ដោយៈសុផារី
កំពង់ស្ពឺៈ ក្រុមអ្នកធុរកិច្ចម៉ាឡេស៊ីមួយក្រុមធំ មានគម្រោងដាក់ទុនវិនិយោគលើការអភិវឌ្ឍអចលនទ្រព្យឧស្សាហកម្ម ដោយយកខេត្តកំពង់ស្ពឺជាខេត្តគោលដៅទី១ បន្ទាប់ពីមើលឃើញពីសក្ដានុពលជាច្រើន នៃខេត្តមួយនេះ។
ក្នុងជំនួបពិភាក្សាការងារជាមួយលោក វ៉ី សំណាង អភិបាលខេត្តកំពង់ស្ពឺ នៅសាលាខេត្តកំពង់ស្ពឺ នៅថ្ងៃទី៥ ខែឧសភា ឆ្នាំ២០២២ លោក ដាតូ តេគឹមពូ នាយកក្រុមហ៊ុន អេដេង លេន ឯ.ក បានលើកឡើងថា ក្រុមហ៊ុនរបស់លោក និងក្រុមការងារធុរៈកិច្ចទី១ មានគោលបំណងចំនួន៤ ដែលចង់ដាក់ទុនវិនិយោគនៅក្នុងខេត្តកំពង់ស្ពឺ។
លោកចង់ស្វែងយល់ពីព័ត៌មានលម្អិតបន្ថែមស្តីពី ការលើកទឹកចិត្តរបស់ក្រុមប្រឹក្សាអភិវឌ្ឍន៍កម្ពុជា និងស្វែងយល់ពីលទ្ធភាពនៃការអភិវឌ្ឍអចលនទ្រព្យឧស្សាហកម្ម នៅខេត្តកំពង់ស្ពឺ។
លោកបន្ដថា “ការគ្រោងដាក់ទុនវិនិយោគ នៅក្នុងខេត្តកំពង់ស្ពឺគឺជាខេត្តគោលដៅ ព្រោះខេត្តនេះមានសក្តានុពលគ្រប់គ្រាន់ ដែលក្រុមហ៊ុនអាចដាក់ទុនវិនិយោគបាន ខណៈលោកមានផែនការចង់ អភិវឌ្ឍន៍ខេត្តកំពង់ស្ពឺឱ្យក្លាយជាខេត្តសួនឧស្សាហកម្ម”។
លោក វ៉ី សំណាង បានឯកភាពលើសំណើ ដែលក្រុមហ៊ុនចង់វិនិយោគលើវិស័យអចលនទ្រព្យឧស្សាហកម្ម។
លោកបានមានប្រសាសន៍ថា “នៅខេត្តកំពង់ស្ពឺមានចម្ការស្វាយរាប់ម៉ឺនហិកតា ដែលប្រជាកសិករខេត្តនេះដាំបាន ដូច្នេះក្រុមហ៊ុនអាចសិក្សានិងបង្កើតរោងចក្រសម្រាប់កែច្នៃផ្លែស្វាយនេះបាន”។
លោកបានបន្តថា “មិនតែប៉ុណ្ណោះ ខេត្តក៏មានធនធានច្រើនទៀតដូចជា រមណីយដ្ឋានសម្បូរបែប ទាំងរមណីយដ្ឋានធម្មជាតិ កែច្នៃ និងកសិទេសចរណ៍ មានធនធានរ៉ែ មានផ្ទៃដី ដែលអំណោយផលដល់វិស័យកសិកម្ម មានទីតាំងល្អសម្រាប់វិស័យអចលនទ្រព្យ និងឧស្សាហកម្ម ដែលក្រុមហ៊ុនអាចដាក់ទុនវិនិយោគ នៅក្នុងខេត្តនេះបាន”។
លោក ប៉ូ អ៊ាវគង់ អគ្គនាយកក្រុមហ៊ុនអ៊ែតវ៉ានស៍ រៀលអ៊ីស្ទេត បាននិយាយថា ខេត្តកំពង់ស្ពឺ គឺជាខេត្តដែលមានសក្តានុពលលើគ្រប់វិស័យ ជាពិសេសលើវិស័យឧស្សាហកម្ម និងអចលនទ្រព្យ។ កំណើនរោងចក្រក្នុងរយៈពេលប៉ុន្មានឆ្នាំចុងក្រោយនេះ បានធ្វើឱ្យខេត្តជាប់រាជធានីភ្នំពេញមួយនេះមានការរីកចម្រើនយ៉ាងខ្លាំងគួរឱ្យកត់សម្គាល់។
