ដោយៈសហសេវិក
ភ្នំពេញៈ ខណ្ឌចំការមន ដែលមានទីតាំង ស្ថិតនៅចំកណ្តាលរាជធានីភ្នំពេញ មានផ្ទៃដី៦.៩គីឡូម៉ែត្រការ៉េ មានប្រជាជនជាង៧ម៉ឺននាក់ ឬ១៥.០០០ គ្រួសារ។
ខណ្ឌនេះត្រូវបានបែងចែកជា១២សង្កាត់ ប៉ុន្តែនៅខែមករា ឆ្នាំ២០១៩ សង្កាត់ចំនួន៧ នៅក្នុងខណ្ឌនេះត្រូវផ្ទេរទៅឱ្យខណ្ឌថ្មីមួយទៀត ដែលមានឈ្មោះថាខណ្ឌបឹងកេងកង។
ខណ្ឌចំការមនត្រូវបានគេចាត់ទុកថា ជាកន្លែងមានសុវត្ថិភាពបំផុត និងពេញនិយមជាងគេ ក្នុងការរស់នៅស្ថិតចំកណ្តាលទីក្រុងភ្នំពេញ ដែលមានការផ្គត់ផ្គង់ខុនដូយ៉ាងច្រើន។ គិតត្រឹមឆមាសទី២ឆ្នាំ២០២០ ចំការមនផ្គត់ផ្គង់ខុនដូច្រើនជាងគេចំនួន៣២ភាគរយ នៃចំនួនខុនដូរសរុបក្នុងក្រុងភ្នំពេញ តាមពីក្រោយដោយខណ្ឌសែនសុខ១៣ភាគរយ និងខណ្ឌ៧មករា១១ភាគរយ។ នេះបើយោងតាមរបាយការណ៍ប្រចាំឆមាសទី២ឆ្នាំ២០២០ របស់ក្រុមហ៊ុន Knight Frank។
របាយការណ៍ដដែលបានបង្ហាញថា នៅឆមាសទី២ឆ្នាំ២០២០ ការផ្គត់ផ្គង់ខុនដូសរុបនៅទីក្រុងភ្នំពេញ មានចំនួនជាង២៤.០០០យូនីត នៅក្នុង៨៣គម្រោង។ ក្នុងរយៈពេលបីឆ្នាំទៀតខាងមុខKnight Frank បានព្យាករណ៍ថា ចំនួនខុនដូនឹងមានការកើនឡើង៥៣.០០០យូនីត ដែលនាំឱ្យមានការផ្គត់ផ្គង់សរុបកើនដល់៧៧.០០០យូនីតនៅឆ្នាំ២០២៣។
នៅក្នុងការផ្គត់ផ្គង់នាពេលអនាគត ទាំងគម្រោងដែលគ្រោងនឹងបើកដំណើរការ និងកំពុងដំណើរការ ខណ្ឌចំការមនត្រូវបានព្យាករណ៍ថា នឹងមានចំណែកទីផ្សារធំបំផុតចំនួន២០%នៅឆ្នាំ២០២៣ បន្ទាប់មកគឺខណ្ឌសែនសុខ១៨% និងខណ្ឌជ្រោយចង្វារ១៤% ។
ក្រៅពីខុនដូ ខណ្ឌចំការមនមានសណ្ឋាគារ ហាងលក់រាយ ភោជនីយដ្ឋាន ហាងកាហ្វេ បារ និងផ្សារជាច្រើន ដើម្បីផ្តល់ភាពងាយស្រួលដល់អ្នករស់នៅទីនោះ ជាពិសេសជនបរទេស។ ផ្សារទំនើបអ៊ីអនម៉ល ណាហ្គាវើលផ្សារទួលទំពូង (ផ្សាររុស្ស៊ី) និងសារមន្ទីរប្រល័យពូជសាសន៍ទួលស្លែង គឺជាកន្លែងពេញនិយមជាងគេនៅក្នុងខណ្ឌនេះ។
បច្ចុប្បន្ននេះ តម្លៃដីជាមធ្យមនៅចំការមនត្រូវបានប៉ាន់ប្រមាណថា មានតម្លៃ ៣,០០០ ដុល្លារក្នុងមួយម៉ែត្រការ៉េ សម្រាប់តំបន់លំនៅដ្ឋាន និង៥,០០០ដុល្លារក្នុងមួយម៉ែត្រការ៉េសម្រាប់តំបន់ពាណិជ្ជកម្ម។ ដោយសារតម្លៃដីធ្លីខ្ពស់នៅខណ្ឌចំការមន អ្នកអភិវឌ្ឍមួយចំនួន បានផ្លាស់ប្តូរគម្រោងខុនដូទៅជាយក្រុងវិញ ដូចជាខណ្ឌសែនសុខ និងខណ្ឌជ្រោយចង្វារជាដើម ដែលមានតម្លៃដីធូរថ្លៃជាង។ ទោះជាយ៉ាងនេះក្តី ចំការមននៅតែជាទីតាំងដែលអ្នកអភិវឌ្ឍន៍ចង់បានបំផុត។
នៅក្នុងបទសម្ភាសន៍ជាមួយកាសែតក្នុងស្រុកមួយ លោក ប៊ុន សុភ័ក្រ អភិបាលរងខណ្ឌចំការមនបានមានប្រសាសន៍ថា ការវិនិយោគភាគច្រើន នៅក្នុងតំបន់នេះបានមកពីប្រទេសចិន និងកូរ៉េ ហើយពួកគេចាប់អារម្មណ៍ជាពិសេស ក្នុងការវិនិយោគលើគម្រោងលំនៅដ្ឋាន។ ដោយសារតែការវិនិយោគពីបរទេស តម្លៃដីធ្លីនៅក្នុងតំបន់នេះបានរក្សាតម្លៃខ្ពស់ប្រហែល៤.០០០ដុល្លារក្នុងមួយម៉ែត្រការ៉េ ក្នុងរយៈពេល១០ឆ្នាំចុងក្រោយនេះ។
លោកបានបន្ថែមថា៖ “ខ្ញុំគិតថាជាការល្អ ដែលមានអ្នកវិនិយោគច្រើននៅក្នុងខណ្ឌចំការមន ព្រោះវាអាចធ្វើឱ្យមនុស្សមួយចំនួន ដែលរស់នៅតំបន់នេះមានឱកាសលក់អចលនទ្រព្យរបស់ពួកគេក្នុងតម្លៃខ្ពស់ និងអាចសល់ប្រាក់ដើម្បីបន្តអាជីវកម្មនៅកន្លែងផ្សេងទៀតបាន”។
អំពីសេវាកម្ម ឬចម្ងល់ផ្សេងៗសូមទំនាក់ទំនងតាមរយៈ៖ +855 967876902 (Telegram)/ +855 66886633។ប្រភព៖ Harbor Property៕
