ដោយ៖ សុផារី
ភ្នំពេញ៖ នៅក្នុងរយៈពេលប៉ុន្មានឆ្នាំចុងក្រោយនេះ គេសង្គេតឃើញមានបុរីជាច្រើនគម្រោង បានចូលទៅបោះទីតាំង នៅតាមបណ្តោយផ្លូវជាតិលេខ១នេះ ជាពិសេសនៅក្នុងតំបន់កៀនស្វាយតែម្តង។
ជាក់ស្តែង បុរីធំបំផុតមួយគឺបុរី ប៉េង ហ៊ួត ដែលបានឈានទៅបោះទីតាំងអភិវឌ្ឍន៍បុរីមុនគេ នៅតាមបណ្តោយផ្លូវជាតិនេះ បានជំរុញតម្លៃដីធ្លី និងជម្រុញឱ្យមានការចូលមកនូវអ្នកអភិវឌ្ឍន៍ធំៗផ្សេងៗទៀតជាច្រើន មានដូចជា បុរីមង្គលភ្នំពេញ បុរី KS Resident បុរីភ្នំពេញសុខសាន្ត បុរីហាយធិច បុរីសម្បត្តិមានហេង បុរីលឹមឈាងហាក់ ជាដើម។
លោកឧកញ៉ាបណ្ឌិត គីម ហ៊ាង ប្រធាន KW Cambodia បានមានប្រសាសន៍ថា តំបន់ប៉ែកខាងកើតនៃរាជធានីភ្នំពេញ ជាទីតាំងល្អបំផុត សាកសមនឹងគម្រោងអភិវឌ្ឍន៍លំនៅឋាន និងទេសចរណ៍ ដោយសារតែមានទីតាំងអមណោយផលខ្ពស់ មានដើមឈើ និងខ្យល់អាកាសបរិសុទ្ធ ធម្មជាតិ។
លោក MJ Cheng ប្រធានក្រុមផ្នែកទីផ្សារនិងលក់ នៃគម្រោងបុរីមង្គលភ្នំពេញ ដែលមានគម្រោងបុរីធំៗចំនួនបីគម្រោងនៅតាមបណ្តោយផ្លូវជាតិលេខ១ និងគម្រោង៥ផ្សេងទៀតនៅក្នុងក្រុង និងជាយក្រុងភ្នំពេញ បានមានប្រសាសន៍កាលពីពេលថ្មីៗនេះថា ផ្លូវជាតិលេខមួយ នៅម្តុំតំបន់កៀនស្វាយនេះ គឺជាទីតាំងក៏មានសក្តានុពលវិនិយោគអចលនទ្រព្យ ជាពិសេសលើគម្រោងលំនៅឋានប្រភេទបុរី។
លោកថា “សព្វថ្ងៃនេះ នៅម្តុំកៀនស្វាយមានគម្រោងបុរីកំពុងតែរីកមកដល់ថ្មីៗ ជាច្រើន”។ ក្នុងចំណោមនោះ លោកអះអាងថា គម្រោងរបស់លោក គឺគម្រោងបុរីមង្គលភ្នំពេញ ជាគម្រោងដែលធំជាងគេនៅក្នុងតំបន់នេះ ដែលមានចម្ងាយត្រឹមតែ១៥នាទីពីស្ពានព្រះមុនីវង្សតែប៉ុណ្ណោះ។ ក្រៅពីគម្រោងរបស់លោក នៅមានគម្រោងខ្លះទៀត បានពង្រីកទីតាំងនៅឆ្ងាយជាងនេះទៅទៀត”។
បើតាមលោក MJ បានឱ្យដឹងថា តំបន់នេះជាទីតាំងសក្តានុពល ដោយទី១ ផ្លូវជាតិលេខ១នេះជាច្រកអន្តរជាតិរបស់អាស៊ានភ្ជាប់ទៅកាន់ក្រុងបាវិត ជាផ្លូវសម្រាប់ភ្ជាប់ការនាំចេញ នាំចូលរវាងប្រទេសកម្ពុជា និងវៀតណាម ដោយក្រុមអ្នកជំនួញរកស៊ីភ្នំពេញ-បាវិត គឺត្រូវធ្វើដំណើរឆ្លងកាត់ផ្លូវមួយនេះ។
