ដោយវុត្ថា
ភ្នំពេញ៖ សណ្ឋាគារផ្កាយ ៥ ស្តង់ដាលំដាប់ពិភពលោក Hyatt Regency Phnom Penh គ្រោងនឹងបើកដំណើរការនៅឆ្នាំ ២០២០ នេះ ខណៈ មកដល់បច្ចុប្បន្នបានសាងសង់រួចរាល់ប្រមាណជាង ៣៨ភាគរយ។ នេះ បើយោងតាមការចុះផ្សាយរបស់គេហទំព័រ Real Estate.com នៅថ្ងៃទី ១១ ខែកុម្ភៈឆ្នាំ ២០២០។
ប្រភពដដែលបន្តថា សណ្ឋាគារ Hyatt Regency Phnom Penh នឹងផុសឡើងខ្ពស់ត្រដែតនៅជិតសារមន្ឬីរជាតិភ្នំពេញ និងបោះជំហានចូលក្នុងទីផ្សារសណ្ឋាគារប្រណិតរបស់ប្រទេសកម្ពុជាដើម្បីបើកទ្វារទទួលស្វាគមន៍ភ្ញៀវជាតិ និងអន្តរជាតិនៅឆ្នាំ២០២០នេះ ។
ប្រភពដដែលបន្ថែមថា សណ្ឋាគារលំដាប់ផ្កាយប្រាំអន្តរជាតិនេះមានបន្ទប់សរុបចំនួន២៤៧បន្ទប់ ភោជនីយដ្ឋាន ក្លឹបហាត់ប្រាណ ស្ប៉ានិងអាងហែលទឹក ព្រមទំាងស្កាយបារ ដែលអាចគយគន់ទេសភាពនៃព្រះបរមរាជវាំង ទន្លេមេគង្គ និងទន្លេសាប។
សណ្ឋាគារនេះបានចាប់ផ្ដើមសាងសង់កាលពីខែ មីនា ឆ្នាំ២០១៧ វាគឺជាសណ្ឋាគារប្រេន Hyatt Hotels Corporation ដំបូងគេបង្អស់នៅកម្ពុជាក្រោមកម្មសិទ្ធនិងសាងសង់ដោយក្រុមហ៊ុនជីបម៉ុងក្រោមទុនវិនិយោគចំនួន ១០០ លានដុល្លារ។
សណ្ឋាគារលំដាប់ពិភពលោកនេះមានទីតាំងស្ថិតនៅតាមបណ្ថោយផ្លូវលេខ ១៧៨ ក្រោយព្រះបរមរាជវាំង និងជិតសារមន្ទីរជាតិដែលជាបេះដូងនៃរាជធានីភ្នំពេញ ។ សណ្ឋាគារនេះមានកម្ពស់ ១៤ ជាន់ សាងសង់នៅលើដីប្រមាណ ១៤.០០០ ម៉ែត្រការ៉េ មានបន្ទប់សរុបចំនួន ២៤៧ បន្ទប់ ព្រមជាមួយនិងសេវាកម្ម ភោជនីយដ្ឋាន កន្លែងហាត់ប្រាណ ស្ប៉ា បន្ទប់ប្រជុំអាងហែលទឹក និង Skybar ដែលអាចមើលឃើញទេសភាពនៃព្រះបរមរាជវាំងទន្លេមេគង្គ និង ទន្លេសាប។
សណ្ឋាគារប្រេន Hyatt Hotels Corporation នេះមានដើមកំណើតមកពីសហរដ្ឋអាមេរិកហើយបច្ចុប្បន្នមានសាខាជាង ៦០០ កន្លែងនៅជុំវិញពិភពលោក៕
