា ចំណូលប្រចំាខែរបស់ពលរដ្ឋ មានប្រមាណ៨៥០ ទៅ១៥០០ដុល្លារអាមេរិក ក្នុងមួយខែ (បូកបញ្ចូល ២)ទើបមានលទ្ធភាពបង់រំលោះលំនៅឋាន។
យោងតាមរបាយការណ៍របស់រដ្ឋាភិបាលកម្ពុជាបានបង្ហាញថា កម្ពុជាសម្រេចបានកំណើនខ្ពស់ប្រមាណ ៧% ក្នុងបរិការណ៍អតិផរណាទាប អត្រាប្តូរប្រាក់មានស្ថិរភាព និងទុនបម្រុងអន្តរជាតិបន្តកើនឡើង។ សម្រាប់ កំណើននៃផលិតផលក្នុងស្រុកសរុបជាមធ្យមសម្រាប់មនុស្សម្នាក់ ប្រមាណពី១.៥៤៨ ដុល្លារអាមេរិក ក្នុងឆ្នាំ២០១៨ ដល់ប្រមាណ ១.៦៧៩ ដុល្លារអាមេរិកក្នុងឆ្នាំ២០១៩៕
