ដោយ វុត្ថា
ភ្នំពេញ៖ រាជរដ្ឋាភិបាលតាមរយៈក្រសួងសាធារណៈការ និងដឹកជញ្ជូន គ្រោងនឹងដាក់ងោយប្រើប្រាស់កម្មវិធីថែទាំផ្លូវ (ROADCARE Mobile App) ក្នុងទូរស័ព្ធដៃនៅថ្ងៃទី១៣ ខែធ្នូ ឆ្នាំ ២០១៨ខាងមុខនេះ ដែលជាផ្នែកមួយជួយសម្រួលដល់ការថែទាំផ្លូវនៅទាំងប្រទេសឲ្យមានប្រសិទ្ធភាពខ្ពស់។
លោកទេសរដ្ឋមន្ត្រីស៊ុន ចាន់ថុល រដ្ឋមន្ត្រីក្រសួងសាធារណៈការ និងដឺកញ្ជូននៅក្នុងវគ្គបណ្តុះបណ្តាលស្ដីពីបច្ចេកទេសប្រើប្រាស់កម្មវិធីថែទាំផ្លូវ (ROAD CARE Mobile App) នៅថ្ងៃទី ១១ ខែធ្នូរនេះបានឲ្យដឹង ការប្រើប្រាស់កម្មវិធីថែទាំផ្លូវ (ROAD CARE Mobile App) ជាទម្រង់អ្នកប្រើប្រាស់ផ្លូវ (Road User) ទម្រង់ក្រុមការងារថែទាំផ្លូវថ្នល់ (Maintenance Team) និងជាទម្រង់ការិយាល័យថែទាំផ្លូវថ្នល់ (Maintenance Office)។
លោកក៏បានជម្រុញអោមន្ត្រីជំនាញពាក់ព័ន្ធនានាទាំងអស់ ត្រូវតែមានសមត្ថភាពគ្រប់គ្រាន់ និងយល់ដឹងពីលំហូរការងារ និងមានចំណេះដឹងបច្ចេកទេសកាន់តែប្រសើរឡើង ក្នុងការប្រើប្រាស់កម្មវិធីនេះឱ្យបានត្រឹមត្រូវ តាមបទដ្ឋានបច្ចេកទេសច្បាស់លាស់ ក្នុងការប្រើប្រាស់កម្មវិធីថែទាំផ្លូវ (ROAD CARE Mobile App) ដើម្បីឱ្យកម្មវិធីនេះទទួលបានលទ្ធផលជាផ្លែផ្កាខ្ពស់។
លោកយិត បុណ្ណា អនុរដ្ឋលេខាធិការ ក្រសួងសាធារណការ និងដឹកជញ្ជូនបានឲ្យដឹងដែរថា កម្មវិធីនេះ នឹងជួយជំរុញការចូលរួមរបស់ប្រជាពលរដ្ឋ ជាពិសេសជំរុញឱ្យមន្ត្រីទទួលបន្ទុកមានសកម្មភាពកាន់តែខ្លាំងក្នុងការងារជួសជុលថែទាំផ្លូវ តាមរយៈការជូនដំណឹង ក៏ដូចជារាយការណ៍អំពីផ្លូវជង្ហុកសំបុកមាន់របស់ប្រជាពលរដ្ឋ សំដៅពន្លឿនការជួសជុលឱ្យបានទាន់ពេលវេលា ដើម្បីកាត់បន្ថយគ្រោះថ្នាក់ចរាចរណ៍ និងជៀសវាងការខូចរាលដាលកាន់តែធំ ដែលនាំឱ្យខាតបង់ថវិកាជាតិកាន់តែច្រើន។
កម្មវិធីនេះ គ្រោងនឹងដាក់ឱ្យប្រើប្រាស់ជាផ្លូវការនៅថ្ងៃទី១៣ ខែធ្នូ ឆ្នាំ២០១៨ ខាងមុខនេះ។ ចំណែកឯកម្មវិធី ROAD CARE Mobile App នឹងអាចទាញយកមកប្រើប្រាស់បានតាម Play Store និង App Store ចាប់ពីថ្ងៃទី១៣ ខែធ្នូ ឆ្នាំ២០១៨ តទៅ៕
