ដោយៈគង់ សូរិយា
ភ្នំពេញៈ ការធ្វើជាភ្នាក់ងារអចលនទ្រព្យម្នាក់ ជារឿងសាមញ្ញ ងាយធ្វើ ប៉ុន្តែមិនប្រាកដថា ជោគជ័យដោយងាយៗនោះទេ ប្រសិនជាអ្នកគ្មានវិធីសាស្ត្រច្បាស់លាស់។
ឧកញ៉ាកាង សុធីអគ្គនាយកក្រុមហ៊ុន Century21 Land Stationបានបង្ហើបពីវិធីសាស្ត្រមួយចំនួន ដើម្បីក្លាយជាភ្នាក់ងារអចលនទ្រព្យបានដោយជោគជ័យ អ្នកជាភ្នាក់ងារត្រូវតែប្រកាន់គោលការណ៍មួយចំនួនដូចជា
ភាពស្មោះត្រង់
លោកឧកញ៉ាបានមានប្រសាសន៍ឲ្យដឹងថា គ្រប់មុខជំនួញភាពស្មោះត្រង់សំខាន់ណាស់ បើគ្មានភាពស្មោះត្រង់យើងមិនទទួលបានជោគជ័យទេ ពិសេសក្នុងវិស័យអចលទ្រព្យ។ លោកបន្តថា ក្នុងនាមជាភ្នាក់ងារអចលនទ្រព្យយើងមិនត្រូវ លោភលន់ ដោយដាក់តម្លៃបន្ថែមលើតម្លៃអចលនទ្រព្យណាមួយ ហើយនាំភ្ញៀវទៅទិញនោះទេ ព្រោះការដាក់តម្លៃបន្ថែម នឹងធ្វើឲ្យបាត់បង់គុណតម្លៃរបស់យើង គេលែងទុកចិត្តយើង និងលែងប្រើយើងតទៅទៀត។
ផ្ទុយទៅវិញ បើយើងមានភាពស្មោះត្រង់ មិនស៊ីលើស៊ីក្រោម យកតែកម្រៃជើងសារតែ៣ភាគរយ តិចឬច្រើនជាងនេះ យើងនឹងទទួលបានការជឿទុកចិត្ត ហើយភ្ញៀវត្រលប់មកប្រើសេវាកម្មយើងបន្តទៀត។
ភាពស្មោះត្រង់ធ្វើឲ្យយើងមានចំណូលនិងការងារច្រើន
នៅពេលយើងនាំភ្ញៀវទៅទិញដីកន្លែងណាមួយ យើងនឹងបានកម្រៃជើងសារម្តង ពីម្ចាស់ដី អ្នកទិញដីឬអចលនទ្រព្យដទៃទៀតតាមយើង ពេលគេទទួលបានផលចំណេញលក់ចេញទៅវិញ យើងនឹងបានកម្រៃជើងសារម្តងទៀត។ ហេតុនេះបើយើងមានម៉ូយឬភ្ញៀវប្រើយើងជាប្រចាំ តែ៥ទៅ១០នាក់ យើងមិនខ្វះការងារ និងមិនខ្វះចំណូលនោះទេ។
រកអចលនទ្រព្យពិសេសជូនភ្ញៀវ
ឧកញ៉ាកាង សុធីបានបន្តថា ការរកអចលនទ្រព្យជូនភ្ញៀវ មិនមែនយើងចេះតែរក ចេះតែជំរុញឲ្យគេទិញនោះទេ ហេតុនេះយើងត្រូវសិក្សាឲ្យបានច្បាស់់លាស់ថា តើអចលនទ្រព្យនោះមានសក្តានុពល និងផ្តល់ផលចំណេញរយៈពេលវែង ឬរយៈពេលខ្លី បើចំណេញក្នុងរយៈពេលណាមួយ យើងត្រូវប្រាប់ភ្ញៀវឲ្យបានត្រឹមត្រូវ និងដោយភាពស្មោះត្រង់។
ពេលយើងធ្វើបានបែបនេះ ភ្ញៀវចំណេញនឹងផ្តល់កម្រៃជើងសារឲ្យយើងលើសពីអ្វី ដែលយើងត្រូវទទួលបាន ក៏អាចថាបាន ហើយយើងនឹងទទួលបានទំនុកចិត្តពីភ្ញៀវរបស់យើងកាន់តែច្រើន មានការងារកាន់តែច្រើន និងរកបានចំណូលកាន់តែច្រើន។
លោកឧកញ៉ាបានបន្តថា “នៅក្នុងមុខជំនួញ អ្នកត្រូវតែមានភាពស្មោះត្រង់ ព្រោះភាពស្មោះត្រង់នឹងធ្វើឲ្យអ្នកទទួលបានទំនុកចិត្ត និងជោគជ័យក្នុងអាជីព” ។ លោកបន្តថា “ដោយសារប្រកាន់គោលការណ៍នេះ ភ្ញៀវជាច្រើនបានបោះលុយឲ្យលោកទិញដីជូនពួកគាត់ ដោយពួកគាត់មិនទៅមើលដីផង ផ្ទុយទៅវិញពួកគាត់រង់ចាំតែយកផលចំណេញ និងពីសេវាកម្ម ដែលយើងផ្តល់ជូនពួកគាត់ប្រកបដោយទំនុកចិត្ត និងភាពកក់ក្តៅ” ៕
