ដោយ : ស៊ីវ ម៉េង
ភ្នំពេញ : ក្រុមហ៊ុនមួយមានមូលដ្ឋាននៅក្រុងម៉ាកាវ ប្រទេសចិនបានប្រកាសវិនិយោគរមណីយដ្ឋានសមាហរណកម្មនៅខេត្តសៀមរាប ដែលជាគំរោងគ្របដណ្តប់លើផ្ទៃដីជាង១០០០ហិកតា។
ក្រុមហ៊ុន Macau Legend Development Limited ដែលមានចុះបញ្ជីនៅផ្សារហ៊ុនក្រុងហុងកុងបានប្រកាសកាលពីថ្ងៃទី៣១ ធ្នូ ឆ្នាំ២០១៨កន្លងមកថា ក្រុមហ៊ុននេះបានទិញភាគហ៊ុនទាំងអស់របស់ក្រុមហ៊ុនHowing Enterprises នៅកម្ពុជាក្នុងតម្លៃ៩០ លានដុល្លារ ក្នុងគោលបំណងអភិវឌ្ឍរមណីយដ្ឋានសមាហរណកម្ម (IR) នៅខេត្តសៀមរាប។
យោងតាមឯកសារចេញផ្សាយ លើគេហទំព័រផ្សារហ៊ុនក្រុងហុងកុង (HKEX)ហើយត្រូវបានចុះផ្សាយ ដោយកាសែតភ្នំពេញប៉ុស្ត៍បានឲ្យដឹងថា ក្រុមហ៊ុន Howing គឺជាក្រុមហ៊ុនដែលកាន់កាប់ដីជាច្រើនកន្លែង ដែលមានចំនួនសរុប១២០០ហិកតា។ ដីនេះនឹងត្រូវបានផ្ទេរទៅឲ្យក្រុមហ៊ុន Macau Legend Development តាមរយៈការផ្ទេរភាគហ៊ុនដែលត្រូវបានលក់នេះទៅឲ្យក្រុមហ៊ុន Sky Force ដែលជាក្រុមហ៊ុនបុត្រសម្ព័ន្ធរបស់ខ្លួន។
ប្រធាននាយកប្រតិបត្តិ Macau Legend Development លោក Chow Kam Fai បានឲ្យដឹងថា ការទិញដីនេះមានបំណងសាងសង់ និងអភិវឌ្ឍរមណីយដ្ឋានសមាហរណកម្មនៅខេត្តសៀមរាប ដែលអាចឲ្យក្រុមហ៊ុនចូលរួម និងទទួលនូវអត្ថប្រយោជន៍ពីឧស្សាហកម្មទេសចរណ៍ដែលកំពុងរីកចម្រើនរបស់កម្ពុជា។
លោកឲ្យដឹងបន្តថា “ក្រុមប្រឹក្សាភិបាលចាត់ទុកថា លក្ខខណ្ឌនៃការទិញលក់នេះត្រឹមត្រូវ និងសមហេតុផល ហើយការទិញនេះស្ថិតក្នុងផលប្រយោជន៍របស់ក្រុមហ៊ុន និងភាគទុនិកទាំងអស់របស់ខ្លួន”។
ទោះជាយ៉ាងណាក្រុមហ៊ុនរៀបចំផែនការប្រើប្រាស់ដី ដើម្បីអភិវឌ្ឍរមណីយដ្ឋាន សមាហរណកម្មនៅសៀមរាបក្តី ក៏ក្រុមហ៊ុននេះមិនបានបញ្ជាក់នោះទេថា តើរមណីយដ្ឋាននេះ នឹងមានសកម្មភាពកាស៊ីណូឬការភ្នាល់ល្បែងឬអត់នោះទេ ប៉ុន្តែតាមមន្រ្តីជំនាញបានអះអាងថារដ្ឋាភិបាលមិនអនុញ្ញាត្តឲ្យមានការបើកកាស៊ីណូ និងល្បែងភ្នាល់ណាមួយនៅខេត្តសៀមរាបនោះទេ៕
