ដោយៈគង់ ម៉ាលីន
កោះកុងៈ អាជ្ញាធរខេត្តកោះកុងបានចុះពិនិត្យ ករណីសាងសង់ផ្ទះ និងឈូសឆាយដីព្រៃបែបអាណាធិបតេយ្យរបស់ប្រជាជលរដ្ឋ នៅក្នុងមូលដ្ឋានឃុំកោះស្តេច ស្រុកគិរីសាគរ ដែលស្ថិតនៅក្នុងតំបន់អភិវឌ្ឍន៍តារាសាគរ ខេត្តកោះកុង។
ករណីចុះពិនិត្យសកម្មភាពខាងលើនេះ បានដឹកនាំដោយលោកអ៊ុក សុភ័ត្រាអភិបាលរងខេត្តកោះកុង កាលពីថ្ងៃទី២៥ ខែសីហា ឆ្នាំ២០២១ ក្រោមការចង្អុលបង្ហាញពីលោកជំទាវអភិបាល។
លោកអភិបាលរងខេត្ត បានអញ្ជើញដឹកនាំក្រុមការងារខេត្ត និងមានការចូលរួមពីអាជ្ញាធរស្រុក និងឃុំ បានចុះពិនិត្យទីតាំងគម្រោងវិនិយោគកោះម្នាស់ នៃតំបន់វិស្សមកាលតារាសាគរ ស្ថិតក្នុងឃុំកោះស្តេច ស្រុកគិរីសាគរ ដែលត្រូវបានក្រុមហ៊ុន រាយការណ៍ថាមានការលួចឈូសឆាយដី និងសាងសង់សំណង់ដោយខុសច្បាប់ ហើយក្នុងនោះក្រុមហ៊ុនស្នើសុំកិច្ចអន្តរាគមន៍ ដោះស្រាយពីរដ្ឋបាលខេត្ត។
តាមរយៈការចុះពិនិត្យជាក់ស្តែង ក្រុមការងាររកឃើញថា ពិតជាមានការសង់ជាសំណង់ផ្ទះ មានការអារឈើ និងឈូសឆាយដីលើកោះម្នាស់ ដែលស្ថិតក្នុងគម្រោងវិនិយោគ របស់ក្រុមហ៊ុនពិតប្រាកដមែន។ ក្រុមការងារនឹងរៀបចំជារបាយការណ៍រួមមួយ ដើម្បីដាក់ជូនលោកជំទាវអភិបាលខេត្ត ពិនិត្យ និងដោះស្រាយ៕
