ដោយ៖ លាងហួរ
វៀតណាម៖ អ្នកជំនាញអចលនទ្រព្យវៀតណាម បានទទូចឱ្យរដ្ឋាភិបាលបញ្ជាក់ពីទិដ្ឋភាពច្បាប់នៃអចលនទ្រព្យបម្រើឱ្យវិស័យទេសចរណ៍ រួមមាន ខុនដូថែល (Condotel) វីឡាទេសចរណ៍ និងផ្ទះអាជីវកម្ម ដើម្បីការពារផលប្រយោជន៍អ្នកទិញនិងអ្នកលក់ ហើយជួយស្តារវិស័យទេសចរណ៍ឡើងវិញ។
លោក Nguyễn Văn Quyền ប្រធានសមាគមគណៈមេធាវីវៀតណាម បានមានប្រសាសន៍ថា ភាពស្របច្បាប់ នៃអចលនទ្រព្យទាំងនេះ ត្រូវតែបញ្ជាក់ឱ្យច្បាស់លាស់ ប៉ុន្តែក្របខ័ណ្ឌច្បាប់នៅតែមិនគ្រប់គ្រាន់ ដែលបង្កជាការលំបាក និងភាពមិនស៊ីសង្វាក់គ្នា ដល់ការគ្រប់គ្រង ដែលធ្វើឱ្យមានការព្រួយបារម្ភទាំងអ្នកវិនិយោគ និងអ្នកអភិវឌ្ឍន៍។
យោងតាមការបញ្ជាក់ពីប្រធានសមាគមរូបនេះ មានការរីកចម្រើនជាច្រើន ក្នុងនោះ មានខុនដូថែល ចំនួន២ម៉ឺន និងវីឡា ចំនួន៥០០០កន្លែង ក្នុង១៥រដ្ឋធានី-ខេត្តទូទាំងប្រទេស ដែលភាគច្រើនសាងសង់រួចរាល់ និងលក់អស់ ប៉ុន្តែកំពុងប្រឈមមុខនឹងបញ្ហាទាក់ទងនឹងផ្លូវច្បាប់។
លោកបណ្ឌិត Cấn Văn Lực សមាជិកក្រុមប្រឹក្សាប្រឹក្សាគោលនយោបាយរូបិយវត្ថុ និងហិរញ្ញវត្ថុជាតិ បានលើកឡើងថា អចលនទ្រព្យទេសចរណ៍ មិនត្រូវបានលើកឡើង នៅក្នុងច្បាប់ភូមិបាលវៀតណាមទេ ដូច្នេះមិនមានសិទ្ធិទទួលបានវិញ្ញាបនបត្រកម្មសិទ្ធិទេ។
លោកបានបន្ថែមថា វាមានសារៈសំខាន់ណាស់ ក្នុងការមានលក្ខណៈវិនិច្ឆ័យច្បាស់លាស់ សម្រាប់ប្រភេទអចលនទ្រព្យទេសចរណ៍នីមួយៗ និងសម្រាប់តំបន់រួម នៅក្នុងអគារផ្ទះល្វែង បន្ទប់ក្រោមដី និងចំណែកនៃថ្លៃថែទាំ។ ទិដ្ឋភាពសំខាន់បំផុត គឺនិយមន័យផលិតផល គោលបំណង ស្តង់ដារបច្ចេកទេស និងភាពជាម្ចាស់អចលទ្រព្យ។
លោកបណ្ឌិត Nguyễn Văn Đính អនុប្រធាន និងជាអគ្គលេខាធិការ នៃសមាគមឈ្មួញជើងសាអចលនវត្ថុវៀតណាម បានមានប្រសាសន៍ថា រដ្ឋាភិបាលគួរតែចេញសារាចរមួយ ដើម្បីដោះស្រាយបញ្ហាផ្លូវច្បាប់ជាបន្ទាន់ ដែលអចលនទ្រព្យទេសចរណ៍កំពុងប្រឈមមុខ ដើម្បីការពារផលប្រយោជន៍របស់អ្នកវិនិយោគ។
យោងតាមសមាគមឈ្មួញជើងសាអចលនទ្រព្យវៀតណាម គិតត្រឹមខែកញ្ញាឆ្នាំមុន ប្រទេសវៀតណាម មានគម្រោងអចលនទ្រព្យទេសចរណ៍ ចំនួន២៣៩ ក្នុងនោះមាន ខុនដូថែលចំនួន១១៤.០៩៧ ផ្ទះវីឡាទេសចរណ៍២៤.៣៩៩ និងហាងទំនិញចំនួន៣០.៨៩៩៕
