ដោយគង់ សូរិយា
ភ្នំពេញ: ក្នុងចំណោមស្ថានទូតនៃបណ្តាប្រទេសជាមិត្តជាង៣០ ដែលបានមានវត្តមាននៅកម្ពុជា គឺមានតែស្ថានទូតជប៉ុនមួយប៉ុណ្ណោះ ដែលបានទទួលយករូបិយប័ណ្ណកម្ពុជា(រៀល)ក្នុងការបង់វីសាដល់ស្ថានទូតនេះ។
លោកហូ វណ្ឌីទីប្រឹក្សាសមាគមទីភ្នាក់ងារទេសចរណ៍កម្ពុជាបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី១៧ ធ្នូកន្លងមកថា ក្នុងចំណោមទូតនៃបណ្តាប្រទេសជាមិត្តកម្ពុជា មានតែស្ថានទូតជប៉ុនមួយប៉ុណ្ណោះ បានទទួលយកលុយរៀលរបស់យើង ដើម្បីទូទាត់លើសេវាកម្មផ្សេងៗជាមួយប្រជាជនកម្ពុជា។
ចំណែកស្ថានទូតប្រទេសជាមិត្ត និងប្រទេសជិតខាងកម្ពុជា ពួកគេមិនយកលុយរៀលទេ ពួកគេយកតែប្រាក់ដុល្លារអាមេរិកប៉ុណ្ណោះ។
លោកបន្តថា “ការទទួលយកលុយរៀលពីស្ថានទូតជប៉ុននៅកម្ពុជា ឆ្លុះបញ្ចាំងពីពួកគេឲ្យតម្លៃអត្តសញ្ញាណកម្ពុជា ឲ្យតម្លៃលើប្រជាជនកម្ពុជា និងឲ្យតម្លៃលើរូបិយប័ណ្ណកម្ពុជា”។
ភ្ញៀវទេសចរណ៍ជប៉ុន ដែលបានមកទស្សនាកម្ពុជាបានកើនឡើងខ្ពស់ ដោយតាមការព្យាករណ៍របស់ក្រសួងទេសចរណ៍ឆ្នាំនេះ កម្ពុជាអាចទទួលបានភ្ញៀវទេសចរណ៍ជប៉ុន៣០ម៉ឺននាក់ ដោយសារការភ្ជាប់ជើងហោះហើរត្រង់ របស់អាកាសចរណ៍ជបុនANAមកកាន់ទីក្រុងភ្នំពេញ។
ភ្ញៀវទេសចរណ៍ជប៉ុន ក៏ស្ថិតក្នុងចំណោមភ្ញៀវជាប់ក្នុងចំណោម Top Ten ដែលជាប្រទេសមានភ្ញៀវមកទស្សនាកម្ពុជាច្រើនជាងគេផងដែរ។
លោកធួន ស៊ីណានប្រធានសមាគមទេសចរណ៍អាស៊ីប៉ាស៊ីហ្វិកបានមានប្រសាសន៍លើកឡើងស្រដៀងគ្នាថា ស្ថានទូតជប៉ុនជាស្ថានទូត ដែលបានចាប់ផ្តើមទទួលយកប្រាក់រៀលរបស់យើង តាំងពីដើមមករហូតមកទល់ពេលនេះ ហើយនេះជាការឲ្យតម្លៃមួ
យពីមិត្តជប៉ុនចំពោះជាតិសាសន៍របស់យើង ក៏ដូចជាឲ្យតម្លៃខ្ពស់ចំពោះទំនាក់ទំនងនៃប្រទេសទាំងពីរ៕