លោកបានមានប្រសាសន៍ថា “ក្នុងរយៈពេល៤ឆ្នាំចុងក្រោយនេះ យើងបានមើលឃើញច្បាស់ អំពីកំណើននៃការប្រើប្រាស់ដី សម្រាប់ការសាងសង់ ឧស្សាហកម្ម រោងចក្រ និងផ្នែកខ្លះនៃលំនៅដ្ឋាន”។
លោកបន្តថា ដោយសារខេត្តនេះ មានទីតាំងនៅក្នុងហ្សូនយុទ្ធសាស្ត្រ មានទីតាំងនៅជាប់ផ្លូវជាតិលេខ៤ ផ្លូវជាតិលេខ៣ និងប្រព័ន្ធផ្លូវសំខាន់ៗ ដែលប្រទាក់ក្រឡាគ្នា សម្រួលដល់ការដឹកជញ្ជូន។ នេះជាអំណោយផល សម្រាប់ការសាងសង់រោងចក្រ និងឃ្លាំងផ្សេងៗ។ ម្យ៉ាងទៀត ខេត្តមួយនេះស្ថិតនៅប៉ែកខាងត្បូងឆៀងខាងលិច និងមានទិសដៅភ្ជាប់ទៅកាន់ខេត្តព្រះសីហនុផងនោះ ខេត្តនេះមានតម្រូវការច្រើនជាងគេ បន្ទាប់ពីខេត្តកណ្តាល។
លោកបញ្ជាក់បន្ថែមថា “ជាពិសេស តម្លៃដីធ្លីនៅក្នុងខេត្តមួយនេះ ក៏នៅមានតម្លៃធូរថ្លៃផងដែរ ដែលទាំងនេះហើយជាចលករសំខាន់ជម្រុញការវិនិយោគមកកាន់ខេត្តកំពង់ស្ពឺ”។
លោក សុខ ភា អភិបាលរងខេត្តកំពង់ស្ពឺ បានលើកឡើងក្នុងសិក្ខាសាលាមួយ នៅថ្ងៃទី០៥ ខែឧសភានេះថា ខេត្តកំពង់ស្ពឺជាខេត្តមួយ ដែលមានសក្តានុពល អាស្រ័យលើវិស័យឧស្សាហកម្ម កសិកម្ម ទេសចរណ៍ និងប្រព័ន្ធហេដ្ឋារចនាសម្ព័ន្ធរូបវន្ត។
លោកថា សេដ្ឋកិច្ចរបស់ខេត្តកំពង់ស្ពឺ ទទួលបានលទ្ធផលដ៏គួរឲ្យជាទីមោទនៈ ដែលឆ្លុះបញ្ចាំងចេញពីកំណើន សេដ្ឋកិច្ចយ៉ាងឆាប់រហ័ស និងការកាត់បន្ថយភាពក្រីក្រគួរឲ្យមោទនភាព ក្រោមការដឹកនាំរបស់ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន ដែលមាននូវនយោបាយការទូតដ៏ល្អ និងកិច្ចខិតខំប្រឹងប្រែងអនុវត្តន៍ផ្ទាល់របស់រដ្ឋបាលខេត្តកំពង់ស្ពឺ។
ក្រុមហ៊ុនម៉ាឡេស៊ីខាងលើនេះ ក៏បានបង្ហាញចំណាប់អារម្មណ៍វិនិយោគលើការដាំដុះរុក្ខជាតិអំបូរកញ្ឆា និងរុក្ខជាតិតិណទេសផ្សេងទៀត ដើម្បីផលិតឱសថនាំចេញ បង្កើតខ្សែសង្វាក់ផលិតកម្មរោងចក្រ សម្រាប់កែច្នៃ និងចម្រាញ់រុក្ខជាតិផងដែរ តែលោក វ៉ី សំណាង បានច្រានចោលការស្នើសុំវិនិយោគលើការដាំដុះអំបូររុក្ខជាតិកញ្ឆា និងរុក្ខជាតិតិណទេស ដោយលោកបានមានប្រសាសន៍ថា ការដាំដុះកញ្ឆាគឺជាការល្មើស និងប្រឆាំងនឹងច្បាប់នៃកម្ពុជា ដែលនៅប្រទេសកម្ពុជាកញ្ឆាត្រូវបានចាត់ជាគ្រឿងញៀន៕
