ដោយៈគង់ សូរិយា
ភ្នំពេញៈ មជ្ឈមណ្ឌលពាណិជ្ជកម្មលំដាប់ពិភពលោកថ្មីមួយ MGN Towerកំពស់ ៤៨៥ម៉ែត្រ ដែលត្រូវបានរចនាឡើងដោយកញ្ចក់ជុំវិញ កំពុងស្ថិតក្នុងដំណាក់កាលសិក្សាបន្តឬយ៉ាងណា។
គំរោងមជ្ឈមណ្ឌលពាណិជ្ជកម្មដ៏ធំនេះ មានឈ្មោះថា MGN Tower បានត្រូវស្នើសុំវិនិយោគកាលពីឆ្នាំ២០១៨កន្លងមកនេះ។
យោងតាមគេហទំព័រ aasarchitecture បានចុះផ្សាយកាលពីថ្ងៃទី២២ ខែសីហា ឆ្នាំ ២០១៩ កន្លងមកថា អគារនេះត្រូវបានគេរំពឹងថា នឹងក្លាយជានិមិត្តរូបរបស់ប្រទេសកម្ពុជា និងក្រុមហ៊ុន MGN ព្រោះគំរោងនេះបានសាងសង់ នៅតាមបណ្តោយផ្លូវដែលមានភាពមមាញឹក និងកណ្តាលទីក្រុងភ្នំពេញ។
អគារខ្ពស់កប់ពពកនេះ ត្រូវបានរចនាឡើងបំពាក់ទៅដោយកញ្ចក់ ដែលអាចគយគន់ទេសភាពទីក្រុងភ្នំពេញ ។ បច្ចុប្បន្ននេះគម្រោងនេះ ជាគំរោងខ្ពស់លំដាប់ទី២របស់ប្រទេសកម្ពុជា ប្រកបដោយគំនិតឆ្នៃប្រឌិតថ្មី នៃការរចនាដូចផ្កាអង្គារសីល និងស្ថាបត្យកម្មបាយ័ន។ ទំរង់អគារនេះផ្លាស់ប្តូរទ្រង់ទ្រាយផ្កាយ៉ាងទន់ភ្លន់ ដែលមានរចនាបថជារូបផ្កាយនៅផ្នែកខាងលើ។
អាគារដ៏ទាក់ទាញនេះ នឹងត្រូវសាងសង់នៅលើទីតាំងពាណិជ្ជកម្ម និងវប្បធម៌សម្រាប់ប្រជាពលរដ្ឋ នឹងអាចរីករាយនឹងបរិយាកាសនៃអគារខ្ពស់នៅក្នុងទីក្រុង ដែលមានសកម្មភាព ដូចជា នៅទីក្រុងញូវយ៉ក សិង្ហបុរី ឬសាយហ្គនជាដើម។
មជ្ឈមណ្ឌលពាណិជ្ជកម្មដ៏អស្ចារ្យនេះ ត្រូវបានសាងសង់ឡើងសំរាប់ប្រើប្រាស់ចម្រុះរួមមាន ការិយាល័យធនាគារ ការិយាល័យ និងសណ្ឋាគារជាដើម។
នៅពេលសួរទៅកាន់ Facebook Page ផ្លូវការរបស់ធនាគារ MGN Emperor Bank ដែលជាធនាគារសាងសង់គំរោងនេះ តាមរយៈបណ្តាញទំនាក់ទំនងសង្គមកាលពីថ្ងៃទី៣០ កក្កដាកន្លងមកនេះ តំណាងក្រុមហ៊ុននេះបានឆ្លើយយ៉ាងខ្លីថា ការសាងសង់អាគារនេះ មិនទាន់បានចាប់ផ្តើមនៅឡើយទេ ដោយសារបញ្ហាសេដ្ឋកិច្ចសកល ដែលបណ្តាលមកពីជំងឺកូវីដ១៩៕
