ដោយគង់ សូរិយា
ភ្នំពេញ៖ ជាដំណឹងល្អមួយសម្រាប់ប្រជាពលរដ្ឋ ស្របពេលក្រសួងពាណិជ្ជកម្មកម្ពុជាបានឲ្យដឹងថា គិតចាប់ពីថ្ងៃទី០១ ដល់១៥ ខែមករា ឆ្នាំ២០១៩ តម្លៃប្រេងសាំងធម្មតា និងប្រេងម៉ាស៊ូត តាមបណ្តាស្ថានីយធំៗទូទាំងប្រទេសបានបន្តធ្លាក់ចុះត្រឹមតែ៣.២០០រៀលប៉ុណ្ណោះក្នុងមួយលីត្រ។
យោងតាមសេចក្តីជូនដំណឹងរបស់ក្រសួងពាណិជ្ជកម្មស្តីពី ថ្លៃលក់រាយប្រេងឥន្ធនៈនៅតាមស្ថានីយ៍បានឲ្យដឹងនៅរសៀលថ្ងៃទី២ ខែមករានេះថា ដើម្បីជួយសម្រួលដល់ជីវភាពរបស់ប្រជាជន និងដោយមានការរួមចំណែកពីក្រុមហ៊ុនចែកចាយប្រេងឥន្ធនៈនៅកម្ពុជា ប្រមុខរាជរដ្ឋាភិបាលដឹកនាំដោយសម្តេចនាយករដ្ឋមន្ត្រីតេជោ ហ៊ុន សែន បានសម្រេចបញ្ចុះតម្លៃ លក់រាយប្រេងឥន្ធនៈនៅកម្ពុជាចំនួន៤សេន ឬស្មើ២០០រៀលក្នុងមួយលីត្រ ដែលធ្វើឲ្យថ្លៃលក់រាយប្រេងឥន្ធនៈ នឹងត្រូវលក់៣.២០០រៀលក្នុងមួយលីត្រ សម្រាប់សាំងធម្មតា EA92 និង៣.២០០រៀល ក្នុងមួយលីត្រសម្រាប់ប្រេងម៉ាស៊ូត។
ក្រសួងពាណិជ្ជកម្មមិនមែន ជាអ្នកកំណត់ថ្លៃលក់រាយប្រេងឥន្ធនៈនៅកម្ពុជាទេ គឺក្រសួងគ្រាន់តែស្រង់តម្លៃឡើង-ចុះ នៃប្រេងតាមទីផ្សារអន្តរជាតិមកគណនាតាមប្រកាសដូចមានក្នុងឯកសារបង្ហាញស្រាប់។
គួររម្លឹកទៀតថា ក្នុងចន្លោះថ្ងៃទី១៦ ដល់៣១ ខែធ្នូ ឆ្នាំ២០១៨កន្លងទៅ តម្លៃលក់រាយប្រេងឥន្ធនៈ (ប្រេងសាំងធម្មតា និងប្រេងម៉ាស៊ូត) ថ្លៃ ៣.៣៥០រៀល នៅក្នុងមួយលីត្រ៕
