ដោយៈគង់ សូរិយា
ភ្នំពេញៈ មេដឹកនាំមហាអំណាចលេខ១ និងលេខ២របស់អាមេរិក បានជជែកគ្នាតាមទូរស័ព្ទរហូតដល់៩០នាទី ដែលកិច្ចសន្ទនានេះបានធ្វើឡើងនៅថ្ងៃទី១០ កញ្ញានេះ។
តើមេដឹកនាំមហាអំណាចធំជាងគេទាំង២លើលោកជជែកគ្នាអ្វីខ្លះរហូតដល់៩០នាទី
កិច្ចសន្ទនាតាមទូរស័ព្ទរវាងប្រធានាធិបតីចិន លោក ស៊ី ជិនពីង និងប្រធានាធិបតីអាមេរិក លោក ចូ បៃដិន បានធ្វើឲ្យពិភពលោកមានការចាប់អារម្មណ៍ជាខ្លាំង ជាពិសេសនៅពេលដែលមហាយក្សសេដ្ឋកិច្ចទាំងពីរ កំពុងជួបប្រទះនូវបញ្ហាធំៗរវាងគ្នា ដែលពិបាកនឹងដោះស្រាយជាទីបំផុត។ នេះបើតាមការចេញផ្សាយ ដោយសារព័ត៌មានចិន CGTN ។
យ៉ាងណាក៏ដោយ ជំនួបក្នុងរយៈពេល៩០នាទី តាមខ្សែទូរស័ព្ទ ដែលត្រូវបានប្រកាសចេញនៅថ្ងៃសុក្រនេះ ភាគីទាំងពីរហាក់បង្ហាញឥរិយាបទទន់ភ្លន់ និងចង់បានដំណើរឈានទៅរកភាពវិជ្ជមានឡើងវិញ នៃទំនាក់ទំនងរវាងគ្នា ដើម្បីឲ្យសមស្របទៅនឹង បរិបទប្រែប្រួលនៅជុំវិញពិភពលោក។ ក្នុងនោះដែរ ប្រធានាធិបតីចិនលោក ស៊ី ជិនពីង បានជំរុញឲ្យសហរដ្ឋអាមេរិក នៅក្រោមការដឹកនាំរបស់លោក ចូ បៃដិន ព្យាយាមធ្វើយ៉ាងណាឲ្យទំនាក់ទំនងរវាងប្រទេសទាំងពីរ ងាកមកដើរលើផ្លូវត្រឹមត្រូវវិញ។
នៅក្នុងកិច្ចសន្ទនានោះ លោកស៊ី ជិនពីង បានសម្តែងចេញនូវទឹកចិត្តអាណិតអាសូរ ទៅកាន់លោក ចូ បៃដិន ដោយសារតែការបាត់បង់ជីវិតនៃពលរដ្ឋអាមេរិក និងការខាតបង់ផ្នែកសេដ្ឋកិច្ច បង្កឡើងដោយព្យុះហឺរីខិន អាយដា (Ida) កាលពីសប្តាហ៍មុន។
លោក ចូ បៃដិន ក៏បានទទួលយកនូវទឹកចិត្តអាណិតអាសូរ ពីសំណាក់ប្រធានាធិបតីចិនផងដែរ។
លោកស៊ី ជីនពីង បានលើកឡើងអំពីគោលនយោបាយ ដែលសហរដ្ឋអាមេរិកបានដាក់មកលើចិន ដែលពេលខ្លះបានបង្កឲ្យទំនាក់ទំនង ចិន-អាមេរិក ឈានទៅរកភាពលំបាកលំបិនបំផុត។
លោក ស៊ីបានសង្កត់ធ្ងន់ថា “ភាពធ្ងន់ធ្ងរជុំវិញរឿងនេះ មិនត្រឹមតែបង្កផលប៉ះពាល់ទៅដល់ ប្រយោជន៍នៃប្រជាជនប្រទេសទាំងពីរប៉ុណ្ណោះទេ តែថែមទាំងប៉ះពាល់ដល់ផលប្រយោជន៍រួម នៃបណ្តាប្រទេសនានានៅលើពិភពលោកផងដែរ”។
លោកស៊ី ជិនពីង បានធ្វើការពន្យល់អំលុងកិច្ចសន្ទនា៩០នាទី ជាមួយលោក ចូ បៃដិន នោះទៀតថា សហរដ្ឋអាមេរិក និងប្រទេសចិននៅពេលនេះ គឺជាតួអង្គសេដ្ឋកិច្ចធំៗទាំងពីរប្រចាំពិភពលោក ដូច្នេះតើប្រទេសទាំងពីរ ត្រូវរក្សាទំនាក់ទំនងគ្នាបែបណា ដើម្បីបង្ហាញពីភាពទទួលខុសត្រូវ ចំពោះអនាគតពិភពលោក?។
លោកស៊ី ជិនពីង បានសង្កត់ធ្ងន់ជុំវិញបញ្ហានេះថា “នេះគឺជាសំនួរប្រចាំសតវត្សរ៍ ដែលប្រទេសទាំងពីរ (ចិន និងអាមេរិក) ត្រូវតែផ្តល់ចម្លើយដ៏ល្អមួយ។ នៅពេលដែលប្រទេសទាំងពីរសហការគ្នា នោះប្រទេសទាំងពីរ និងពិភពលោកទាំងមូល នឹងទទួលបានផលប្រយោជន៍… ហើយនៅពេលដែលចិន និងសហរដ្ឋអាមេរិកប្រឈមមុខដាក់គ្នា នោះប្រទេសទាំងពីរ រួមទាំងពិភពលោកទាំងមួល ក៏នឹងទទួលរងគ្រោះដែរ”។
