ដោយ: គង់ លាងហួរ
សេអ៊ូល: ប្រទេសកូរ៉េខាងត្បូងគ្រោងកាត់បន្ថយចំនួនផ្ទះទំនេរនៅតំបន់ជនបទពាក់កណ្តាលដល់៣៣.០០០ខ្នង នៅឆ្នាំ២០២៧ ដោយពង្រីកការផ្តល់ហិរញ្ញប្បទានគោលនយោបាយសម្រាប់ការជួសជុល និងបង្កើតច្បាប់ពិសេស និងមូលដ្ឋានទិន្នន័យរួមបញ្ចូលគ្នាដើម្បីលើកកម្ពស់ការជួសជុល និងប្រតិបត្តិការ។
បច្ចុប្បន្ននេះ ចំនួនផ្ទះដែលគ្មានការកាន់កាប់ និងគ្មានការរុះរើនៅតាមទីជនបទ មានចំនួនប្រហែល៦៦.០០០ខ្នង ដោយតួលេខនេះបានកើនឡើងឥតឈប់ឈរក្នុងប៉ុន្មានឆ្នាំថ្មីៗនេះ ចំពេលចំនួនប្រជាជនធ្លាក់ចុះ និងការកើនឡើងនៃចំនួនប្រជាជនដែលផ្លាស់ទៅទីក្រុងដើម្បីស្វែងរកការងារ និងឱកាសផ្សេងៗទៀត។
អចលនទ្រព្យទាំងអស់នោះបានជះឥទ្ធិពលអវិជ្ជមានដល់បរិស្ថាន និងកិច្ចខិតខំប្រឹងប្រែងដើម្បីស្តារតំបន់ជនបទឡើងវិញ។
ដោយបង្ហាញពីផែនការរយៈពេលវែងជាងមុន ក្រសួងកសិកម្មបានប្ដេជ្ញាថា ខ្លួននឹងចាប់ផ្តើមគម្រោងមួយក្នុងខែមិថុនា ដើម្បីជួសជុលផ្ទះប្រជាពលរដ្ឋ ដោយសហការជាមួយម្ចាស់ និងក្រុមហ៊ុនឯកជន ដើម្បីប្រែក្លាយផ្ទះទាំងនោះទៅជាផ្ទះជួល ឬកន្លែងសាធារណៈ ដូចជាមជ្ឈមណ្ឌលសហគមន៍ជាដើម។
យោងតាមក្រសួងបានឱ្យដឹងថា រដ្ឋាភិបាលនឹងជំរុញឱ្យដាក់ចេញនូវគោលនយោបាយហិរញ្ញប្បទានសម្រាប់ការផ្លាស់ប្តូរថ្មី សម្រួលបទប្បញ្ញត្តិពាក់ព័ន្ធ និងអនុម័តច្បាប់ពិសេសមួយសំដៅពង្រឹងការគ្រប់គ្រងរបស់ពួកគេ។
យោងទៅតាមច្បាប់ ផ្ទះ និងរចនាសម្ព័ន្ធនៅក្នុងភូមិកសិកម្ម និងនេសាទដែលនៅតែមិនប្រើប្រាស់លើសពីមួយឆ្នាំ ត្រូវបានកំណត់ថាជាកន្លែងទំនេរ៕
