ដោយៈសុខុម
បាងកក: អគារការិយាល័យចាស់ៗ គួរតែធ្វើការជួសជុលកែលម្អឡើងវិញ ដើម្បីរក្សាអ្នកជួលកុំឱ្យបាត់បង់ ស្របពេលតម្រូវការធ្លាក់ចុះ ដែលបណ្ដាល មកការផ្គត់ផ្គង់អគារការិយាល័យថ្មីៗ ឈានដល់ទំហំជាង២លានម៉ែត្រការ៉េ ក្នុងរយៈពេល៥ឆ្នាំក្នុងចន្លោះឆ្នាំ២០២២ ដល់ឆ្នាំ២០២៦ ព្រមទាំងឥរិយាបថផ្លាស់ប្ដូរផងដែរ។
លោកស្រី Suphin Mechuchep ប្រធានក្រុមហ៊ុនប្រឹក្សាអចលនទ្រព្យ JLL Thailand ថ្លែងថា ម្ចាស់អគារការិយាល័យចាស់ៗ នៅទីតាំង ល្អៗ គួរតែធ្វើទំនើបកម្មអគារការិយាល័យរបស់ខ្លួន តាមរយៈការបន្ថែមភាពទាក់ទាញ ដូចជា ការបង្កើតហាងកាហ្វេ ក្លឹបហាត់ប្រាណ មណ្ឌលថែទាំសុខភាព ឬ បន្ទប់ទឹកដែលបំពាក់បច្ចេកវិទ្យា Touchless ជាដើម។ នេះបើយោងតាមសារព័ត៌មាន Bangkok Post ចុះផ្សាយកាលពីថ្ងៃព្រហស្បតិ៍ ទី១០ មីនា។
លោកស្រីបានបន្ថែមថា “ការប្រកួតក្នុងប្រជែងទីផ្សារការិយាល័យនឹងកើនឡើងខ្លាំង ដោយសារកត្តារួមផ្សំមួយចំនួន ដែលមិនត្រឹមតែកំណើននៃតម្រូវការជួលអគារការិយាល័យ ដែលមានស្រាប់ប៉ុណ្ណោះទេ ប៉ុន្តែថែមទាំងកំណើន នៃការផ្គត់ផ្គង់អគារការិយាល័យថ្មីៗ សម្រាប់រយៈពេល៥ឆ្នាំខាងមុខផងដែរ”។
លទ្ធផលនៃការស្រាវជ្រាវទីផ្សារ ដែលធ្វើឡើងដោយក្រុមហ៊ុនប្រឹក្សាអចលនទ្រព្យ JLL Thailand បង្ហាញថា ការផ្គត់ផ្គង់ការិយាល័យ នៅក្រុងបាងកក មានចំនួនសរុបរហូតដល់ប្រមាណ៩,៩លានម៉ែត្រការ៉េ គិតត្រឹមឆ្នាំ២០២១។
ការផ្គត់ផ្គង់អគារការិយាល័យថ្មីៗប្រចាំឆ្នាំ បានកើនឡើងខ្ពស់ណាស់ក្នុងរយៈពេល២ឆ្នាំចុងក្រោយនេះ ដោយក្នុងឆ្នាំ២០២១ បានកើនឡើង៤៧០.០០០គីឡូម៉ែត្រការ៉េ ហើយក្នុងឆ្នាំ២០២០ កើនឡើង៣៥០.០០០ម៉ែត្រការ៉េ។
យោងតាមក្រុមហ៊ុនប្រឹក្សាអចលនទ្រព្យ JLL Thailand បានឱ្យដឹងថា អំឡុងឆ្នាំ២០២២-២០២៦ នឹងមានការផ្គត់ផ្គង់អគារការិយាល័យថ្មីៗប្រមាណ៤៤០.០០០ម៉ែត្រការ៉េក្នុងមួយឆ្នាំៗ ហើយការផ្គត់ផ្គង់ថ្មីៗនឹងឈានដល់ ចំនួនសរុប២,២លានម៉ែត្រការ៉េ ក្នុងរយៈពេល៥ឆ្នាំខាងមុខ៕ Bangkok Post៕