ប្រធានាធិបតីចិនលោក ស៊ី ជិនពីង បានជំរុញឲ្យលោកចូ បៃដិន ដែលជាប្រធានាធិបតីអាមេរិកកំពុងកាន់អំណាចបច្ចុប្បន្ន ប្រឹងប្រែងស្តារទំនាក់ទំនង រវាងប្រទេសទាំងពីរ ឲ្យវិលត្រលប់មករកផ្លូវត្រឹមត្រូវវិញ ហើយនេះមិនមែនជាជម្រើសនោះទេ ប៉ុន្តែគឺជាអ្វីដែលចិននឹងអាមេរិកត្រូវតែធ្វើ និងធ្វើឲ្យប្រសើរជាទីបំផុត។
ងាកមកកាន់បញ្ហាបម្រែបម្រួលអាកាសធាតុ និងជំងឺ COVID-19 វិញ លោក ស៊ី ជិនពីង បានបង្ហាញពីជំហរឥតងាករេរបស់ចិន ក្នុងការបង្កើនទំនាក់ទំនង ជាមួយសហគមន៍អន្តរជាតិ ដើម្បីដោះស្រាយបញ្ហាទាំងនេះ។ ប្រទេសចិនគាំទ្រការអភិវឌ្ឍបៃតង និងប្តេជ្ញាធ្វើតាមផែនការកាត់បន្ថយកាបូន ចំពោះមុខឆាកអន្តរជាតិ។ ដោយឡែកសម្រាប់ជំងឺ COVID-19 ចិនជំរុញឲ្យមានកិច្ចសហប្រតិបត្តិការ ជាលក្ខណៈអន្តរជាតិ ដើម្បីដោះស្រាយបញ្ហារួមគ្នា។
ជាការឆ្លើយតប លោកចូ បៃដិន ក៏បានធ្វើកត់សម្គាល់ស្រដៀងគ្នាផងដែរដោយប្រធានាធិបតីអាមេរិករូបនេះបានទទួលស្គាល់ថា ពិភពលោកមានការផ្លាស់ប្តូរដ៏ល្បឿនរហ័ស។
លោក បៃដិន សង្កត់ធ្ងន់យ៉ាងដូច្នេះថា “ទំនាក់ទំនងអាមេរិក-ចិន គឺជាទំនាក់ទំនងដែលមានភាពស្មុគស្មាញបំផុត នៅលើពិភពលោក ហើយអនាគតនៃពិភពលោកទាំងមូល គឺអាស្រ័យលើរបៀបដែលសហរដ្ឋអាមេរិក និងចិនមានទំនាក់ទំនងជាមួយគ្នា”។
លោក ចូ បៃដិន បានថ្លែងបន្តទៀតថា “ប្រទេសទាំងពីរមិនទទួលបានប្រយោជន៍អ្វី ពីការបណ្តែតបណ្តោយឱ្យការប្រកួតប្រជែងគ្នា ធ្លាក់ចូលទៅក្នុងជម្លោះនោះទេ…. ហើយភាគីអាមេរិកក៏គ្មានបំណង ផ្លាស់ប្តូរគោលនយោបាយចិនតែមួយដែរ”។ លោកបន្តថា “វាត្រូវបានរៀបចំឡើង ដើម្បីឱ្យមានការផ្លាស់ប្តូរដោយស្មោះត្រង់ និងការពិភាក្សាប្រកបដោយលក្ខណៈស្ថាបនា ជាមួយប្រទេសចិន ដើម្បីកំណត់វិស័យសំខាន់ៗ និងជាអាទិភាព ដែលកិច្ចសហប្រតិបត្តិការអាចធ្វើទៅបាន ដោយចៀសវាងការប្រាស្រ័យទាក់ទងដោយខុសឆ្គង, ការគណនាខុស និងជម្លោះដោយអចេតនា និងធ្វើឱ្យទំនាក់ទំនងអាមេរិក-ចិន វិលមករកភាពប្រក្រតីវិញ”។
លោក ចូ បៃដិន បានបន្ថែមថា ភាគីអាមេរិកទន្ទឹងរង់ចាំការពិភាក្សា និងកិច្ចសហប្រតិបត្តិការបន្ថែមទៀតជាមួយចិន ដើម្បីឈានដល់ការបង្កើតជំហររួមមួយ ស្តីពីការដោះស្រាយបញ្ហាប្រែប្រួលអាកាសធាតុ និងបញ្ហាសំខាន់ៗផ្សេងទៀត។ ប្រធានាធិបតីនៃប្រទេសទាំងពីរ បានព្រមព្រៀងគ្នាថា នឹងធ្វើការប្រាស្រ័យទាក់ទង ដ៏ស៊ីជម្រៅរវាងចិន និងអាមេរិក និងទំនាក់ទំនងពាក់ព័ន្ធបញ្ហាអន្តរជាតិធំៗ ហើយប្រការនេះពិតជាមានសារៈសំខាន់ខ្លាំងណាស់ សម្រាប់ការជំរុញទំនាក់ទំនងទ្វេភាគី ឲ្យស្ថិតនៅក្នុងទិសដៅត្រឹមត្រូវ៕
