ដោយ ប៊ី
ភ្នំពេញៈ ប្រទេសកម្ពុជា បានជាប់លំដាប់កំពូលដោយស្ថិតចំណោម១០ ទិសដៅវិនិយោគសណ្ឋាគារលំដាប់ផ្កាយ៥ ដែលមានតំលៃសមរម្យ និងទទួលបានចំណាត់ថ្នាក់ខ្ពស់បំផុតនៅលើពិភពលោក។
កម្ពុជាស្ថិតក្នុងចំណោមប្រទេសទាំង១០ជាទិសដៅវិនិយោគសណ្ឋាគារលំដាប់ ផ្កាយ៥លើពិភពលោក
យោងតាមការសិក្សាមួយ ដែលចេញផ្សាយនៅសប្តាហ៍នេះ ដោយគេហទំព័រ The Hotel Guru បានចាត់ចំណាត់ថ្នាក់ព្រះរាជាណាចក្រកម្ពុជា ស្ថិតនៅក្នុងលេខរៀងទី៩ នៅលើពិភពលោក ទាក់ទងនឹងលទ្ធភាព និងរបៀបដែលកម្ពុជាត្រូវបានពិនិត្យមើល និងវាយតម្លៃដោយអតិថិជន។
គេហទំព័រពិពណ៌នាខ្លួនវាថា ជាគេហទំព័រដែលមានបេសកកម្មស្វែងរក និងពិនិត្យឡើងវិញ នូវកន្លែងល្អបំផុតដើម្បីស្នាក់នៅជុំវិញពិភពលោក។
ការសិក្សានេះ បានគ្របដណ្តប់លើប្រទេសចំនួន៩៩ នៃទ្វីបចំនួន៦នៅលើពិភពលោក។
បណ្តាប្រទេសនៅអឺរ៉ុប បានគ្រប់គ្រងចំណាត់ថ្នាក់ដោយមាន៧ប្រទេស ស្ថិតក្នុងចំណាត់ថ្នាក់កំពូលទាំង១០ ដឹកនាំដោយអាមេនី ដែលឈរនៅចំណាត់ថ្នាក់ទី១។ ប្រទេសអឺរ៉ុបចំនួន ៦ ផ្សេងទៀត ដែលស្ថិតក្នុងចំណាត់ថ្នាក់កំពូលទាំង១០ គឺប្រទេសស៊ែប៊ី ទី២ ប៉ូឡូញ ទី៤ លីទុយអានី ទី៥ រ៉ូម៉ានី ទី ៧ ប៊ុលហ្គារី ទី៨ និងឡាតវី ទី១០។
ប្រទេសផ្សេងទៀត នៅក្នុងកំពូលទាំង១០ ត្រូវបានកាន់កាប់ដោយបណ្តាប្រទេសអាមេរិកខាង ត្បូងកូឡុំប៊ីជាប់លេខរៀងទី៣ និងប៉ារ៉ាហ្គាយលេខរៀងទី៦។
ប្រទេសកម្ពុជា ជាប់ជាប្រទេសតែមួយគត់មកពីអាស៊ី ដែលបានជាប់ចំណាត់ថ្នាក់កំពូលក្នុងចំណោម១០ប្រទេស។
ក្នុងការបង្កើតចំណាត់ថ្នាក់ គេហទំព័រ Hotel Guru បានចាត់ទុកមិនត្រឹមតែជាតម្លៃទាបជាមធ្យម សម្រាប់ការស្នាក់នៅពេលយប់ប៉ុណ្ណោះទេ ប៉ុន្តែថែមទាំងមតិរបស់អ្នកដំណើរផងដែរ។
គេហទំព័រនេះបានឱ្យដឹងថា “យើងបានគិតលើគំនិត និងយោបល់របស់អ្នកដំណើររួម ដោយមានហេតុផលល្អពីរ។ ទីមួយ វាជួយកម្រិតវិស័យនេះ ពីព្រោះអ្វីដែលឆ្លងកាត់ជាសណ្ឋាគារលំដាប់ផ្កាយ៥ មានភាពខុសគ្នាខ្លាំងនៅទូទាំងពិភពលោក និងទីពីរ ពីព្រោះការពិនិត្យឡើងវិញមានសារៈសំខាន់។ តម្លៃពិតជាសំខាន់ ប៉ុន្តែទស្សនៈរបស់អ្នកធ្វើដំណើរផ្សេងទៀត ក៏អាចជួយឱ្យយល់ពីតម្លៃខ្លះដែរ”។
ប្រទេសកម្ពុជាមានសណ្ឋាគារលំដាប់ផ្កាយប្រាំ កាន់តែច្រើនឡើងៗ។ ភាគច្រើនសណ្ឋាគារលំដាប់ផ្កាយប្រាំនៅកម្ពុជា មានទីតាំងនៅរាជធានីភ្នំពេញ ខេត្តសៀមរាប និងខេត្តព្រះសីហនុ៕
