ដោយៈ ជេស៊ីកា
ព្រះសីហនុៈ សម្តេចតេជោ ហ៊ុន សែននាយករដ្ឋមន្រ្តីនៃកម្ពុជាបានលើកឡើងនូវមូលដ្ឋានសំខាន់ៗមួយចំនួន ដែលកម្ពុជាសម្រេចចូលរួមក្នុងគំនិតផ្តួចផ្តើមខ្សែក្រវ៉ាត់ និងផ្លូវរបស់ប្រទេសចិន។
សម្តេចបានថ្លែងក្នុងពិធីសម្ភោធរោងចក្រផលិតកង់រថយន្ត និងសំណេះសំណាលជាមួយកម្មករជាង៣០,០០០នាក់កាលពីថ្ងៃទី២២ ឧសភាថា មានលក្ខខណ្ឌចំនួន៣ ដែលនាំឱ្យកម្ពុជាក្លាយជាសមាជិកនៃគំនិតផ្តួចផ្តើម “ខ្សែក្រវាត់ និងផ្លូវ” របស់ចិន រួមមាន ទី១ ការរក្សាបានសន្តិភាព និងអភិវឌ្ឍន៍, មិនប្រឆាំងប្រទេសដទៃ និងការគោរពមជ្ឈភាពរបស់អាស៊ាន។ ទី២ គំនិតផ្តួចផ្តើមនេះ បានផ្តល់ផលប្រយោជន៍សម្រាប់ប្រជាពលរដ្ឋកម្ពុជាផងដែរ។ ទី៣ គំនិតផ្តួចផ្តើម “ខ្សែក្រវាត់ និងផ្លូវ” នាំឱ្យកើតមានសមិទ្ធផលជាច្រើន នៅកម្ពុជាដូចជា ពហុកីឡដ្ឋានជាតិមរតកតេជោ ផ្លូវល្បឿនលឿន ការតភ្ជាប់អ៊ីនធើណេតកប់ក្រោមបាត់សមុទ្រ និងផ្លូវ ស្ពានជាច្រើនខ្សែទៀត។
ក្នុងឱកាសពិសេសនេះផងដែរ សម្តេចតេជោ ហ៊ុន សែន បានប្រកាសផ្តល់គោលនយោបាយ គាំពារដល់កម្មការិនី មានផ្ទៃពោះ ឧបត្ថម្ភថវិកាចាប់ពីមានផ្ទៃពោះ រហូតដល់កូនអាយុ២ឆ្នាំ។
សម្តេចតេជោបានបន្តថា ការឧបត្ថម្ភថវិកាដល់កម្មការិនីចាប់ពីមានផ្ទៃពោះ រហូតដល់កូនអាយុ២ឆ្នាំ ជាគោលនយោបាយជាក់លាក់ មិនមែនឆក់កណ្តៀត ឬជាសន្យាខ្យល់នោះទេ។
សម្តេចតេជោ ហ៊ុន សែនបញ្ជាក់ថា “ការពារសន្តិភាពឱ្យបាន គឺមិនបារម្ភរឿងអត់ការងារធ្វើនោះទេ ក្នុងនោះមានតែគណបក្សប្រជាជនកម្ពុជាប៉ុណ្ណោះ ដែលអាចការពារសន្តិភាព និងការពារឆ្នាំងបាយរបស់ប្រជាពលរដ្ឋ និងបងប្អូនកម្មករកម្មការិនី”៕