រ៉ាណេត
ភ្នំពេញៈរដ្ឋាភិបាលសម្រេចកាត់ផ្ទៃបឹងកប់ស្រូវ ឬបឹងតាម៉ោឃសរុប៨៣ហិកតា ជូនរដ្ឋបាលរាជធានីភ្នំពញសម្រាប់ អភិវឌ្ឍហេដ្ឋារចនាសម្ព័ន្ធ បង្កើតសួនច្បារ និងឧទ្យានធម្មជាតិសាធារណៈ ព្រមគ្នាជាមួយនឹងការសាងសង់ អគារហេដ្ឋារចនាសម្ព័ន្ធនាយកដ្ឋានកណ្តាលសន្តិសុខ នៃអគ្គស្នងការដ្ឋាននគរបាលជាតិក្រសួងមហាផ្ទៃ។
តាមរយៈលិខិតលេខ ៣៦៩ សជណ.មយ ចុះថ្ងៃទី១៣ខែមីនាឆ្នាំ២០២០ថា រាជ រដ្ឋាភិបាលយល់ព្រមផ្តល់ផ្ទៃបឹងតាមោក (បឹងកប់ស្រូវ) ទំហំ៨ហិកតាស្ថិតនៅសង្កាត់គោករកាខណ្ឌព្រែកព្នៅ រាជធានីភ្នំពេញ ដើម្បីសាងសង់អគារ និងហេដ្ឋារចនាសម្ព័ន្ធនាយកដ្ឋានកណ្តាលសន្តិសុខ នៃអគ្គស្នងការដ្ឋាននគរបាលជាតិក្រសួងមហាផ្ទៃ។
-->
នៅថ្ងៃទី១៣ ខែមីនា ឆ្នាំ២០២០ ដដែលនេះ ទីស្តីការគណៈរដ្ឋមន្ត្រីក៏បានជម្រាបជូនរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ រដ្ឋមន្ត្រីក្រសួងធនធានទឹកនិងឧតុនិយម អភិបាលរាជធានីភ្នំពេញ តាមរយៈលិខិតលេខ ៣៦៨ សជណ.មយ ចុះថ្ងៃទី១៣ ខែមីនា ឆ្នាំ២០២០ថា រាជរដ្ឋាភិបាលយល់ព្រមផ្តល់ផ្ទៃបឹងតាមោកទំហំ៧៥ហិកតា ដើម្បីអភិវឌ្ឍន៍ហេដ្ឋារចនាសម្ព័ន្ធ និងបង្កើតសួន ព្រមទាំងឧទ្យានធម្មជាតិសាធារណៈ។
ការសម្រេចនេះ យោងតាមលិខិតលេខ០១៦.២០ លស.គចុះថ្ងៃទី៥ ខែមីនាឆ្នាំ២០២០របស់រដ្ឋ បាលរាជធានីភ្នំពេញ។ លិខិលេខ ១២៨.ខន .០២០ សជ ណ ចុះថ្ងៃទី៩ ខែមីនា ឆ្នាំ២០២០ របស់ខុទ្ទកាល័យ សម្តេចអគ្គមហាសេនាបតី តេជោ ហ៊ុន សែននាយករដ្ឋមន្ត្រី និងយោងតាមចំណារដ៏ខ្ពង់ខ្ពស់បំផុត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាណាចក្រកម្ពុជា ចុះថ្ងៃទី៨ ខែមីនា ឆ្នាំ២០២០។
ទីស្តីការគណៈរដ្ឋមន្ត្រី ក៏ធ្លាប់បានជម្រាបជូនរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ រដ្ឋមន្ត្រី ក្រសួងសេដ្ឋកិច្ចនិងហិរញ្ញវត្ថុ និងអភិបាលរាជធានីភ្នំពេញតាមរយៈលិខិតលេខ ៨២៧ សជណ.ចុះថ្ងៃទី២ ខែសីហា ឆ្នាំ២០១៨ ថា រាជរដ្ឋាភិបាលយល់ព្រមផ្តល់ជាគោលការណ៍យកដី ចំនួន២០ហិកតានៅបឹងតាមោក ក្នុងចំណោមទំហំសរុបចំនួន៣ ២៣៥,៧ ហិកតា ដើម្បីសាងសង់ជាផ្សារផ្គត់ផ្គង់បន្លែផ្លែឈើ និងជាចំណតរថយន្ត និងអនុញ្ញាតរើផ្សារបន្លែពីផ្សារដើមគទៅផ្សារថ្មីនៅបឹងតាមោកវិញ៕
