ដោយៈ សុខុម
ក្រុងហ្ស៊ូរិច: ធនាគារជាតិស្វីស (Swiss National Bank) បានទម្លាយឱ្យដឹងកាលពីថ្ងៃច័ន្ទ ទី៣១ ខែតុលា ថា ខ្លួនបានខាតបង់យ៉ាងធ្ងន់ធ្ងរ រហូតដល់ទៅ១៤២,៦០ពាន់លានដុល្លារអាមេរិក ក្នុងរយៈពេល៩ខែដើមឆ្នាំ២០២២។
ការខាតបង់យ៉ាងច្រើនសន្ធឹកសន្ធាប់ មិនធ្លាប់មាននេះកើតមានឡើង ខណៈការដំឡើងអត្រាការប្រាក់ និងការឡើងថ្លៃនៃរូបិយប័ណ្ណហ្វ្រង់ (franc) របស់ស្វីស បានធ្វើឱ្យខាតបង់យ៉ាងច្រើន នូវតម្លៃនៃការវិនិយោគក្រៅប្រទេសរបស់ធនាគារកណ្ដាលមួយនេះ។
ការខាតបង់ដែលធ្ងន់ធ្ងរបំផុត មិនធ្លាប់មានក្នុងប្រវត្តិសាស្ត្រ១១៥ឆ្នាំរបស់ធនាគារជាតិស្វីសនេះ គឺមានទំហំច្រើនជាងផលទុនជាតិសរុប (GDP) ប្រចាំឆ្នាំរបស់ប្រទេសម៉ារ៉ុក ទៅទៀត ដែលមានត្រឹមតែ១៣២ពាន់លានដុល្លារអាមេរិក។
ទោះជាយ៉ាងណា ធនាគារកណ្ដាលនេះ មិនប្រឈមការក្ស័យធន់នោះឡើយដោយសារតែធនាគារនេះ មានសមត្ថភាពខ្ពស់ក្នុងការបង្កើតលុយ។
ការខាតបង់នេះ គឺដោយសារតែមូលបត្របំណុល និងភាគហ៊ុនដែលធនាគារនេះ បានទិញអំឡុងយុទ្ធនាការរបស់ខ្លួន ដើម្បីទប់ការឡើងថ្លៃនៃរូបិយប័ណ្ណហ្វ្រង់ បានធ្លាក់ថ្លៃយ៉ាងគំហុក។
លោក Alessandro Bee អ្នកជំនាញសេដ្ឋកិច្ចធនាគារវិយោគពហុជាតិសាសន៍ USB ដែលមានមូលដ្ឋាននៅប្រទេសស្វីស លើកឡើងថា “ការខាតបង់ទាំងនេះស្ដាប់ទៅដូចច្រើនខ្លាំងណាស់ ក៏ប៉ុន្តែធនាគារជាតិមិនមែនជាក្រុមហ៊ុនធម្មតាៗនោះឡើយ”។
លោក Heinz Taennler នាយកហិរញ្ញវត្ថុនៅទីក្រុង Zug របស់ស្វីសបានថ្លែងប្រាប់ទីភ្នាក់ងារព័ត៌មាន Reuters ថា “ធនាគារជាតិស្វីស មិនមែនជាធនាគារធម្មតានោះឡើយ។ វាជាធនាគារកណ្ដាល ដែលមានកិច្ចការត្រូវធ្វើជាច្រើនផ្សេងទៀត ដូចជា ការរក្សាស្ថានភាពតម្លៃ និងការការពារសេដ្ឋកិច្ចរបស់ប្រទេសស្វីសជាដើម”។
ការលើកឡើងរបស់ក្រុមអ្នកជំនាញខាងលើបង្ហាញថា ទោះបីជាទទួលការខាតបង់ ដែលធ្ងន់ធ្ងរបំផុតមិនធ្លាប់មាន ក្នុងប្រវត្តិសាស្ត្ររាប់រយឆ្នាំយ៉ាងណាក្ដី ក៏ធនាគារជាតិស្វីសធន់ទ្រាំណាស់ គឺមិនដួលរលំដោយងាយៗនោះឡើយ៕ Reuters៕
