ដោយៈ សុផារី
សៀមរាបៈ គិតត្រឹមដំណាច់ត្រីមាសទី២ ឆ្នាំ២០២២នេះ គម្រោងសាងសង់អាកាសយានដ្ឋាន អន្តរជាតិសៀមរាប-អង្គរ សម្រេចបានជិត៣៤ភាគរយ នៃគម្រោងទាំងមូល និងគ្រោងសម្រេចឱ្យបាន៧០ភាគរយនៅដំណាច់ឆ្នាំ២០២២។
នេះបើយោងតាមរបាយការណ៍ ក្នុងឱកាសដែលលោក តឹករ៉េត សំរេច រដ្ឋមន្រ្តីប្រតិភូអមនាយករដ្ឋមន្ត្រី និងជាប្រធានគណៈកម្មការតម្រង់ទិសសម្រាប់ការសាងសង់ អាកាសយានដ្ឋានអន្តរជាតិសៀមរាបថ្មី បានដឹកនាំសមាជិកមាជិកាគណកម្មការ ចុះត្រួតពិនិត្យការសាងសង់ នៅថ្ងៃទី១១ ខែកក្កដា ឆ្នាំ២០២២នេះ។
គម្រោងសាងសង់អាកាសយានដ្ឋាន អន្តរជាតិសៀមរាប-អង្គរ មានវឌ្ឍនភាពការងារគួរឱ្យកត់សម្គាល់ ក្នុងនោះផ្នែកមួយចំនួនដូចជា អនុស្ថានីយអគ្គិសនី ស្ថានីយស្តុកប្រេងឥន្ទន: និងអគារបញ្ជាផ្លូវហោះហើរ សម្រេចបានលើសពី៧០%ហើយ។
ចំណែកផ្នែកសំខាន់ៗធំៗដូចជាស្ថានីយអ្នកដំណើរ និងផ្លូវរត់យន្តហោះកំពុងមមាញឹកសាងសង់ និងបានលេចចេញជារូបរាងធំស្កឹមស្កៃហើយ។
ក្រុមហ៊ុនប្តេជ្ញាសម្រេចឱ្យបាន៥០% នៃគម្រោងទាំងមូលនៅដំណាច់ត្រីមាសទី៣ និង៧០% នៅដំណាច់ឆ្នាំ២០២២៕
