ដោយៈ ជេស៊ីកា
ភ្នំពេញៈ វាជាសមិទ្ឋផលដ៏គួរឲ្យអបអរសាទរមួយ ដែលយុវជនខ្មែរមួយក្រុមបានផលិតយន្តហោះស្នោលក់ និងទទួលបានការបញ្ជាទិញយ៉ាងច្រើនពីអតិថិជន ប៉ុន្តែក្តីសុបិនរបស់ពួកគេមិនបញ្ចប់ត្រឹមនេះទេ។
គិតចាប់ពីត្រឹមឆ្នាំ២០១៨ មកទល់នឹងចុងឆ្នាំ២០១៩ ក្រុមផលិតយន្តហោះតូចៗពីស្នោរបស់លោក ជឿន ចននី ដែលគេស្គាល់តាមក្រុមឈ្មោះ “គំនិត-Khomnit” បានឆ្លងកាត់ការផលិតយន្តហោះចំនួន៥ ម៉ូដែលមាន (ធុន) ចំនួនសរុបប្រមាណ២០០គ្រឿង តែក៏បានលក់ដាច់អស់គ្មានសល់ ។
បច្ចុប្បន្ន ក្រុមនេះកំពុងតែសស្រោកសស្រាំ ក្នុងការផលិតយន្តហោះតូចៗពីស្នោ សម្រាប់គប់លេងឱ្យអតិថិជន មិនទាន់តាមការកុម្ម៉ង់ឡើយ។
ក្រុមគំនិត ក៏សកម្មនឹងការផលិតយន្តហោះស្នោខ្នាតតូច ដែលអាចបញ្ជាបានតម្លៃ ១ គ្រឿងចន្លោះពី៣០ដុល្លារ ទៅ៤០ដុល្លារឡើង ទៅតាមការកុម្ម៉ង់ និងមានគម្រោងផលិតយន្តហោះស្នោខ្នាតធំទម្ងន់៧គីឡូក្រាម អាចបញ្ជាហោះហើរដូច “ដ្រូន” ទៀតផង។
ស្ថាបនិកក្រុម “គំនិត-Khomnit” វ័យ៣០ឆ្នាំ លោក ជឿន ចននី បានមានប្រសាសន៍ឲ្យដឹងកាលពីចុងសប្តាហ៍មុនថា បច្ចុប្បន្ន យើងផលិតយន្តហោះពីស្នោ ដែលបានប្រើរូបមន្តពិសេស ក្នុងការរក្សាភាពស្វិតបានយូរនៃគុណភាពស្នោ។ យើងបានផលិត២ប្រភេទនៃយន្តហោះស្នោទាំងនេះ។ ទី១ ជាយន្តហោះសម្រាប់គប់លេង និងទី២ ជាយន្តហោះ សម្រាប់បញ្ជាហោះហើរនៅលើអាកាសបានដូចដ្រូន។
លោកបានចននីពន្យល់ថា សម្រាប់យន្តហោះប្រភេទគប់លេងយើងបានផលិត៣ម៉ូដែល គឺប្រភេទ Boeing 747 ម៉ូដែល A350 និងម៉ូដែល A320។ ឯប្រភេទទី ២ គឺយន្តហោះបញ្ជា Airbus A350 remote contor RC ទម្ងន់៧គីឡូក្រាម វាមានប្រវែងជាង៣ម៉ែត្រឯណោះ។
លោកបញ្ជាក់ថា “ប្រភេទយន្តហោះបញ្ជានេះ ខ្ញុំក៏គ្រោងនឹងបន្តការពិសោធបន្ថែមទៀត ហើយលទ្ធផលនឹងដឹងច្បាស់លាស់ក្នុងពេលឆាប់ៗ”។
លោក ចននី ដែលជាកូនកំព្រាឪពុកម្តាយតាំងពីវ័យ៥ឆ្នាំ និងបានរស់នៅមណ្ឌលកុមារកំព្រា រហូតបានរៀនសូត្រចប់ជំនាញព័ត៌មានវិទ្យា ពីវិទ្យាស្ថានជាតិពហុបច្ចេកវិទ្យាកម្ពុជា (NPIC) និងមានទេពកោសល្យយល់ដឹងខ្ពស់ផ្នែកយន្តកម្ម។
ដោយគ្រាន់តែមើលសៀវភៅ ក៏លោកអាចសម្រេចជោគជ័យ ក្នុងការច្នៃផលិតយន្តហោះតូចៗផលិតពីស្នោ តាំងពីឆ្នាំ ២០១៨មក ខណៈគំនិត ផ្តួចផ្តើម និងស្រាវជ្រាវស្វ័យសិក្សាខ្លួនឯង បានចាប់ផ្តើមតាំងពីឆ្នាំ២០០៥ កន្លងមក។