លោកថា “វាជាច្រកអន្តរជាតិ ដូច្នេះមានមនុស្សរស់នៅច្រើន មនុស្សចេញចូលច្រើន។ ការរស់នៅម្តុំនេះ ចាត់ទុកថាជាចំណុចកណ្ដាល ដែលមានភាពងាយស្រួលក្នុងការចេញចូល”។
សក្តានុពលទី២ គឺ វាមានទីតាំងនៅជិតផ្លូវក្រវាត់ក្រុងទី២ និងផ្លូវក្រវាត់ក្រុងទី៣ ជាពិសេសនៅជិតផ្លូវក្រវាត់ក្រុងទី២ជាងគេ។
ម្យ៉ាងទៀត សក្តានុពលទី៣ ជំរុញដោយ គម្រោងស្ពានកោះពេជ្រ-កោះនរាហ៍ ដែលគ្រោងនឹងបញ្ចប់នៅក្នុងឆ្នាំក្រោយ ដែលគម្រោងក៏សំខាន់មួយនេះនឹងភ្ជាប់ផ្លូវចូលទៅកាន់រាជធានីភ្នំពេញកាន់តែមានភាពងាយស្រួល និងឆាប់រហ័សជាងមុន។
លោកថា “ស្ពានកោះនរាហ៍ភ្ជាប់ទៅកោះពេជ្រ នៅពេលសាងសង់ហើយ នឹងបង្គើតជាផ្លូវចូលទៅកាន់ក្រុងកាន់ តែឆាប់រហ័សបន្ថែមទៀត។ ស្ពានកោះនរាហ៍ឆ្នាំក្រោយនឹងហើយៗ ដូច្នេះនឹងប្រែប្រួលខ្លាំង នៅពេលមានស្ពានហើយ”។
អតិថិជនគោលដៅរបស់គម្រោងបុរីគម្រោងឧទ្យានមង្គលនេះផ្តោតសំខាន់លើ ភាគច្រើនជាអ្នកដែលរស់នៅក្រុងភ្នំពេញ ប្រជាពលរដ្ឋនៅម្តុំផ្លូវជាតិលេខមួយ ប្រជាជននៅក្នុងមូលដ្ឋានកៀនស្វាយ និងមានអ្នកមកពីខេត្តព្រៃវែង និងខេត្តស្វាយរៀងទៀតផង។
លោកថា “ប្រជាជននៅជុំវិញផ្លូវជាតិលេខ១ ជាអតិថិជនគោលដៅមួយហើយ ដូចជា អ្នកផ្សារគគីរ អ្នកព្រែកឯង មានអ្នកមកពីអ្នកលឿង ស្វាយរៀង ព្រៃវែង ក៏មានដែរ”។
ផ្លូវជាតិលេខ១ គឺជាផ្លូវអន្តរជាតិដ៏សំខាន់មួយរបស់កម្ពុជា ដែលតភ្ជាប់ពីទីក្រុងភ្នំពេញកម្ពុជា ទៅកាន់ទីក្រុងហូជីមិញ វៀតណាម ហើយក៏ជាចំណែកមួយនៃផ្លូវអាស៊ានហាយវ៉េ តំបន់ច្រករបៀងសេដ្ឋកិច្ចភាគខាងត្បូង តភ្ជាប់រវាងទីក្រុងបាងកក ភ្នំពេញ ហូជីមិញ ផងដែរ។
ផ្លូវជាតិលេខ១ មានប្រវែងសរុប១៦៧គីឡូម៉ែត្រ (ភ្នំពេញ-អ្នកលឿងប្រវែង៥៦គីឡូម៉ែត្រ និងអ្នកលឿង-បាវិតប្រវែង១១១ គីឡូម៉ែត្រ) ត្រូវបានស្ថាបនាឡើងវិញ ដោយកម្ចីហិរញ្ញប្បទានពីរាជរដ្ឋាភិបាលជប៉ុន រួមមានការសាងសង់ស្ពានអ្នកលឿង ដែលជាស្ពានខ្សែកាប និងវែងជាងគេបង្អស់នៅកម្ពុជា ដែលបានបញ្ចប់នៅឆ្នាំ២០១៥៕
