ដោយ: គង់ លាងហួរ
អន្តរជាតិ: ក្រុមហ៊ុនអាកាសចរណ៍ AirAsia Cambodia ដែលជាបុត្រសម្ព័ន្ឋរបស់AirAsiaនៅកម្ពុជា និងជាក្រុមហ៊ុនអាកាសចរណ៍ឈានមុខគេមួយក្នុងតំបន់ គ្រោងនឹងចាប់ផ្តើមហោះហើរ នៅក្នុងត្រីមាសទី៤ ឆ្នាំ២០២៣នេះ។
ដំណឹងនេះបានកើតឡើង ស្របពេលក្រុមហ៊ុន Capital A Berhad ដែលជាម្ចាស់ភាគហ៊ុនធំជាងគេ នៅក្នុងក្រុមហ៊ុន AirAsia បានរៀបចំកិច្ចប្រជុំទូទៅប្រចាំឆ្នាំ (AGM) របស់ខ្លួននៅទីក្រុង Sepang ប្រទេសម៉ាឡេស៊ីកាលពីថ្ងៃចន្ទដើមសប្តាហ៍នេះ។ថ្លែងទៅកាន់ប្រព័ន្ធផ្សព្វផ្សាយ បន្ទាប់ពីកិច្ចប្រជុំនោះ អគ្គនាយកក្រុមហ៊ុន Capital A Berhad លោក Tony Fernandes បានអះអាងថា “ក្រុមហ៊ុន AirAsia Cambodia នៅតែស្ថិតនៅលើផ្លូវដើម្បីចាប់ផ្តើមបើកការហោះហើរក្នុងត្រីមាសទី៤ ឆ្នាំនេះ ហើយក្រុមហ៊ុន Capital A កំពុងសម្លឹងឆ្ពោះទៅរកទីផ្សារថ្មីផ្សេងៗទៀត ទាំងអស់នៅទូទាំងតំបន់អាស៊ីអាគ្នេយ៍”។
ក្រុមហ៊ុន Capital A Berhad កាន់កាប់ភាគហ៊ុន ចំនួន៥១ភាគរយរបស់ក្រុមហ៊ុនAirAsia Cambodia ខណៈក្រុមហ៊ុនបដិសណ្ឋារកិច្ច Sivilai Asia កាន់កាប់ភាគហ៊ុនដែលនៅសល់។
ជាក់ស្តែងក្រុមហ៊ុន AirAsia Aviation Group Limited ដែលជាក្រុមហ៊ុនអាកាសចរណ៍របស់ Capital A Berhad បានចុះហត្ថលេខាលើកិច្ចព្រមព្រៀងបណ្តាក់ទុនរួមគ្នា ជាមួយក្រុមហ៊ុន Sivilai Asia រួចមកហើយ។
លោក Tony Fernandes នាយកប្រតិបត្តិនៃក្រុមហ៊ុន Capital A ធ្លាប់បានឱ្យដឹងក្នុងពិធីចុះហត្ថលេខាថា Capital A នឹងបន្តផ្តោតលើតំបន់អាស៊ាន ហើយកម្ពុជាជាប្រទេសអាស៊ានទី៥ ដែលឈានមុខគេទាំងការដឹកភ្ញៀវ និងទំនិញក្នុងតំបន់ និងផ្តល់ជាចំណុចស្នូលនៃកំណើនសេដ្ឋកិច្ច សម្រាប់ប្រទេសក្នុងតំបន់អាស៊ាន៕