អ្នកច្នៃប្រឌិតរូបនេះ មានស្រុកកំណើតនៅខេត្តកំពង់ចាម និងជាអ្នកដឹកនាំការផលិតយន្តហោះបញ្ជាខ្នាតតូចក្រុម “គំនិត-Khomnit” បញ្ជាក់ពីគោលបំណង ដែលនាំឱ្យលោកផលិតយន្តហោះ បញ្ជាទាំងនេះឡើង គឺដោយសារតែជាចំណង់ចំណូលចិត្តតាំងពីក្មេង និងព្រោះតែលោកមានចំណេះជំនាញផ្នែកមួយនេះផងដែរ។
លោកបញ្ជាក់ថា “ការបង្កើតវាឡើង ក្នុងគោលបំណងចង់ឱ្យប្រជាជនខ្មែរបានប្រើប្រាស់ ប្រភេទយន្តហោះបញ្ជាខ្នាតតូចទាំងនោះ និងចង់ពញ្ញាក់ស្មារតីយុវជនខ្មែរ ក៏ដូចជាប្រជាជនខ្មែរឱ្យស្គាល់ពីគុណតម្លៃ នៃបច្ចេកវិទ្យាក្នុងវិស័យមួយនេះ និងបង្ហាញទៅកាន់បរទេសថា ខ្មែរក៏អាចធ្វើបាន”។
ចំពោះអានុភាពនៃយន្តហោះបញ្ជាពិសេសខ្នាតតូច លោក ចននីបានឱ្យដឹងថា វាមានលក្ខណៈខុសពីផលិតផលផ្សេងៗត្រង់ថា វាមានរាងតូចល្មម សម្រាប់ប្រើប្រាស់ ហើយរូបរាងគឺដូចយន្តហោះមែនទែន ថែមទាំងមានលក្ខណៈងាយស្រួល ក្នុងការដោះផ្គុំ។ ខណៈគ្រឿងផលិតមានលក្ខណៈរឹងមាំ និងទទួលបានការតេស្តយ៉ាងត្រឹមត្រូវ ដើម្បីរក្សាបាននូវគុណភាព។
លោកបញ្ជាក់ថា “ពួកយើងបានផ្តើមពីចំណុចសូន្យ មកដល់បង្កើតបានផលិតផលស្តង់ដាមួយ ដែលមានការវេចខ្ចប់ត្រឹមត្រូវ និងត្រៀមរុញចូលប្រជែងទីផ្សារ ក៏ដោយសារតែការគាំទ្ររបស់បងប្អូន”។
តួយ៉ាងដូចជាយន្តហោះបញ្ជា ANA តម្លៃ៣០$ ល្អលេងមែនទែន។ បញ្ជាបានចម្ងាយ១០០ ម៉ែត្រ មានថ្ម១ វាហោះបាន១៥នាទី ហើយថ្មបញ្ចូលភ្លើងបានងាយស្រួលដោះផ្គុំ ចូលទឹកមិនខូច និងហោះធ្លាក់ក៏មិនបែកបាក់។
ទោះជាយ៉ាងណា មុននឹងឈានមកបង្កើតយន្តបញ្ជាប្រភេទ Airbus A350 remote contor RC ដោយមានទម្ងន់ដល់ទៅ៧គីឡូក្រាម លោក ជឿន ចននី និងសមាជិកចំនួន៧នាក់ ក៏ធ្លាប់បានសាកល្បងជោគជ័យប្រភេទតូចមួយរួចមកហើយ កាលពីពេលកន្លងទៅ ដែលសមត្ថភាពអាចហោះបានក្នុងកម្ពស់ពី៤០ ម៉ែត្រ ទៅដល់៨០ម៉ែត្រ ទើបជាហេតុនាំឱ្យលោកមានគំនិតឈានទៅរកការបង្កើតធុនធំជាងមុន។
លោក ចននី បន្តថា ការរចនាតាមការកុម្ម៉ង់ (Custom Design) តម្លៃត្រឹមតែ៤០$ យើងអាចរចនា តាមការចង់បានរបស់អតិថិជន ដោយគ្រាន់តែផ្ញើlogo មកកាន់យើងជាការស្រេច”។ លោកបន្តថា “គំនិត សូមអរគុណអតិថិជន ជាជនជាតិឥណ្ឌូនេស៊ី ដែលបានគាំទ្រ និងមានទំនុកចិត្តចំពោះផលិតផលរបស់គំនិត”៕
