ដោយវុត្ថា
ភ្នំពេញ៖ រដ្ឋមន្ត្រីទេសចរណ៍លោកថោង ខុនបានជំរុញឲ្យអាកាសចរណ៍វៀតណាមពង្រីកជើងហោះហើរមកកាន់កម្ពុជា ឲ្យបានកាន់តែច្រើនថែមទៀត ដើម្បីជំរុញទេសចរណ៍និងពាណិជ្ជកម្មរវាងប្រទេសទាំងពីរ។
រដ្ឋមន្ត្រីទេសចរណ៍ជំរុញឱ្យក្រុមហ៊ុនអាកាសចរវៀតណាមពង្រីកជើងហោះហើរមកកម្ពុជាឱ្យកាន់តែច្រើន
ក្នុងឳកាសអញ្ជើញជាអធិបតីក្នុងពិធីចែកពានរង្វាន់ ជូនទីភ្នាក់ងារទេសចរណ៍ដែលមានស្នាដៃល្អ ក្នុងការលក់សំបុត្រជូនក្រុមហ៊ុនអាកាសចរ Vietnam Airlines នៅសណ្ឋាគារភ្នំពេញកាលពីរាត្រីថ្ងៃទី១៩ ធ្នូកន្លងមក លោកថោង ខុនបានមានប្រសាសន៍ឲ្យដឹងបន្ថែមថា អត្រាកំណើននៃភ្ញៀវទេសចរ បានកើនឡើងជាទីមោទនៈនេះ គឺសម្រេចបានដោយសារកត្តាសុខសន្តិភាពពេញលេញ និងដោយសារគោលនយោបាយបើកចំហជើងមេឃ របស់រាជរដ្ឋាភិបាលកម្ពុជា ការបើកច្រកព្រំដែនអន្តរជាតិកាន់តែទូលំទូលាយ ជាមួយបណ្តាប្រទេសជិតខាង និងកិច្ចប្រឹងប្រែងយ៉ាងខ្លាំងក្លារបស់ស្ថាប័នពាក់ព័ន្ធ ក្នុងការសំរួលការធ្វើដំណើរ និងដឹកជញ្ជូនតាមច្រកទ្វារអន្តរជាតិនានា។
លោកបន្តថា“ឧស្សាហកម្មដឹកជញ្ជូននិងធ្វើដំណើរ ជាដៃគូមិនអាចខ្វះបានក្នុងការរុញដោល និងអភិវឌ្ឍវិស័យទេសចរណ៍ ពាណិជ្ជកម្ម ទំនាក់ទំនងរវាងប្រជាជន និងប្រជាជន។ លោកបន្តថា “ការដឹកជញ្ជូនតាមផ្លូវអាកាស ក៏មានការកើនឡើងគួរឱ្យកត់សម្គាល់ ដោយឈរលើគោលការណ៍សុវត្ថិភាពខ្ពស់ និងចំណេញពេលវេលាធៀបនឹងមធ្យោបាយផ្សេងៗទៀត។ ដើម្បីទ្រទ្រង់ដល់ការរីកលូតលាស់នៃវិស័យទេសចរណ៍ ឱ្យកាន់តែខ្លាំងក្លាថែមទៀត ការអភិវឌ្ឍ និងធ្វើទំនើបកម្មមធ្យោបាយដឹកជញ្ជូន ទាំងផ្លូវអាកាស ផ្លូវគោក ផ្លូវទឹក និងផ្លូវដែក ហេដ្ឋារចនាសម្ព័ន្ធទ្រទ្រង់ (ព្រលានយន្តហោះ កំពង់ផែ ចំណត) និងបច្ចេកវិទ្យាក្នុងវិស័យដឹកជញ្ជូន គឺជាកត្តាកំណត់ចាំបាច់សំរាប់និរន្តរភាព នៃវិស័យទេសចរណ៍។
លោករដ្ឋមន្ត្រីបានបន្តឲ្យដឹងទៀតថា ក្រុមហ៊ុនអាកាសចរ Vietnam Airlines បាននឹងកំពុងពង្រឹងប្រតិបត្តិការខ្លួន តាមរយៈការដាក់ឲ្យប្រើប្រាស់យន្តហោះទំនើបៗ ដូចជា B787 Dreamliner, Airbus A350, A321 នោះ ដូច្នេះលោកក៏បានសំណូមពរឲ្យក្រុមហ៊ុនមេត្តាយកចិត្តទុកដាក់ ពង្រីកជើងហោះហើរ ពីប្រទេសវៀតណាមមកកាន់រាជធានីភ្នំពេញ តំបន់សៀមរាប តំបន់ឆ្នេរសមុទ្រ និងតំបន់កោះសំខាន់ៗ របស់កម្ពុជាឲ្យកាន់តែខ្លាំងក្លាថែមទៀត។
បច្ចុប្បន្នមានជើងហោះហើរពីវៀតណាម មកកម្ពុជាសរុប២៣លើកក្នុងមួយថ្ងៃ សៀមរាប-ហូជីម៉ិញ ៦ជើង សៀមរាប-ហាណូយ ៦ជើង, ភ្នំពេញ-ហូជីម៉ិញ៥ជើង ក្រៅពីនោះមានជើងហោះហើរសៀមរាប-ដាណាង និងព្រះសីហនុ-ហូជីមិញផងដែរ ដែលភាគច្រើនប្រតិបត្តិការដោយក្រុមហ៊ុន Vietname Airline ក្រុមហ៊ុនអាកាសចរជាតិកម្ពុជាអង្គរអ៊ែរ ក្រុមហ៊ុន Vietjet ក្រុមហ៊ុនអាកាសចរ Silk Air និងក្រុមហ៊ុនអាកាសចរQatar Airways៕
