ដោយៈសុខុម
សិង្ហបុរី: ប្រជាពលរដ្ឋសឹង្ហបុរីបានដណ្តើមគ្នាទិញអាផាតម៉ិនប្រភេទ BTO បើទោះបីជាពិភពលោកកំពុងរងវិបត្តិជំងឺកូវីដ១៩ក្តី តម្រូវការលំនៅដ្ឋាន ក្នុងប្រទេសដែនកោះដ៏តូចមួយនេះនៅតែខ្ពស់ ដែលជាសញ្ញាវិជ្ជមានសម្រាប់វិស័យអចលនទ្រព្យ នៅក្នុងតំបន់។
យោងតាមតួលេខពីក្រុមប្រឹក្សាលំនៅដ្ឋាន និងអភិវឌ្ឍន៍ (Housing and Development Board) កាលពីថ្ងៃពុធ ទី១៨ សីហា បានបង្ហាញថា តម្រូវការអាផាតម៉ិនប្រភេទ BTO (ផ្ទះដែលសាងសង់ក្រោយទទួលបានពាក្យស្នើសុំទិញ) នៅប្រទេសសិង្ហបុរី បានកើនឡើងគួរឱ្យកត់សម្គាល់នៅខែសីហានេះ។
ផ្អែកតាមទិន្នន័យចុងក្រោយបញ្ចេញ ដោយក្រុមប្រឹក្សាលំនៅដ្ឋាន និងអភិវឌ្ឍន៍ នៅត្រឹមរសៀលថ្ងៃពុធ សប្ដាហ៍នេះបង្ហាញថា ការដាក់ពាក្យស្នើសុំទិញលំនៅដ្ឋានប្រភេទ BTO មានចំនួនជិត៥.០០០យូនីត។
ក្រុមប្រឹក្សានេះបានគូសបញ្ជាក់ថា អាផាតម៉ិនដែលមានតម្រូវការខ្ពស់ជាងគេបំផុត គឺយូនីត ដែលមាន៤បន្ទប់នៅតំបន់ Hougang ដោយមនុស្សជាង១១.៤០០នាក់បានដាក់ពាក្យស្នើសុំទិញអាផាតម៉ិនបែបនេះ ដែលមានត្រឹមតែចំនួន៤៥៩។ នោះមានន័យថា អ្នកដាក់ពាក្យស្នើសុំម្នាក់ៗ មានឱកាសត្រឹមតែ៤%ប៉ុណ្ណោះ ដែលអាចទទួលបានឱកាសទិញ១យូនីត។
ក្រុមប្រឹក្សាដដែលនេះបានលើកឡើងថា នេះគឺជាលើកទី១ ហើយដែលអាផាតម៉ិនប្រភេទ BTO បានកើនឡើងខ្ពស់បែបនេះ នៅក្នុងឆ្នាំ២០២១ នេះ៕
