ដោយ: គង់ លាងហួរ
អន្តរជាតិ: យោងតាមរបាយការណ៍របស់ធនាគារអភិវឌ្ឍន៍អាស៊ី (ADB) បានឱ្យដឹងថា តំបន់អាស៊ានត្រូវតែពង្រឹងជំហររបស់ពួកគេនៅក្នុងខ្សែសង្វាក់តម្លៃសកល ដើម្បីពង្រឹងភាពធន់នឹងបញ្ហាប្រឈមថ្មីៗ រួមទាំងជំងឺរាតត្បាតនាពេលអនាគត អស្ថិរភាពភូមិសាស្ត្រនយោបាយ និងការប្រែប្រួលអាកាសធាតុ។
យោងតាមប្រធានធនាគារអភិវឌ្ឍអាសុី (ADB) លោក Masatsugu Asakawa បានមានប្រសាសន៍ឱ្យដឹងថា របាយការណ៍នេះស្នើវិធានការជាក់ស្តែងដែលរដ្ឋាភិបាល និងអាជីវកម្មអាចចាត់វិធានការដើម្បីកាត់បន្ថយកាបូនចេញពីខ្សែសង្វាក់តម្លៃសកល។
លោកបានបន្តថា “ការវិនិយោគលើថាមពលកកើតឡើងវិញ និងការធ្វើឱ្យប្រសើរឡើងនូវប្រសិទ្ធភាព ការលើកទឹកចិត្តដើម្បីកាត់បន្ថយថ្លៃដើមជួញដូរសម្រាប់ទំនិញឆ្លាតវៃអាកាសធាតុ និងការបង្កើនល្បឿននៃការបង្កើតឌីជីថលអាចរួមចំណែកដល់ខ្សែសង្វាក់តម្លៃឱ្យកាន់តែបៃតង និងមាននិរន្តរភាពនៅក្នុងតំបន់អាស៊ាន និងលើសពីនេះ”។
អាស្រ័យហេតុនេះ តំបន់អាស៊ានត្រូវការកសាងភាពធន់កាន់តែខ្លាំងនៅក្នុងផ្នែកខ្សែសង្វាក់តម្លៃសកលរបស់ខ្លួន ស្របពេលដែលពង្រីកពាណិជ្ជកម្ម ការវិនិយោគ និងសមាហរណកម្មក្នុងតំបន់។
របាយការណ៍នេះក៏បានរកឃើញថា អត្ថប្រយោជន៍ប្រកួតប្រជែងនៃការប្រើប្រាស់កម្លាំងពលកម្មជំនាញទាបបានថយចុះស្របពេលដែលបច្ចេកវិទ្យាថ្មីធ្វើឱ្យប្រសើរឡើងនូវខ្សែសង្វាក់តម្លៃសកល។ ដូច្នេះហើយ តំបន់ត្រូវតែបង្កើតចំនួនកម្មករដ៏សំខាន់ដែលមានបច្ចេកវិជ្ជា និងជំនាញបច្ចេកវិជ្ជាចុងក្រោយបង្អស់។
របាយការណ៍បានបន្ថែមថា “សេដ្ឋកិច្ចតំបន់អាស៊ានចាំបាច់ត្រូវក្លាយទៅជាបៃតង ហើយពួកគេគួរតែពន្លឿនការធ្វើពាណិជ្ជកម្មឌីជីថល និងលើកកម្ពស់ពាណិជ្ជកម្មឆ្លាតវៃអាកាសធាតុ ហេដ្ឋារចនាសម្ព័ន្ធដឹកជញ្ជូនពណ៌បៃតង និងការកំណត់តម្លៃកាបូន”៕
