ដោយ គង់ សូរិយា
ភ្នំពេញ៖ ក្រសួងពាណិជ្មកម្មកម្ពុជាបានអះអាងថា សហភាពអឺរ៉ុបត្រូវការរយៈពេល១៨ខែ ដើម្បីដំណើរការនីតិវិធីព្យួរជាបណ្ដោះអាសន្ន នូវប្រព័ន្ធអនុគ្រោះពន្ធ (EBA) ខណៈកម្ពុជា បានត្រៀមលក្ខណៈទទួលយករួចជាស្រេចហើយនោះ។
បន្ទាប់សហភាពអឺរ៉ុបកាលពីថ្ងៃទី១២ ខែកុម្ភៈ ឆ្នាំ២០១៩ បានប្រកាសជាផ្លូវការនូវការចាប់ផ្តើមដំណើរការនីតិវិធីព្យួរជាបណ្ដោះអាសន្ន នូវប្រព័ន្ធអនុគ្រោះពន្ធលើកមុខទំនិញមកលើកម្ពុជានោះ ក្រសួងពាណិជ្ជកម្ម បានចេញសេចក្តីប្រកាសព័ត៌មាននៅយប់ថ្ងៃដដែលដោយបញ្ជាក់ថា សហភាពអឺរ៉ុបមិនបានចាប់ផ្តើមព្យួរប្រព័ន្ធអនុគ្រោះពន្ធភ្លាមៗ ឬជាស្វ័យប្រវត្តិនោះឡើយ តែជាពេលវេលាដែលចាប់ផ្តើមបើកនីតិវិធី ពិគ្រោះយោបល់ជាផ្លូវការតែប៉ុណ្ណោះ ដែលប្រការនេះ EU ត្រូវការពេលវេលាចំនួន១៨ខែទៀត។
សេចក្តីប្រកាសព័ត៌មានដដែលបានបន្តថា រយៈពេលគិតចាប់ពីការចាប់ផ្តើម រហូតដល់ការចូលជាធរមាន នៃសេចក្តីសម្រេចចុងក្រោយណាមួយនោះ គឺមានរយៈពេល១៨ខែ គិតចាប់ពីថ្ងៃទី១២ ខែកុម្ភៈ ឆ្នាំ២០១៩នេះតទៅ។ រយៈពេលដំណើរការនេះ នឹងត្រូវបានកំណត់ជា ២ដំណាក់កាល។ ដំណាក់កាលទី១ មានរយៈពេល៦ខែ ជាដំណាក់កាលដំបូង ដែលគណៈកម្មការអឺរ៉ុបបន្តពិភាក្សាជាមួយរាជរដ្ឋាភិបាលកម្ពុជា និងភាគីពាក់ព័ន្ធ ដើម្បីស្វែងយល់បន្ថែមពីវឌ្ឍនភាព នៃការអនុវត្តកាតព្វកិច្ចក្នុងបទបញ្ញតិ្តលេខ ៩៧៨/២០១២។
ដំណាក់កាលទី២មានរយៈពេល៦ខែ គណៈកម្មការអឺរ៉ុបពិនិត្យនិងឃើញថា កម្ពុជាបានបង្ហាញ ពីវឌ្ឍនភាពនៃការងារទាក់ទង នឹងការព្រួយបារម្ភរបស់សហភាពអឺរ៉ុបនោះ ហើយគណៈកម្មការអឺរ៉ុបយល់ថា របាយការណ៍នោះពិតជាមានវឌ្ឍនភាពគ្រប់គ្រាន់ នោះគណៈកម្មាធិការ នឹងទម្លាក់ចោលនូវចេតនាព្យួរជាបណ្តោះអាសន្ន នូវប្រព័ន្ធអនុគ្រោះពន្ធ ហើយចេញសេចក្តីសម្រេចចិត្តបញ្ចប់នីតិវិធីនៅពេលនោះតែម្តង។
សេចក្តីប្រកាសព័ត៌មានបន្ថែមថា ក្នុងករណីដែលគណៈកម្មការអឺរ៉ុបមិនពេញចិត្តនឹងវឌ្ឍនភាពដែលកម្ពុជាបានបង្ហាញនោះ ក្រុមការងាររបស់គណៈកម្មការអឺរ៉ុបនឹងប្រើប្រាស់រយៈពេល៦ខែនេះ ដើម្បីរៀបចំរបាយការណ៍អមជាមួយអនុសាសន៍របស់ខ្លួន សម្រាប់ជូនទៅគណៈកម្មការអឺរ៉ុបទាំងអស់ និងប្រធានគណៈកម្មការ ដើម្បីពិនិត្យនិងសម្រេចថា តើត្រូវព្យួរជាណ្តោះអាសន្ននូវប្រព័ន្ធអនុគ្រោះពន្ធពីកម្ពុជា ឬយ៉ាងណា?។ ប្រសិនបើគណៈកម្មការទាំងអស់សម្រេចថា ព្យួរប្រព័ន្ធអនុគ្រោះពន្ធពីកម្ពុជា នោះគឺត្រូវការរយៈពេល៦ខែទៀត ទើបសេចក្តីសម្រេចចុងក្រោយចូលជាធរមាន។
ទំនិញកម្ពុជាដែលនាំចេញទៅសហភាពអឺរ៉ុប មានដូចជា សម្លៀកបំពាក់គ្រប់ប្រភេទ ស្រោម និងស្បែកជើង អង្ករ គ្រាប់ធុញ្ញជាតិ វត្ថុធ្វើពីស្បែក ឆ័ត្រ កៅស៊ូ និងទោចក្រយានជាដើម។ ទំនិញដែលកម្ពុជានាំទៅកាន់សហភាពអឺរ៉ុប មានទំហំទឹកប្រាក់ជាង៦ពាន់លានដុល្លារអាមេរិកក្នុងមួយឆ្នាំៗ៕
