បន្ទាប់ពីបានពិនិត្យពីសំណាក់មន្ត្រីជំនាញយ៉ាងត្រឹមត្រូវមួយរយៈកន្លងទៅនេះ នៅត្រឹមសប្ដាហ៍ទី២ នៃខែមករា ឆ្នាំ២០១៩នេះ គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC បានសម្រេចចេញវិញ្ញាបនប័ត្រចុះបញ្ជីជាស្ថាពរជូនដល់ក្រុមហ៊ុនចំនួន៣ ទៅតាមសំណើសុំវិនិយោគរបស់ក្រុមហ៊ុន ដែលមានទំហំទឹកប្រាក់សរុបប្រមាណជាង២០លានដុល្លារ ។
សម្រាប់ក្រុមហ៊ុនទាំង៣ ដែលទទួលបានការចុះបញ្ជីពីសំណាក់ CDC ខាងលើនេះរួមមាន ៖
១) “MILLENNIUM PLASTIC AND METAL PRODUCTS CO.,LTD.” គម្រោងបង្កើតរោងចក្រផលិតគ្រឿងបន្សំស្បែកជើង ដែលមានទីតាំងវិនិយោគស្ថិតនៅភូមិអង្គរោង ឃុំមហាឫស្សី ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ២,១២លានដុល្លារអាមេរិក និងអាចបង្កើតការងារបានចំនួន ២០៥កន្លែង។
២) “THE SOUL GEAR (CAMBODIA) CO.,LTD.” គម្រោងបង្កើតរោងចក្រផលិតកាបូប និងកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិទួលសាលា ឃុំព្រៃពួច ស្រុកអង្គស្នួល ខេត្តកណ្តាល មានទុន វិនិយោគប្រមាណ ១៤,៩៨លានដុល្លារអាមេរិក និងអាចបង្កើតការងារបានចំនួន ៣.៩០៤កន្លែង។
៣) “JIE RUI FENG (CAMBODIA) LEATHER CO.,LTD.” គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅផ្លូវជាតិលេខ៥១ ភូមិអង្គតាសិត ឃុំទួលព្រេជ ស្រុកអង្គស្នួល ខេត្ត កណ្តាល មានទុនវិនិយោគប្រមាណ ៣,៦៥លានដុល្លារអាមេរិក និងអាចបង្កើតការងារបានចំនួន ៨៩០កន្លែង៕
