ដោយៈសុខុម
ប៉េកាំង: គ្រាន់តែឃើញភ្លាម យើងប្រាកដជាស្ញើចសរសើរ មិនដាច់ពីមាត់ចំពោះស្នាដៃស្ថាបត្យកម្មដ៏អស្ចារ នៃអគារខ្ពស់រូបរាងដ៏ចម្លែក ដែលមានទីតាំងស្ថិតនៅក្នុងសង្កាត់ពាណិជ្ជកម្មកណ្តាលទីក្រុងប៉េកាំង ប្រទេសចិន។
ដោយមាន៥១ ជាន់ កម្ពស់២៣៤ ម៉ែត្រ និងផ្ទៃក្រឡាសរុប៤៧៣.០០០ ម៉ែត្រការ៉េ អគារកញ្ចក់នេះគឺជាទីស្នាក់ការកណ្តាលថ្មី នៃបណ្ដាញស្ថានីយទូរទស្សន៍ចិន China Central Television (CCTV)។
អគារត្រូវបានឌីហ្សាញឡើង ដោយស្ថាបត្យករដ៏ល្បីល្បាញជនជាតិហូឡង់ លោក Rem Koolhaas និងស្ថាបត្យករជនជាតិអាល្លឺម៉ង់ លោក Ole Scheeren ដែលមកពីក្រុមហ៊ុនស្ថាបត្យកម្មហូឡង់ Office for Metropolitan Architecture (OMA)។
អាគារទាំងមូលនេះ ត្រូវបានផ្គុំចូលគ្នាដោយអគារប៉មធំ២ មានរាងអក្សរL ដែលទ្រេតរកគ្នាក្នុងកម្រិត៩០ដឺក្រេ នៅចំណុចកំពូល និងចំណុចបាតក្រោមដើម្បីបង្កើតបានជាទម្រង់ទុយោទេររកគ្នាយ៉ាងអស្ចារ្យ។
អគារនេះ អាចទប់លំនឹងបានយ៉ាងរឹងមាំ ដោយសារចម្រឹងនៅខាងលើ ដែលភ្ជាប់អគារប៉មទាំង២ ហើយនៅខាងលើនោះ ក៏ត្រូវបានសាងសង់ជាជាន់ការិយាល័យ ដូចអគារប៉មទាំង២ដែរ ដោយបង្កើតបានជាទម្រង់ជាទុយោ៦ទេររកគ្នា។
នៅក្នុងអគារទាំងមូលនេះ រួមបញ្ចូលមុខងាររដ្ឋបាល ជាមួយផ្នែកព័ត៌មាន ការផ្សាយ ស្ទូឌីយោ និងការផលិតកម្មវិធី។
អាគារនេះ ជួយឱ្យបណ្ដាញស្ថានីយទូរទស្សន៍រដ្ឋដ៏ធំមួយនេះ មានសមត្ថភាពផ្សាយយ៉ាងទីលំទូលាយទូទាំងពិភពលោក ក្រោយពង្រីកការផ្សាយរបស់ខ្លួនពីចំនួន១៣ ប៉ុស្តិ៍រហូតដល់ជាង២០០ ប៉ុស្ដិ៍នៅពេលសាងសង់បញ្ចប់ជាស្ថាពរ។
អាគារនេះ បានបញ្ចុះបឋមសិលាដំណើរការសាងសង់ នៅថ្ងៃទី០១ មិថុនា ឆ្នាំ២០០៤ ហើយគ្រោងបញ្ចប់ការសាងសង់នៅខែមករា ឆ្នាំ២០០៨ ។ ប៉ុន្តែដោយសារការសាងសង់ត្រូវបានពន្យារពេល ក្រោយមានអគ្គិភ័យដ៏ធំមួយក្បែរនោះ នៅខែកុម្ភៈ ឆ្នាំ២០០៩ អគារទីស្នាក់ការកណ្ដាលនេះ ត្រូវបានសាងសង់បញ្ចប់ជាស្ថាពរ នៅខែឧសភា ឆ្នាំ២០១២ ហើយត្រូវបានសម្ពោធជាផ្លូវការនៅខែមិថុនា ឆ្នាំ២០១៣ ។
ដោយសារស្ថាបត្យកម្មមានភាពលេចធ្លោខ្លាំង អគារនេះបានឈ្នះពានរង្វាន់អគារខ្ពស់ល្អដាច់គេទូទាំងពិភពលោក ប្រចាំឆ្នាំ២០១៣ (2013 Best Tall Building Worldwide) ពី “ក្រុមប្រឹក្សាវាយតម្លៃអគារខ្ពស់ និងលំនៅដ្ឋានក្នុងទីក្រុង” (Council on Tall Buildings and Urban Habitat) ជាស្ថាប័នអន្តរជាតិមួយ មានទីស្នាក់ការកណ្ដាលនៅក្រុងឈីកាហ្គោ សហរដ្ឋអាមេរិក៕
