ដោយ វុត្ថា
ភ្នំពេញ៖ រាជរដ្ឋាភិបាលកម្ពុជាបានចេញអនុក្រឹត្យ លើកទឹកចិត្តពន្ធដារក្នុងវិស័យមូលបត្រត្រូវបានអនុម័ត ដែលជាការលើកទឹកចិត្តពន្ធដារ និងសហគ្រាស បោះផ្សាយលក់មូលបត្រកម្មសិទ្ធិ និងមូលបត្របំណុលជាសាធារណៈលើកដំបូង។
អនុក្រឹត្យនេះបានលើកទឹកចិត្តក្រុមហ៊ុន/សហគ្រាសអាចទទួលបានការកាត់បន្ថយពន្ធលើប្រាក់ចំណូលចំនួន ៥០ភាគរយ នៃពន្ធប្រាក់ចំណូលក្នុងរយៈកាលនៃការលើក ៣ឆ្នាំដំបូង។
យោងតាមអនុក្រឹត្យលេខ ២៤ អនក្រ បក ចុះហត្ថលេខាដោយសម្តេចតេជោនាយករដ្ឋមន្រ្តីនៃព្រះរាជាណាចក្រកម្ពុជាកាលពីថ្ងៃទី៤ មករា ឆ្នាំ២០១៩នេះបានឲ្យដឹងថា អនុក្រឹត្យស្តីពីការលើកទឹកចិត្តពន្ធដារ ក្នុងវិស័យមូលបត្រ និងបទប្បញ្ញត្តិពាក់ព័ន្ធថ្មីៗដែលរួមមានដូចជា៖ (១) អនុក្រឹត្យស្តីពីបុននីតិសម្បទា និងការជម្រះបញ្ជីក្នុងវិស័យមូលបត្រ (២)ប្រកាសស្តីពីការផ្តល់អាជ្ញាបណ្ណ និងការគ្រប់គ្រងអាជីវកម្មគម្រោងវិនិយោគរួម (៣) ប្រកាសស្តីពីការផ្តល់ការអនុញ្ញាត ដល់ក្រុមហ៊ុនចែកចាយលក់មូលបត្រ និងភ្នាក់ងារចែកចាយលក់មូលបត្រ (៤) ប្រកាសស្តីពីការផ្តល់អាជ្ញាបណ្ណ និងការគ្រប់គ្រងអាជីវកម្មមូលបត្រ (៥) ប្រកាសស្តីពីកាតព្វកិច្ចផ្តល់របាយការណ៍ ការជូនដំណឹង និងការស្នើសុំការអនុញ្ញាតរបស់ក្រុមហ៊ុនមូលបត្រ និងក្រុមហ៊ុនទីប្រឹក្សាវិនិយោគ។
អនុក្រឹត្យថ្មីនេះ ក៏បានរួមបញ្ចូលទាំងការអនុគ្រោះ ទៅលើបំណុលពន្ធលើប្រាក់ចំណូល ពន្ធកាត់ទុក អាករលើតម្លៃបន្ថែម អាករពិសេសលើទំនិញ និងសេវាកម្មមួយចំនួន អាករស្នាក់នៅ និងអាករបំភ្លឺផ្លូវ។ ជាពិសេស វិនិយោគិន ក៏បានទទួលនូវការកាត់បន្ថយពន្ធកាត់ទុក ៥០ភាគរយ លើការប្រាក់ និងភាគលាភផងដែរ ចំពោះការវិនិយោគលើមូលបត្របំណុល និងមូលបត្រកម្មសិទ្ធិនៅប្រទេសកម្ពុជា។
ការបោះផ្សាយលក់មូលបត្រជាសាធារណៈ ផ្តល់អត្ថប្រយោជន៍ជាច្រើនដល់ក្រុមហ៊ុន និងសហគ្រាសដូចជា ការទទួលបានដើមទុនដើម្បីពង្រីកអាជីវកម្ម ការពង្រឹងសមត្ថភាពប្រកួតប្រជែង ការទទួលស្គាល់ជាសាធារណៈ ការកែលម្អលក្ខខណ្ឌហិរញ្ញវត្ថុរបស់ក្រុមហ៊ុន, ការពង្រឹងអភិបាលកិច្ចអាជីវកម្ម និងអត្ថប្រយោជន៍ជាច្រើនទៀត៕
